La regenza grischuna ha relaschà ina nova glista da las chasas da tgira. La glista infurmescha davart las chasas da persunas attempadas e da tgira che dastgan quintar giu lur prestaziuns e mussa il basegn actual da letgs da tgira tenor regiun. En sia ultima sesida ha la regenza ultra da quai tractà diversas fatschentas communalas e regiunalas.

Deliberà la nova glista da las chasas da tgira dal Grischun
A partir dal 1. da schaner 2012 vala ina nova glista da las chasas da tgira per il chantun Grischun. La regenza grischuna ha relaschà la glista per quest termin. La glista da las chasas da tgira è l'instrument da planisaziun e da direcziun central en il sectur staziunar. D'ina vart duai vegnir garantida la segirezza dal provediment en tut il chantun. Da l'autra vart na duain vegnir stgaffidas naginas surcapacitads. Cun inscriver ina chasa da persunas attempadas e da tgira respectivamain ina gruppa da tgira en la glista ha l'instituziun respectiva il dretg da quintar giu cun l'assicuranza obligatorica per la tgira da malsauns prestaziuns da tgira e prestaziuns da la tgira acuta e transitorica maximalmain en la dimensiun da las capacitads fixadas (letgs da tgira). Il medem mument han questas instituziuns il dretg da survegnir contribuziuns da prestaziun dal chantun e da las vischnancas.
Il basegn da letgs da tgira per regiun è vegnì fixà l'onn 2010 en la planisaziun generala chantunala da las chasas da tgira. En 16 da 19 regiuns da planisaziun è il dumber da letgs actuals pli pitschen ch'il dumber da letgs previs. En questas regiuns han perquai tut ils letgs da tgira actuals pudì vegnir inscrits en la glista da las chasas da tgira. En trais regiuns da planisaziun datti ina surcapacitad (Cadi Sursassiala, Cadi Sutsassiala e Bregaglia). Il dumber da letgs actuals è en questas trais regiuns per part considerablamain pli grond ch'il dumber da letgs previs, uschia che betg pli tut ils letgs da tgira na cumparan sin la glista da las chasas da tgira. Tut en tut dispona il chantun da 2'352 letgs da tgira.
Link a la glista da las chasas da tgira dal chantun Grischun 2012

La lescha per promover la tgira da persunas malsaunas entra en vigur il 1. da schaner 2012
La revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira (lescha per promover la tgira da persunas malsaunas) ch'il cussegl grond ha concludì ils 16 da zercladur 2011 vegn messa en vigur per il 1. da schaner 2012. La regenza ha fixà l'entrada en vigur sin quest termin ensemen cun ina revisiun parziala da l'ordinaziun respectiva. Cun la nova lescha per promover la tgira da persunas malsaunas vegnan realisadas sin plaun chantunal prescripziuns federalas che concernan il sectur da la finanziaziun dals ospitals.


Da vischnancas e da regiuns

• Ramosch / Tschlin: La cunvegna ch'è vegnida concludida ils 21 d'october 2011 da las vischnancas da Ramosch e da Tschlin per fusiunar las vischnancas per il 1. da schaner 2013 a la nova vischnanca da Valsot vegn approvada. La fusiun da questas vischnancas sto vegnir concludida dal cussegl grond. 
• Filisur / Bravuogn: La revisiun parziala da la planisaziun locala ch'è vegnida concludida da las vischnancas da Filisur e da Bravuogn ils 20 da matg 2010 e che sa referescha ad in project (chava da crappa Farrirola) vegn approvada. 
• Flem: Il plan d'areal "Plaids", concludì da la vischnanca da Flem ils 30 d'avust 2011, vegn approvà. 
• Rueun: Per la meglieraziun generala vegn garantida a la vischnanca da Rueun supplementarmain ina contribuziun chantunala da maximalmain 900'000 francs. 
• S. Martin: Per la meglieraziun generala vegn garantida a la vischnanca da S. Martin supplementarmain ina contribuziun chantunala da maximalmain 628'000 francs.

Contribuziuns chantunalas a differentas instituziuns

• Instituziun purtadra da la chasa da dimora e da tgira Plaids a Flem: Per restructurar e per engrondir la chasa da dimora e da tgira Plaids a Flem vegn deliberada ina contribuziun chantunala d'investiziun da totalmain 2'440'000 francs.

Projects da vias
La regenza ha approvà totalmain 2'020'000 francs per construir e per sanar ils suandants trajects da vias:
- via da la Lumnezia: lavurs d'impressari, Quadras – Val Pilac – Nisals
- via da St. Antönien: lavurs d'impressari e da cuvrida, Badüsli
- via da Stugl: lavurs d'impressari, Latsch – Stugl


Gremi: regenza
Funtauna: rg chanzlia chantunala dal Grischun