Pervia da l'impurtanza per il turissem e per l'economia publica s'occupan dapi l'avust 2010 represchentants da la regenza chantunala, da las vischnancas da l'Engiadin'ota, dal circul d'Engiadin'ota, da l'organisaziun turistica Engiadina San Murezzan, da l'Engadin Airport SA sco er d'experts d'aviatica cun il futur da la plazza aviatica regiunala da Samedan. A chaschun da lur ultima sesida dals 26 d'october 2011 ha la gruppa directiva pudì prender enconuschientscha da las basas da planisaziun cumplessivas concernent ina procedura d'atterrament sustegnida d'instruments sco er d'in plan da svilup en etappas.

Ina gruppa da lavur che sa cumpona d'experts ha sclerì ils ultims mais – per incumbensa da la gruppa directiva – en discurs intensivs cun differents experts (tranter auter er cun l'uffizi federal d'aviatica civila, cun la controlla dal traffic aviatic Skyguide e cun la plazza aviatica da Turitg) tge proceduras d'atterrament pussaivlas che pudessan gidar ad augmentar la fidaivladad e la disponibladad da la plazza aviatica e tge consequenzas che quai avess per il masterplan e per las investiziuns. Ultra da quai ha la gruppa da lavur elavurà ina basa da planisaziun tecnica (masterplan) per il svilup futur pussaivel da la plazza aviatica. Quest plan permettess al maun public da far las investiziuns ch'èn stringentamain necessarias a curta vista, a vista mesauna ed a lunga vista e da pussibilitar il medem mument in svilup a lunga vista che tegna quint dals basegns da la plazza aviatica. Las basas ch'èn ussa avant maun servan d'ina vart ad adattar la planisaziun locala da l'Engiadin'ota e la planisaziun locala da las vischnancas da staziunament. Da l'autra vart pon vegnir tractadas sin questa basa er projects pussaivels d'engrondiment e d'extensiun cun la guardia aviatica svizra da salvament Rega e cun ulteriuras interpresas d'helicopter.
 
Proposta da finanziaziun vegn elavurada
Suenter che las basas tecnicas necessarias èn avant maun, vegn elavurada en ina proxima fasa ina proposta concreta d'organisaziun e da finanziaziun. Sin basa da quella vegn alura formulada la decisiun definitiva davart las variantas per mauns dals gremis politics. Questas lavurs sco er il giudicament dals aspects ils pli impurtants da la persistenza èn vegnids incumbensads da la gruppa directiva a chaschun da la sesida dals 26 d'october 2011.


Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01
- Thomas Nievergelt, president communal da Samedan, tel. 081 851 07 10 ubain 081 851 17 77


Gremi: departament da construcziun, traffic e selvicultura
Funtauna: rg departament da construcziun, traffic e selvicultura