Nov interpresas grischunas pitschnas e mesaunas (IPM) da la Val dal Rain grischuna cun totalmain 700 collavuraturas e collavuraturs vulan meglierar la cumpatibilitad da la professiun cun la famiglia. Per il project "IPM en acziun: Structuras favuraivlas per famiglias sco factur da success", lantschà l'onn 2010 dal post da stab chantunal per l'egualitad da las schanzas en collavuraziun cun il post spezialisà UND, cumenza ussa la segunda fasa.

Las IPM grischunas che s'engaschan en quest project represchentan quasi tut il spectrum da branschas dal chantun. Represchentads èn ils secturs da l'economia d'energia (IBC Energia Aua Cuira), da la gastronomia (Merz Gastro SA), dal commerzi (Josias Gasser Materialias da construcziun SA), da la vendita ("do it" Baumarkt SA), da la tgira (Spitex Cuira), dal traffic public (Bus da la citad da Cuira SA), da la lingua e cultura (Lia rumantscha), da l'hotellaria (hotel "Stern") e dal svilup da programs da computer (Wenzel Metromec SA). Tut en tut profiteschan circa 700 collavuraturas e collavuraturs da questas interpresas da pudair coordinar meglier en il futur la professiun cun la famiglia/vita privata. In enritgiment per quest project è il fatg ch'i sa participeschan tant interpresas, tar las qualas lavuran quasi exclusivamain umens u dunnas sco er talas cun teams maschadads.

Las cundiziuns da lavur vegnan analisadas
En il rom dal project survegnan las IPM grischunas la pussaivladad da laschar analisar dal post spezialisà UND, quant enavant che lur cundiziuns da lavur èn favuraivlas per famiglias, da sviluppar mesiras individualas e – cun agid professiunal – da las suttametter ad in test. En ina terza fasa vegnan ils resultats alura analisads ed evaluads ensemen cun las interpresas. La finamira dal program è quella da laschar profitar las IPM localas da las experientschas d'autras firmas e d'autras regiuns e da crear ina conscienza per ils aspects economics positivs da las cundiziuns da lavur ch'èn favuraivlas per las famiglias. Il project vegn accumpagnà d'in cussegl consultativ cun represchentantas e represchentants da federaziuns economicas, dad IPM sco er da persunas da la politica e da l'economia. El vegn finanzià dal chantun Grischun, da la confederaziun e da sponsurs grischuns.

En ils conturns economics actuals poi esser in cler avantatg per ina IPM envers sia concurrenza da porscher cundiziuns da lavur attractivas. Per exempel per gudagnar novas forzas da lavur – en spezial forzas da lavur spezialisadas – e da mantegnair il know-how. La cumpatibilitad da la professiun cun la vita privata è en quest connex in crap da mosaic impurtant. Patrunas e patruns che porschan plazzas da lavur favuraivlas per las famiglias èn dumandads tar umens e dunnas che sa stentan da cuntanscher in equiliber da tut ils secturs da vita. Il dumber da tals umens e da talas dunnas crescha d'in cuntin. La finala sa decidan persunas che tschertgan ina plazza da lavur per bunas cundiziuns da lavur, e las interpresas profiteschan da forzas da lavur engaschadas che s'identifitgeschan cun l'interpresa. Las interrogaziuns las pli novas d'emploiadas e d'emploiads mussan che l'equiliber tranter la famiglia e la lavur vegn valità dad umens e da dunnas schizunt sco pli impurtant ch'il salari.

Ulteriuras infurmaziuns en l'internet sut www.stagl.gr.ch, www.und-online.ch e www.berufundfamilie.admin.ch. 


Infurmaziuns:
Susanna Mazzetta, manadra dal project, post da stab per l'egualitad da las schanzas, tel. 081 257 35 72 u natel 079 483 74 01, Susanna.Mazzetta@stagl.gr.ch 


Gremi: post da stab per l'egualitad da las schanzas
Funtauna: rg post da stab per l'egualitad da las schanzas