A la NATUR 2012 (messa e congress per la persistenza) che ha lieu dals 13 fin ils 16 d'avrigl 2012 a Basilea è il Grischun envidà sco chantun ospitant. Il cusseglier guvernativ dal Grischun, Martin Jäger, ed il directur da NATUR 2012, Beat Jans, han suttascrit oz a Cuira la cunvegna da cooperaziun correspundenta. NATUR 2012 ha lieu il medem mument sco la messa da divertiment MUBA.

Il Grischun è envidà sco chantun ospitant a la NATUR 2012. Quella è la plattafurma naziunala la pli impurtanta per la persistenza. A la messa dat il chantun als parcs grischuns ed a lur partenaris la pussaivladad da sa preschentar ad in vast public sco regiuns da model per il svilup persistent. Al congress vegnan pliras represchentantas e plirs represchentants dal Grischun a formular patratgs fundamentals davart il tema "La cuntrada en il champ da tensiun tranter la protecziun e l'utilisaziun" ed a sa participar a las discussiuns.

Il Grischun ed il svilup persistent a la messa
En il center da la preschentaziun dal Grischun a la messa NATUR 2012 stattan ils projects da parcs grischuns: il parc Ela, il parc natiral Beverin, il project per in parc naziunal parc Adula, la Biosfera Val Müstair ed il patrimoni natiral mundial da la UNESCO "Arena tectonica svizra Sardona". Al stan a la messa pon las visitadras ed ils visitaders gist vesair a maun d'in nov sistem d'infurmaziun directamain ils parcs grischuns. Sco partenaris sa preschentan Grischun vacanzas, la Viafier retica (VR), AutoDaPosta Grischun ed il Parc naziunal svizzer. Alpinavera, l'organisaziun per la commerzialisaziun da products regiunals, vegn a preparar in stan da degustaziuns ed ad offerir spezialitads grischunas, ensemen cun la Biosfera Val Müstair e cun ulteriuras producentas e producents da las regiuns dals parcs.

Ils cuntegns ed il sistem d'infurmaziun sviluppads pon vegnir applitgads ed amplifitgads vinavant a lunga vista – suenter la messa NATUR 2012 a Basilea – en ils projects da parcs, e quai dal tuttafatg en il senn da la persistenza. Ultra da quai èn previsas suenter la messa NATUR 2012 ulteriuras occurrenzas e preschentaziuns davart il tema.

Cussegliera federala Leuthard e cusseglier guvernativ Jäger al congress
Al congress che ha lieu ils 13 d'avrigl 2012 e che vegn visità da passa 650 persunas spezialisadas che s'interesseschan per la persistenza, referescha l'architect Gion A. Caminada davart il svilup dals abitadis e da la cuntrada. Il post da cumpetenza grischun per il turissem che s'accorda cun la natira e cun la cultura da Vargistagn organisescha ensemen cun la rait da parcs svizzers in lavuratori davart il svilup da parcs. L'anteriur cusseglier naziunal dal Grischun, Sep Cathomas, raquinta da las experientschas ch'el ha fatg cun la planisaziun dal territori en sia vischnanca burgaisa da Breil. La cussegliera federala Doris Leuthard discurra sur da la persistenza sin plaun federal. Il cusseglier guvernativ Martin Jäger explitgescha la perspectiva grischuna.

Ils 14 d'avrigl 2012 ha plinavant lieu sin l'areal da la messa da Basilea ina discussiun al podium davart la relaziun tranter las citads e la champagna. Expertas, experts sco er represchentantas e represchentants da Basilea e dal Grischun discuteschan davart propostas per in svilup cun avegnir dal territori en las citads e sin la champagna.

Direcziun ed organisaziun
Il project per la preschentaziun dal Grischun sco chantun ospitant a la messa NATUR 2012 vegn purtà da l'uffizi per la natira e l'ambient (ANU). Il post spezialisà per il turissem ed il svilup persistent da la scola auta da scienzas applitgadas da Turitg (Center da capricorns, Vargistagn) è cumpetent per il concept e per la direcziun da la realisaziun. Il stan a la messa e las ulteriuras mesiras communicativas vegnan sviluppadas e coordinadas cun la firma CLUS (agentura da reclama, Cuira) e cun Grischun vacanzas. L'entira preschentaziun ha lieu sut il tetg da la marca grischun ("graubünden").

NATUR 2012
NATUR a Basilea è il lieu da scuntrada e da martgà svizzer il pli impurtant per la persistenza e per stils da viver che han in avegnir. Purschiders da products producids en moda persistenta e martgadads en in commerzi fair respectivamain regiunal mussan ch'il consum ed il giudiment cun responsabladad tutgan ensemen. La perscrutaziun, la scienza, organisaziuns ed il maun public intermedieschan enconuschientschas e sensibiliseschan per la natira, per la cuntrada e per il svilup persistent. NATUR a Basilea è l'occurrenza annuala la pli impurtanta davart il tema actualmain modern da la persistenza.

A la 7avla messa NATUR dals 13 fin ils 16 d'avrigl 2012 beneventan passa 100 exposituras ed expositurs durant quatter dis pli che 40'000 visitadras e visitaders. Al congress NATUR dals 13 d'avrigl 2012 sa scuntran passa 650 persunas spezialisadas e talas che prendan decisiuns ad in barat davart las tendenzas las pli novas en connex cun il svilup persistent. Il tema central dal congress NATUR 2012 è il svilup da la cuntrada. Ulteriuras infurmaziuns chattan ins en l'internet sut www.natur.ch.


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01
- Andreas Cabalzar, uffizi per la natira e l'ambient, tel. 081 257 29 46


Gremi: departament d'educaziun, cultura e protecziun da l'ambient
Funtauna: rg uffizi per la natira e l'ambient