Suenter che la radunanza communala da Segl aveva refusà l'onn passà la soluziun oriunda cun in sviament sin ses territori communal, ha il chantun laschà elavurar ulteriuras variantas en il rom d'in studi. Ils resultats ch'èn vegnids preschentads ussa duain vegnir persequitads vinavant cun ils circuls pertutgads.

Mardi, ils da 13 december 2011, han il schef dal departament da construcziun, traffic e selvicultura dal Grischun e collavuraturs da l'uffizi chantunal da construcziun bassa preschentà a represchentantas ed a represchentants da las vischnancas pertutgadas, a circuls economics e turistics, a las deputadas ed als deputads da l'Engiadin'ota e da la Bregaglia, a la Pro Lej da Segl ed a la CI Segl la paletta empermessa da soluziuns pussaivlas. Quellas cumpiglian mo trassés da la vart sanestra da l'En. Ils singuls projects sa differenzieschan areguard las ovras da protecziun (dumber, lunghezza ed equipament da tunnels e/u da galarias cun in u cun dus vials, sco soluziun mo per l'enviern u er per la stad), areguard las colliaziuns cun il vitg da Segl, areguard las consequenzas per ils temps da bloccada sco er areguard ils custs. Tar ils projects preschentads sa tracti da studis, perquai èn ils custs mo custs approximativs. La soluziun la pli favuraivla custa 85 milliuns francs, la varianta la pli chara 350 milliuns francs.

En in proxim pass ston las totalmain 15 variantas che sa differenzieschan per part mo minimalmain vegnir reducidas ad in pèr paucas variantas. Tar questa selecziun duain cooperar oravant tut las represchentantas ed ils represchentants dals circuls pertutgads ed interessads. Alura vegn dada l'incumbensa da determinar la meglra varianta sin basa dals avantatgs e dals dischavantatgs da las variantas selecziunadas. Per quella vegn alura elavurà ed exponì publicamain – sin basa da la lescha davart las vias – in project inclusiv in rapport davart la cumpatibilitad ecologica.
 

Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01
- Heinz Dicht, inschigner superiur, uffizi da construcziun bassa, tel. 081 257 37 01
 

Gremi: departament da construcziun, traffic e selvicultura
Funtauna: rg departament da construcziun, traffic e selvicultura