L'agricultura e l'economia da nutriment dal Grischun duain dumagnar las sfidas dals proxims onns cun agid da products innovativs ed orientads al martgà. Il chantun vul sustegnair la branscha cun in program d'impuls. La finamira è d'obtegnair spezialitads dal Grischun ad auts pretschs.

L'agricultura e l'economia da nutriment dal Grischun sa vesan confruntadas cun grondas sfidas. Ellas ston s'orientar pli fitg als martgads. Sche l'avertura dals martgads agrars sa sviluppa ulteriuramain e sche a medem temp vegnan reducidas las mesiras da sustegn per ils martgads, sa sbassa – senza far stentas spezialas – la valurisaziun annuala da l'economia da nutriment dal Grischun per 15 pertschient fin l'onn 2020. In project ch'è vegnì lantschà dal chantun Grischun l'onn 2008 per analisar e per evaluar las perspectivas da svilup da la branscha mussa nua ch'i dat potenzials da martgà e co ch'ins po avrir ils martgads. La regenza grischuna ha prendì enconuschientscha dal rapport final.

Il resultat principal dal rapport è ch'il chantun na po betg midar l'agricultura e l'economia da nutriment dal Grischun mo cun in pèr paucas mesiras. La via vers il success maina sur ina branscha che lavura per gronda part en moda dinamica ed innovativa e che po e sto sa posiziunar tras la producziun e la commerzialisaziun da spezialitads. En Svizra datti novas schanzas sin il martgà per interpresas innovativas, malgrà ch'il martgà crescha plaun e malgrà ch'i sa sviluppa in nov cumportament da las consumentas e dals consuments, sco per exempel la tendenza ad in consum da convenience ed ad in consum ordaifer chasa. Per l'economia da nutriment dal Grischun datti cunzunt schanzas spezialas da posiziunar products da qualitad ad auts pretschs en martgads da nischa, pervia da la dumonda creschenta da products natirals ed autentics en l'economia locala.

Sustegn cun agid d'in program d'impuls
Ils proxims onns duai la politica chantunala da promoziun en l'agricultura ed en l'economia da nutriment avair la suandanta finamira: producir e commerzialisar ad auts pretschs spezialitads dal Grischun. Il chantun gida la branscha a sviluppar ed a posiziunar tals products sin il martgà. Per quest intent vegn el tranter auter ad approfundar ed a concretisar las suandantas propostas da project, extratgas d'in nov program d'impuls "Spezialitads dal Grischun":

• Svilup dal martgà per l'export da chaschiel: Per pudair elavurar dapli latg a chaschiel da muntogna d'auta qualitad duai la branscha survegnir sustegn dal project "Svilup dal martgà per l'export da chaschiel" per ch'ella possia avrir novs martgads a l'exteriur. Igl è impurtant ch'i possian vegnir exportadas er vinavant differentas sorts da chaschiel. A medem temp duain er vegnir sviluppadas vinavant differentas furmas d'organisaziun e da distribuziun per l'export en moda confurma als basegns da las chascharias. 
• Offensiva da communicaziun sut la marca graubünden: Il grad d'enconuschientscha da las spezialitads culinaricas dal Grischun e la dumonda persuenter duain vegnir accentuads cun agid d'ina campagna che vegn manada sut la marca graubünden. 
• Center da cumpetenza per muvel manidel: La producziun da latg cun muvel manidel en il territori da muntogna po esser ina branscha da producziun attractiva. Il chantun sustegna la creaziun d'in center da cumpetenza naziunal per la tratga e per l'allevament da muvel manidel al center da furmaziun e cussegliaziun agricula Plantahof a Landquart. Il center duai gidar ad augmentar l'impurtanza da la producziun da latg cun muvel manidel e duai metter a disposiziun las enconuschientschas necessarias per quest intent. 
• Beef dal Grischun: Ensemen cun la branscha duai vegnir examinada ed iniziada la creaziun da novas spezialitads da charn dal Grischun. La finamira dal project è da posiziunar products da charn dal Grischun sin il martgà d'auta qualitad e d'als vender cleramain sur il pretsch usità, uschia ch'i vegn augmentà la valurisaziun da las producentas e dals producents. 
• Transfer da savida: Per sustegnair las interpresas ad avrir novs martgads ubain a crear novs products pon vegnir pajads agids da finanziaziun a studis, ad analisas ed a concepts e pon vegnir purschids servetschs da cussegliaziun. Las interpresas pon er sa laschar gidar en connex cun dumondas davart la creaziun da products, davart l'avertura da martgads, davart la meglieraziun da process e davart il manaschament da projects. Pussaivladads d'ina furmaziun supplementara pratica cumpletteschan la purschida.

La finamira dal program d'impuls "Spezialitads dal Grischun" è quella da dinamisar l'agricultura per pudair reducir sia dependenza d'entradas statalas. Dumandads èn acturas innovativas ed acturs innovativs: Il success dal program dependa dal fatg, sche la branscha è abla da recepir ils impuls chantunals e d'als realisar en projects concrets.


Infurmaziuns:
- cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01


Gremi: regenza
Funtauna: rg chanzlia chantunala dal Grischun