La nova missiva tar la lescha davart las taxas turisticas (LTT) mussa, co che las 120 differentas leschas communalas d'enfin ussa, cun lur taxas da cura e cun lur taxas per promover il turissem, duain vegnir remplazzadas tras in sistem da finanziaziun modern che vala en l'entir chantun. La repassada dal project, ch'era vegnida pretendida da la cumissiun dal cussegl grond per economia e taxas (CET), ha purtà damain grevezzas per l'hotellaria e dapli spazi d'agir per las vischnancas.

En il rom da la refurma dal turissem èn resultadas en il Grischun durant ils ultims 6 onns actualmain 15 organisaziuns intercommunalas per la gestiun da destinaziuns ed organisaziuns turisticas regiunalas. Quellas èn sa furmadas or da passa 90 organisaziuns turisticas per gronda part localas. Suenter quest process da refurma duai ina lescha chantunala davart las taxas turisticas (LTT) reglar en moda unitara la finanziaziun da la nova structura turistica, e quai cun integrar tut las parts che profitan dal turissem.

Adattaziuns sin basa da la repassada
La cumissiun per economia e taxas (CET) ha confermà il fanadur 2011 ch'i saja necessari da midar il sistem en connex cun la finanziaziun dal turissem, ed ella ha concludì d'entrar en la fatschenta. A medem temp ha ella definì singulas incumbensas da midada ed ha returnà il project a la regenza per ch'ella repassia quel. La regenza ha ussa deliberà per mauns dal cussegl grond la nova missiva tar la lescha davart las taxas turisticas. La missiva duai vegnir tractada en la sessiun d'avrigl 2012. La lescha duai entrar en vigur l'onn 2014.

Tras la nova missiva vegnan cunzunt extendidas las pussaivladads d'agir da las vischnancas. Da nov pon las vischnancas desister cumplettamain d'incassar ina taxa turistica, premess ch'ellas cumpenseschian la finanziaziun da l'organisaziun turistica tras auters meds finanzials. Plinavant è previsa per las vischnancas ina disposiziun transitorica cun in termin d'introducziun da maximalmain 2 onns.

Ultra da quai èn vegnidas midadas las tariffas d'hotels. Tras la creaziun d'ina classa da confort unitara per l'hotellaria da 4 e da 5 stailas sa reduceschan las grevezzas per ils hotels da 4 stailas per circa 12 pertschient e per ils hotels da 5 stailas per circa 24 pertschient. Per ils hotels dad 1 fin 3 stailas importa la reducziun circa 5 pertschient. La nova missiva cuntegna plinavant la pussaivladad d'ina regulaziun speziala per regiuns turisticas cun cartas da giasts respectivamain cun purschidas inclusivas sco er per manaschis d'alloschament cun spezialmain blers letgs respectivamain cun gronds custs da persunal.

Ulteriuras adattaziuns concernan l'augment da la differenza tranter las tariffas da las differentas classas da taxa tar las abitaziuns da vacanzas sco er agids d'execuziun e scleriments da differentas definiziuns.

Puncts centrals dal project
La lescha chantunala davart las taxas turisticas consolidescha la creaziun da destinaziuns turisticas intercommunalas. 120 differentas leschas communalas vegnan remplazzadas. Per la gronda part da las vischnancas n'è la taxa turistica betg ina nova taxa, mabain remplazza taxas existentas. La lescha prevesa che las vischnancas sa cunvegnian entaifer ina regiun turistica areguard il basegn da meds finanzials e ch'ellas fetschian ina cunvegna da prestaziun cun in'organisaziun turistica. Il chantun fixescha la taxa turistica simpla (100 pertschient). Sin basa da lur basegns pon las vischnancas fixar in supplement u ina reducziun. L'execuziun è chaussa da las vischnancas.

Independentamain da lur lieu da fatschenta vegnan tut las interpresas che profitan directamain u indirectamain dal turissem integradas en la finanziaziun dal marketing turistic e dal svilup turistic. Profitunzs èn pia exclus. Ils manaschis turistics primars pajan taxas pli autas che l'ulteriura industria, perquai che la dependenza dal turissem vegn valitada sco factur il pli ferm da trais facturs.

Dapli meds finanzials garantids per il martgà
Cun la taxa turistica simpla (senza supplements u reducziuns communalas) vegnan generads annualmain – tenor in quint da model – circa 61,5 milliuns francs. Perquai che la basa da calculaziun è vegnida midada da las pernottaziuns a la capacitad d'alloschament, na dependan ils meds finanzials dentant betg pli directamain da la conjunctura. Tras la nova finanziaziun dal turissem èsi pia pli facil da calcular ils retgavs per il marketing da las destinaziuns e per il svilup turistic.

Da las circa 40'000 abitaziuns da vacanzas ed abitaziuns secundaras en il Grischun resultan 31,3 milliuns francs, dals circa 1'000 manaschis d'alloschament 21,5 milliuns francs. Ils circa 10'000 manaschis commerzials ed industrials sco er l'agricultura contribueschan 8,7 milliuns francs u 14 pertschient da l'entir volumen. La regenza prevesa ultra da quai da metter a disposiziun ina contribuziun chantunala annuala da fin a 4 milliuns francs per la promoziun da projects da marketing che cumpiglian pliras destinaziuns.

La taxa turistica en furma concisa

La lescha davart las taxas turisticas (LTT) remplazza tut las taxas communalas da cura e tut las taxas communalas per promover il turissem. Ella vala en tut las vischnancas dal chantun. Las vischnancas pon dentant fixar ensemen cun l'organisaziun turistica l'autezza da la taxa. Tut las interpresas che profitan directamain u indirectamain dal turissem pajan la taxa. Resguardadas vegnan la forza da la creaziun da valurs turisticas d'ina interpresa, la dependenza da la regiun e da la branscha dal turissem sco er la grondezza da l'interpresa. Alloschadras ed alloschaders sco er proprietarias e proprietaris d'abitaziuns secundaras na pajan betg pli ina taxa da cura u ina pauschala, mabain ina taxa per chombra da giasts respectivamain per meter quadrat surfatscha d'abitar netta. Las taxas per las interpresas sco er per las possessuras ed ils possessurs d'abitaziuns da vacanzas en mintga vischnanca (senza eventuals supplements u eventualas reducziuns) pon vegnir calculadas a partir da mez favrer 2012 en l'internet sut www.tourismusabgabe.ch.

Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01


Gremi: regenza
Funtauna: rg chanzlia chantunala dal Grischun