La presidenta da la regenza Barbara Janom Steiner è sa scuntrada oz a Bellinzona cun il cusseglier guvernativ tessinais e directur da la polizia Norman Gobbi. En quest connex è vegnì ludà il partenadi interchantunal en dumondas da la giustia e da la polizia.

A chaschun da la scuntrada da la presidenta da la regenza Barbara Janom Steiner e dal cusseglier guvernativ Norman Gobbi, che ha gì lieu oz en il Tessin, è vegnida tractada la cooperaziun vertenta dals dus chantuns en dumondas da la lavur da la polizia, dals fatgs da polizia e da l'execuziun giudiziala. Tant Janom Steiner sco er Gobbi han exprimì lur persvasiun che la collavuraziun en quests secturs po vegnir cuntinuada cun success.

Discutada è per exempel vegnida la cunvegna vertenta e la collavuraziun fitg buna tranter las duas polizias chantunalas dal Grischun e dal Tessin. Actualmain è vegnida discutada l'emissiun da passaports biometrics ch'è pussaivla a Bellinzona dapi il mars 2010 er per las abitantas ed ils abitants dal Mesauc. Da nov duain vegnir registradas a Bellinzona er las datas biometricas da persunas estras che han lur domicil en il Mesauc cun l'intent d'emetter legitimaziuns da persunas estras. La publicitad vegn infurmada pli tard, cur che questa novaziun vegn ad entrar en vigur. La finala è vegnì discutà il partenadi per ademplir las mesiras repressivas en il dretg da persunas estras. Uschia exequescha il chantun Grischun gia oz l'arrest d'expulsiun per il chantun Tessin.

Ils commembers da la regenza èn sa cunvegnids da cuntinuar cun ils contacts e da rinforzar vinavant la collavuraziun.


Infurmaziuns:
presidenta da la regenza Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: chanzlia chantunala dal Grischun
Funtauna: rg chanzlia chantunala dal Grischun