La regenza pretenda che la confederaziun repassia las novas directivas davart la signalisaziun turistica vi d'autostradas ed autovias. Ord vista dal Grischun n'èn las novas prescripziuns betg pratitgablas. Plinavant è la regenza s'occupada da differentas fatschentas or da las vischnancas.

Propostas inadequatas per la signalisaziun turistica
La regenza grischuna refusa las novas directivas da l'uffizi federal da vias (UVIAS) davart la signalisaziun turistica vi d'autostradas ed autovias. Bain beneventa la regenza en sia posiziun al UVIAS l'intenziun da meglierar la concepziun da las tavlas turisticas per lung da las autostradas e da las autovias en Svizra. Quella n'è oz numnadamain betg unitara e na correspunda per gronda part betg a las prescripziuns. Però, abstrahà dal fatg ch'il Grischun dispona d'in concept general per concepir las tavlas d'indicaziun menziunadas ch'il UVIAS ha approvà pir l'onn 2002, na po ina gronda part da las novas disposiziuns insumma betg vegnir realisada en moda adequata en il chantun muntagnard.
Per exempel vegni pretendì da nov ch'ins dastgia renviar cun ina tavla turistica mo a destinaziuns u regiuns turisticas impurtantas che vegnan ubain gist traversadas ubain cuntanschidas entaifer 20 kilometers a partir da la proxima sortida. En il Grischun sa chatta in grond dumber da las regiuns turisticas però bler dapli che 20 kilometers davent da l'autostrada u d'ina autovia. Las destinaziuns Tavau/Claustra ed Arosa èn per exempel situadas mintgamai passa 30 kilometers davent da las sortidas respectivas da l'autostrada.
Plinavant avessan novas disposiziuns davart las colurs e davart la grondezza da tavlas turisticas per consequenza che tut quellas ch'existan oz en il chantun stuessan vegnir remplazzadas. Il concept dal Grischun vegn dentant resguardà sco exemplaric en tut la Svizra, sco che numerusas dumondas dad auters chantuns ed organisaziuns turisticas conferman, constatescha la regenza. Ella pretenda che las novas directivas dal UVIAS vegnian adattadas.

Puspè contingent da 290 abitaziuns da vacanzas per il Grischun
Per l'onn 2012 ha il chantun Grischun puspè survegnì dal cussegl federal in contingent per permetter a persunas a l'exteriur d'acquistar 290 abitaziuns da vacanzas. Latiers vegnan las 267 unitads dal contingent che n'èn betg vegnidas duvradas l'onn precedent. Quellas vegnan transferidas sin l'onn current.
La regenza grischuna ha repartì ils contingents permess da nov per l'onn 2012 sco suonda: Per permissiuns or da surbajegiadas cumplettas vegnan messas a disposiziun 240 unitads, da quellas èn reservadas 80 fin la fin d'avust per bains immobigliars da vacanzas explotads permanentamain. In contingent da 50 è previs per l'acquist d'objects singuls.


Da vischnancas e da regiuns

• St. Antönien: La revisiun parziala da la constituziun da la vischnanca da St. Antönien dal 1. da december 2011 vegn approvada. Cun la revisiun vegn introducì il dretg da votar e d'eleger per persunas estras en chaussas communalas. 
• Seglias: La revisiun totala da la planisaziun locala, concludida ils 18 da matg 2011 da la vischnanca da Seglias, vegn approvada. 
• Vignogn: La revisiun parziala da la planisaziun locala, che cuntegna l'emprima etappa da la revisiun totala (territori d'abitadi) e ch'è vegnida concludida da la vischnanca da Vignogn ils 19 da fanadur 2011, vegn approvada. 
• Domat: La revisiun parziala da la planisaziun locala da la vischnanca da Domat dals 23 d'october 2011 (planisaziun d'utilisaziun Heineken) vegn approvada. 
• Landquart: La revisiun totala da la lescha da taglia da la vischnanca da Landquart dals 27 da november 2011 vegn approvada. 
• Surava: La revisiun parziala da la lescha da taglia da la vischnanca da Surava dals 15 da december 2011 vegn approvada. 
• Verdabbio: La revisiun parziala da la lescha da taglia da la vischnanca da Verdabbio dal 1. da december 2011 vegn approvada. 
• Val S. Pieder: Il project "Rempar cunter squatschs da naiv Schaafhaalta" che l'uffizi da guaud e privels da la natira ha inoltrà per incumbensa da la vischnanca da Val S. Pieder vegn approvà. Als custs vegn garantida ina contribuziun da maximalmain 57'600 francs. 
• La Punt-Chamues-ch/Madulain/Zuoz/S-chanf: La revisiun parziala dals statuts dal consorzi da scola "La Plaiv Suot Funtauna Merla" vegn approvada. 
• Circul da la Bregaglia: La revisiun parziala da la constituziun dal circul da la Bregaglia dals 15 da december 2011 vegn approvada. Il motiv da revisiun furma la fusiun da l'uffizi da stadi civil cun quel da l'Engiadin'ota.

Contribuziuns chantunalas a differentas instituziuns

• Uniuns istoricas dal chantun Grischun e da la provinza da Sondrio: La dieta istorica "1512: Ils Grischuns en la Vuclina, a Buorm ed a Clavenna" dals 22 e 23 da zercladur 2012 a Tiraun ed a Puschlav vegn sustegnida cun ina contribuziun en furma d'ina garanzia da deficit da maximalmain 20'000 francs.

Projects da vias
La regenza ha approvà 1,9 milliuns francs per lavurs da construcziun sin ils suandants trajects:
- via dal Güglia / dal Malögia: lavurs d'impressari e da cuvrida en il vitg da Lantsch


Gremi: regenza
Funtauna: rg chanzlia chantunala dal Grischun