La regenza ha fixà la valur dals puncts da taxa da TARMED per far giu quint cun las prestaziuns ambulantas dals ospitals grischuns e da las clinicas grischunas sco er dals servetschs psichiatrics dal Grischun. A partir da l'onn 2013 vala en il Grischun ina valur dals puncts da taxa da 0.92 francs. Per las assicuranzas resultan custs supplementars da var 5 milliuns francs.

Dapi l'onn 2008 vegn applitgada en il chantun Grischun ina valur dals puncts da taxa da TARMED da 0.85 francs per far giu quint cun las prestaziuns d'ospital ambulantas. TARMED permetta da far giu quint cun las prestaziuns ambulantas medicalas e paramedicalas en ina moda unitara en l'entira Svizra. Mintga prestaziun survegn in tschert dumber da puncts da taxa, e quai tenor il temp impundì, tenor la difficultad e tenor l'infrastructura necessaria. En ils differents chantuns variescha dentant la valur dals puncts da taxa che vegn fixada da las parts contrahentas.

Perquai che la federaziun grischuna "chasas ed ospitals" e la santésuisse – las assicuranzas svizras da malsauns n'han betg pudì sa cunvegnir ad ina nova valur dals puncts da taxa per l'onn 2011, ha la regenza ussa decretà d'uffizi la tariffa suenter ina procedura dad 1 onn. Tenor ses conclus vala per l'onn 2011 anc la veglia valur dals puncts da taxa da 0.85 francs, a partir dal 1. da schaner 2012 è ella 0.89 francs ed a partir dal 1. da schaner 2013 vegn ella fixada a 0.92 francs. La nova tariffa, che vala a partir da l'onn 2013, tegna quint da la chareschia en connex cun ils salaris ed en connex cun ils pretschs da consum.

L'adattaziun graduada da la valur dals puncts da taxa ha per consequenza ch'i dat in augment dals custs per las assicuranzas da malsauns da ca. 2,8 milliuns francs l'onn 2012 e da ca. 2,1 milliuns francs l'onn 2013. Per las persunas assicuradas signifitgescha quai in probabel augment da las premias da las cassas da malsauns da 0,94 pertschient. Ord vista da la regenza è l'augment da la valur dals puncts da taxa supportabla economicamain areguard las consequenzas per las premias.

La procedura da fixaziun ch'è ussa terminada aveva demussà cleramain las differentas posiziuns da las partenarias da tariffa. La federaziun grischuna "chasas ed ospitals" aveva proponì ina tariffa dad 1.05 francs, santésuisse ina tala da 0.82 francs. La federaziun grischuna "chasas ed ospitals" aveva motivà sia proposta cun in quint integral dals custs inclusiv ils custs d'investiziun che n'eran betg vegnids quintads anteriuramain. La santésuisse ha refusà la metoda da calculaziun e las datas registradas e n'ha betg acceptà la cumprova d'ina furniziun da prestaziuns effizienta.

Cunter la decisiun da fixar las tariffas che la regenza ha prendì poi vegnir fatg recurs entaifer 30 dis tar il tribunal administrativ federal.


Infurmaziuns:
presidenta da la regenza Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun