En la missiva al cussegl grond tar la revisiun totala da la lescha da scola èn ils custs supplementars che vegnan chaschunads pervia da la reducziun dals pensums cumplains da las persunas d'instrucziun inditgads en moda fallida. La regenza grischuna ha prendì enconuschientscha dals custs supplementars pli auts.

Las discussiuns suenter ch'il project tar la revisiun totala da la lescha da scola era vegnì tractà en il cussegl grond han mussà che las calculaziuns dals custs supplementars che vegnan preschentads en la missiva e che vegnan chaschunads pervia da la reducziun dals pensums cumplains da las persunas d'instrucziun èn fallidas. Sin la pagina 685 da la missiva carnet nr. 6 / 2011-2012 "Revisiun totala da la lescha davart las scolas popularas dal chantun Grischun (lescha da scola)" steva scrit:
"Reducziun dal pensum cumplain da las persunas d'instrucziun: Sch'ins reducescha il dumber da lecziuns per emna ed onn d'in pensum cumplain da las persunas d'instrucziun da la scola primara e secundara da 1140 (38 emnas da scola à 30 lecziuns) a 1131 (39 emnas da scola à 29 lecziuns; quai che correspunda ad ina reducziun da 0,8 pertschient) resp. d'in pensum cumplain sin il stgalim da la scolina da 950 uras per emna ed onn (38 emnas da scola à 25 uras) a 936 uras per emna ed onn (39 emnas da scola à 24 uras; quai che correspunda ad ina reducziun dad 1,5 pertschient), basegni correspundentamain dapli persunas d'instrucziun."

Questa ponderaziun è fallida, perquai che las instituziuns ch'èn responsablas per la scola en il Grischun n'indemniseschan lur persunas d'instrucziun betg sin basa da las lecziuns per emna ed onn. Per eruir las midadas dal salari è decisiv unicamain il dumber da las lecziuns che vegnan instruidas per emna (pensum emnil). Il dumber da las emnas da scola, respectivamain da las emnas da vacanzas, n'ha nagina influenza sin l'indemnisaziun da las persunas d'instrucziun.
Ultra da quai èsi sa mussà ch'ins è – cun calcular la reducziun dal pensum cumplain da las persunas d'instrucziun da classa – partì d'ina presumziun fallida. La part da las persunas d'instrucziun da classa vi dal total da persunas d'instrucziun è vegnida fixada memia bass.

Calculaziun e custs supplementars tenor las presumziuns correctas
Las calculaziuns dals custs ston vegnir fatgas sin fundament da las suandantas duas basas da calculaziun: 

• Quantas lecziuns ston las persunas d'instrucziun dar per cuntanscher in pensum cumplain emnil? (Custs che resultan pervia da las midadas dal pensum emnil da las persunas d'instrucziun) 
• Quantas lecziuns ston las instituziuns ch'èn responsablas per la scola garantir per emna? (Sin fundament da la decisiun dal cussegl grond il december 2011 tar la dumonda Märchy da betg midar il dumber da lecziuns per emna da las scolaras e dals scolars fin ch'i vegn introducì il plan d'instrucziun 21, resta la dotaziun d'uras vertenta tala e quala.)

Las calculaziuns ston vegnir fatgas sco suonda: 

• Per las persunas d'instrucziun da la scola primara e secundara da 30 a 29 lecziuns per emna. Quai correspunda ad ina reducziun dal pensum cumplain emnil per ina lecziun (resp. 3,3 pertschient empè da 0,8 pertschient tenor la presumziun en la missiva). 
• Per las persunas d'instrucziun da la scolina da 25 a 24 uras per emna. Quai correspunda ad ina reducziun dal pensum cumplain emnil per ina ura (resp. 4 pertschient empè dad 1,5 pertschient tenor la presumziun en la missiva). 
• Per las persunas d'instrucziun da classa da 29 a 28 lecziuns per emna. Quai correspunda ad ina reducziun dal pensum cumplain emnil per ina lecziun (resp. 3,4 pertschient). En ils documents tar la missiva èsi vegnì quintà cun ina part memia bassa da persunas d'instrucziun da classa.

Custs supplementars envers la missiva
I resultan las suandantas midadas dals custs: 

Posiziun dals custs tenor la pagina 683 da la missiva	Fin ussa	Da nov
Reducziun dal pensum cumplain da las persunas d'instrucziun	403'591	1'704'050
Reducziun dal pensum cumplain da las persunas d'instrucziun da classa	590'264	1'127'789
Reducziun dal pensum cumplain da las persunas d'instrucziun da la scolina	74'428	202'018

La differenza envers la missiva importa pia en total 1'965'574 francs. Sche las pauschalas per scolara u per scolar na vegnan betg adattadas correspundentamain, van quests custs cumplettamain a quint da las instituziuns ch'èn responsablas per la scola.


Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01


Gremi: regenza
Funtauna: rg chanzlia chantunala dal Grischun