Per la votaziun dal pievel da dumengia, ils 11 da mars 2012, concernent in credit per la construcziun d'in nov center administrativ chantunal – project "sinergia" èn las vuschs vegnidas verifitgadas d'uffizi. La verificaziun ha purtà il suandant resultat: il project "sinergia" dals 11 da mars 2012 è vegnì approvà cun 27'206 cunter 27'168 vuschs.
Ils 13 da mars 2012 ha la regenza grischuna ordinà che las vuschs da la votaziun chantunala dals 11 da mars 2012 concernent in credit per la construcziun d'in nov center administrativ chantunal – project "sinergia" vegnian dumbradas anc ina giada. Quai sin basa da la lescha davart ils dretgs politics en il chantun Grischun che prevesa ina verificaziun d'uffizi, sch'il resultat total eruì provisoricamain a chaschun d'ina votaziun demussa ina differenza tranter las vuschs affirmativas e las vuschs refusantas da main che 0,3 pertschient dals cedels da votar consegnads valaivels. Perquai ch'ils resultats da duas vischnancas èn vegnids curregids posteriuramain, èn stadas ademplidas las premissas respectivas per il project "sinergia".
Suenter ch'il material da votar da tut las 176 vischnancas grischunas è stà avant maun, ha la chanzlia chantunala dumbrà anc ina giada las vuschs per incumbensa da la regenza, e quai ils 19 da mars 2012 en las localitads da la Chasa grischa a Cuira. La verificaziun ha gì lieu tenor ina procedura cleramain structurada e cun agid da controllas, uschia che la correctadad da la verificaziun è stada garantida. La chanzlia chantunala ha eruì il suandant resultat per il project "sinergia":
- cedels entrads: 56'092
- cedels vids: 1'247
- cedels nunvalaivels: 471
- cedels valaivels: 54'374
- vuschs "gea": 27'206
- vuschs "na": 27'168
Tras la verificaziun hai dà tar totalmain 45 da 176 vischnancas midadas envers il resultat ch'era vegnì publitgà ils 15 da mars 2012 en il fegl uffizial dal chantun Grischun. Midadas relevantas per il resultat (vuschs "gea"/"na") èn vegnidas constatadas tar 43 vischnancas. Las midadas constatadas han principalmain ils suandants motivs:
- sbagls da zavrar las vuschs (vuschs "gea"/"na"; project chantunal 1 e project chantunal 2)
- sbagls da dumbrar (adiziun da las vuschs)
- emblidà da resguardar vuschs da vote électronique da las Svizras e dals Svizzers a l'exteriur
- betg resguardà vuschs nunvalaivlas inoltradas per posta
La regenza ha prendì enconuschientscha dal resultat da la verificaziun da las vuschs dal project "sinergia". Il resultat da la verificaziun dals 19 da mars 2012 vegn publitgà uffizialmain en il fegl uffizial dal chantun Grischun dals 22 da mars 2012 (ils resultats communals midads èn marcads). Il medem di vegn il resultat detaglià da la verificaziun publitgà en l'internet sut
www.gr.ch.
Infurmaziuns:
Walter Frizzoni, vicechancelier, tel. 081 257 22 22
Gremi: regenza
Funtauna: rg chanzlia chantunala dal Grischun