Il post da stab per l'egualitad da las schanzas ha adattà la broschura davart il tema "violenza a chasa" a la nova situaziun giuridica ed a la pratica actuala.

La broschura dat a las persunas pertutgadas ed involvidas infurmaziuns davart la violenza a chasa e las mussa, tge pussaivladads giuridicas ch'ellas han. Ella declera la spedida poliziala d'ina persuna violenta or da l'abitaziun communabla. La broschura mussa las pussaivladads dal dretg penal e declera las mesiras da protecziun da dretg civil, sco p.ex. mesiras d'allontanament, las qualas èn vegnidas extendidas en il fratemp e cun las qualas ins ha ussa er fatg experientschas. A medem temp vegn l'attenziun drizzada sin las consequenzas che la violenza a chasa tranter persunas creschidas ha per ils uffants – els ch'èn involvids en la violenza a chasa sco perditgas u sco persunas directamain pertutgadas. La broschura è in carta per cas d'urgenza che cuntegna tut ils numers da telefon impurtants, tut las persunas da contact e tut ils posts da cussegliaziun, nua che las persunas pertutgadas pon dumandar agid. Persunas violentas pon sa drizzar al post chantunal da cussegliaziun per persunas violentas.

La broschura è vegnida edida l'emprima giada l'onn 2005 en collavuraziun cun la Maisa radunda dal project d'intervenziun, e quai a chaschun da l'introducziun da la spedida poliziala en cas da violenza a chasa. A la Maisa radunda èn radunadas las instituziuns e las autoritads ch'èn confruntadas cun violenza a chasa. Pervia da las novaziuns giuridicas e pervia da la pratica actuala en connex cun la violenza a chasa èsi stà necessari d'adattar la broschura. La broschura vegn tranter auter repartida a las persunas pertutgadas tras la polizia en il rom da lur acziuns en cas da violenza a chasa. La broschura sustegna dentant er la lavur dals posts da cussegliaziun ed è – per persunas privatas che vegnan confruntadas cun violenza a chasa – in sustegn impurtant areguard lur dretgs ed areguard lur pussaivladads.

La broschura po vegnir retratga gratuitamain tar il post da stab per l'egualitad da las schanzas (tel. 081 257 35 70). Sut www.stagl.gr.ch po la broschura actualisada vegnir chargiada giu per rumantsch, tudestg, talian, englais, albanais, tirc, serbocroat, tamil, portugais e spagnol.


Infurmaziuns:
Susanna Mazzetta, manadra dal project, post da stab per l'egualitad da las schanzas, tel. 081 257 35 72, e-mail: Susanna.Mazzetta@stagl.gr.ch


Gremi: post da stab per l'egualitad da las schanzas
Funtauna: rg post da stab per l'egualitad da las schanzas