La regenza ha deliberà la missiva davart l'engrondiment architectonic dal museum d'art dal Grischun per mauns dal cussegl grond. Il museum basegna ina surfatscha d'exposiziun pli gronda ed infrastructuras modernas. L'edifizi Sulser existent duai vegnir remplazzà tras in edifizi nov. Quai mussa er il resultat d'ina concurrenza d'architectura ch'è en il fratemp terminada.

La situaziun funcziunala ed architectonica actuala dal museum d'art dal Grischun, situà a la plazza da la Posta da Cuira, na cuntenta insumma betg, e quai pervia da la mancanza da spazi ch'exista gia dapi decennis. Gia en la concepziun chantunala da museums da l'onn 1976 è vegnì cumprovà in basegn da spazi da 3'800 meters quadrat per il museum d'art. La renovaziun che ha gì lieu en il fratemp, la restauraziun e la transfurmaziun dal museum dals onns 1987 fin 1990 n'han er betg laschà gudagnar marcantamain dapli spazi. Cun circa 1'900 meters quadrat stat a disposiziun oz al museum d'art la mesadad dal spazi ch'è vegnì definì avant 36 onns.

Locals moderns per ovras e per exposiziuns
L'engrondiment architectonic che la regenza propona ussa per il museum duai eliminar las mancanzas d'infrastructura e crear localitads da museum modernas. La missiva ch'il cussegl grond vegn a tractar durant la sessiun da zercladur prevesa ina surfatscha d'exposiziun supplementara da circa 2'700 meters quadrat. Il basegn da spazi actual dal museum da totalmain 4'600 meters quadrat vegn pia ademplì dal tuttafatg. En il futur pudess vegnir preschentada ina part commensurada da la collecziun d'art dal Grischun e pudessan vegnir surpigliadas dapli exposiziuns temporaras attractivas d'auters museums d'art.

Oz pon vegnir mussads al public mo 3 pertschient da l'entira collecziun d'art en l'exposiziun permanenta dal museum en la villa Planta ed in spazi minimal per exposiziuns temporaras en l'uschenumnà edifizi Sulser permetta da realisar mo paucas cooperaziuns attractivas cun auters museums. Ultra da quai na pon betg vegnir observads ils standards areguard la segirezza ed il clima dals locals.

L'edifizi Sulser duai vegnir remplazzà tras in edifizi nov
Differents studis da realisabladad ch'èn vegnids incumbensads avant la planisaziun da museums mussan che – pervia da las relaziuns da spazi precaras sin l'areal dal museum – l'engrondiment necessari na sa laschia strusch realisar u alura mo cun dischavantatgs considerabels, senza stuair demolir l'edifizi Sulser ch'è da princip classifitgà sco degn da vegnir mantegnì.

Ils resultats d'ina concurrenza d'architectura ch'è vegnida realisada – per motivs da temp – il medem mument sco l'elavuraziun da la missiva conferman ussa ils resultats da quests studis preliminars, preschentads en la missiva. Tut ils 18 projects ch'èn vegnids inoltrads prevesan da remplazzar l'edifizi Sulser ch'è adattà mo limitadamain per exposiziuns d'art. Sco victur da la concurrenza ha la giuria nominada designà il biro d'architectura Barozzi Veiga da Barcelona cun il project "Die Kunst der Fuge". Sin la segunda plazza suonda il project "Hyllis" dal biro d'architectura EM2N da Turitg. La terza plazza ha cuntanschì il project "Alberto" da Valerio Olgiati da Flem.

Tenor la giuria fascinescha il project victur tras ses plazzament precis e cler en ils conturns architectonics. Locals bain proporziunads per la collecziun ed ina structura flexibla dals locals per las exposiziuns temporaras han persvadì er dal puntg da vista funcziunal. Il biro d'architectura Barozzi Veiga ha gia realisà plirs edifizis da cultura e gudagnà concurrenzas per museums d'art, sco tranter auter l'onn passà quella per il Musée des beaux arts da Losanna.

La finanziaziun è garantida per dus terzs tras ina donaziun generusa
Ils custs d'investiziun per quest engrondiment dal museum importan 28,5 milliuns francs. Questas investiziuns bruttas sa scuntran cun entradas da 20 milliuns francs or d'ina donaziun liada ad in intent specific (communicaziun da la regenza dals 7-6-2011). Per il chantun resta pia ina investiziun netta dad 8,5 milliuns francs. Il cumenzament da las lavurs da construcziun è previs per l'october 2013. L'avertura dal museum d'art engrondì pudess esser pussaivla il settember 2015.


Indicaziun d'ina exposiziun:
Tut ils 18 projects da la concurrenza d'architectura ch'è vegnida publitgada sin plaun internaziunal vegnan exponids publicamain dals 3 fin ils 29 d'avrigl 2012 en il museum d'art dal Grischun a Cuira. L'entrada a l'exposiziun dals projects è libra. Il rapport da la giuria po ultra da quai vegnir consultà e chargià giu da la pagina d'internet da l'uffizi da construcziun auta dal Grischun sin www.hochbauamt.gr.ch.


Infurmaziuns:
- cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01
- Markus Dünner, manader da l'uffizi da construcziun auta dal Grischun, tel. 081 257 36 31
- Stephan Kunz, directur dal museum d'art dal Grischun, tel. 081 257 28 68


Gremi: regenza
Funtauna: rg chanzlia chantunala dal Grischun