Empè da contribuziuns linearas da salarisaziun, ina indemnisaziun moderna da las prestaziuns: La regenza grischuna ha deliberà la missiva per la revisiun totala da la lescha chantunala davart il guaud per mauns dal cussegl grond.

La finamira principala da la revisiun totala da la lescha chantunala davart il guaud è quella da simplifitgar las structuras en il sectur da l'organisaziun forestala. I duain vegnir dads impuls per furmar reviers e manaschis forestals pli gronds. Per quest intent vegn substituida la pratica vertenta da subvenziun en furma da contribuziuns linearas da salarisaziun tras ina cunvegna moderna da prestaziuns che vegn fatga cun las instituziuns ch'èn responsablas per ils reviers. Quai eliminescha in element che impediva la furmaziun da reviers forestals pli gronds. Tenor il dretg vertent vegn concedida – a chaschun da la fusiun da plirs reviers – la contribuziun chantunala mo ad ina selvicultura u ad in selvicultur, er sch'igl èn necessaris pliras selviculturas u plirs selviculturs per tgirar il nov revier pli grond.

L'indemnisaziun da las prestaziuns sa cumpona d'ina contribuziun da basa e d'ina indemnisaziun orientada a la prestaziun. La contribuziun da basa vegn ad indemnisar – en la furma d'ina pauschala dependenta da la surfatscha – ils custs fundamentals per las prestaziuns obligatoricas. Ils custs fundamentals cumpiglian las prestaziuns che vegnan prescrittas da la lescha sco per exempel la tgira e la cultivaziun persistenta dal guaud da protecziun ubain las incumbensas da controlla e da surveglianza en il guaud. La contribuziun da prestaziun sa basa percunter sin la quantitad da laina che vegn effectivamain tagliada per onn en in revier sco er sin la tgira dal guaud giuven. Ulteriuras prestaziuns ch'èn vegnidas fixadas cun l'uffizi da guaud e privels da la natira pon esser en spezial incumbensas en connex cun ils privels da la natira. Questas incumbensas vegnan indemnisadas supplementarmain. Las contribuziuns chantunalas a favur da l'economia forestala na vegnan betg sbassadas, mabain impundidas en moda bler pli efficazia.

La revisiun simplifitgescha plinavant proceduras, particularmain las proceduras da runcada, da determinaziun dal guaud e d'approvaziun da projects. La finala cuntanschan ins – cun resumar en in relasch la lescha chantunala davart il guaud e l'ordinaziun dal cussegl grond appartegnenta – ina preschentaziun pli survesaivla da la legislaziun forestala chantunala.

Il cussegl grond vegn a tractar la revisiun totala da la lescha chantunala davart il guaud en la sessiun da zercladur 2012.


Infurmaziuns:
- cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01
- Reto Hefti, selvicultur chantunal, telefon 081 257 38 51


Gremi: regenza
Funtauna: rg chanzlia chantunala dal Grischun