La cumissiun per economia e taxas (CET) dal cussegl grond ha tractà intensivamain la nova missiva tar la lescha davart las taxas turisticas (LTT) en trais sesidas ed ha formulà sias propostas per la discussiun en il cussegl grond durant la sessiun d’avrigl 2012. Ella propona intginas midadas che duain procurar che la lescha chattia ina maioritad politica. Per quest intent èn vegnids resguardads per gronda part er ils giavischs da differentas regiuns turisticas.

Il fanadur 2011 aveva la CET concludì d'acceptar la missiva da la regenza tar la LTT e da returnar la missiva a la regenza per che quella la possia repassar. Alura è vegnida elavurada ina nova missiva e deliberada da la regenza grischuna la fin da december 2011. Ils mais da schaner fin mars 2012 ha la CET tractà intensivamain la LTT durant trais sesidas d'in entir di. La maioritad da las commembras e dals commembers da la CET vuless midar il sistem pertutgant la finanziaziun turistica da basa en il Grischun. En intginas dumondas da detagl divergeschan dentant las ideas. Quai sa mussa en las propostas da minoritad.

Ina midada centrala en cumparegliaziun cun la missiva da la regenza è la nova cumpetenza da las vischnancas d'adattar las tariffas da taxa. Entaifer ina libertad d'agir che vegn fixada en la lescha duain las vischnancas pudair adattar singulas tariffas da taxa da las persunas obligadas da pajar taxas. In termin transitoric cleramain pli lung da 5 onns a partir da l'entrada en vigur da la lescha duai plinavant conceder a las vischnancas che incassan gia oz taxas da cura e taxas per promover il turissem e che genereschan pia avunda meds finanzials, dapli temp per midar il sistem.

Il cussegl grond vegn er a s'occupar da differentas propostas da la CET, sco per exempel da permetter a vischnancas da mantegnair lur finanziaziun vertenta ubain da graduar ulteriuramain las tariffas per fracziuns da la vischnanca. I dat percunter er propostas che vulan plitost restrenscher la libertad d'agir da las vischnancas, uschia sco ch'igl era previs en l'emprima missiva da la regenza dal zercladur 2011. En quest connex sa tracti en spezial da la dumonda, sch'ina vischnanca duaja – cun agid d'ina reducziun cumpletta e cumpensond ils meds finanzials ch'èn necessaris per il turissem cun retgavs da taglia ordinaris – pudair desister d'incassar la taxa turistica.

La CET è persvadida che la basa per ina discussiun materiala en il cussegl grond saja dada e che las propostas cuntegnian ina lescha che chatta ina maioritad politica. L'introducziun d'ina taxa turistica en il Grischun permettess a lunga vista da furmar cun success destinaziuns e creass la basa per rinforzar ulteriuramain il turissem grischun.

Il cussegl grond vegn a tractar la lescha davart las taxas turisticas en la sessiun d'avrigl 2012.


Infurmaziuns:
president da la cumissiun Heinz Dudli, tel. 079 248 46 47


Gremi: cumissiun per economia e taxas
Funtauna: rg cumissiun per economia e taxas