La plazza aviatica regiunala da Samedan duai esser en il futur en proprietad dal maun public. Cun questa structura organisatorica po la cundecisiun regiunala vegnir rinforzada. Ultra da quai po in svilup persistent da la plazza aviatica vegnir garantì. Ad in'occurrenza d'infurmaziun da represchentants dal turissem, da l'economia, da la politica e da l'ambient ha cusseglier guvernativ Mario Cavigelli punctuà l'impurtanza da la plazza aviatica sco stabiliment da traffic impurtant e sco motor central per l'economia da la regiun e dal chantun.

Dapi la stad 2010 s'occupa ina gruppa directiva, da la quala fan part represchentants dal circul d'Engiadin'ota, da las vischnancas da l'Engiadin'ota, da l'organisaziun turistica Engiadina San Murezzan, da la Engadin Airport SA, dal chantun Grischun e d'experts da l'aviatica cun il futur da la plazza aviatica regiunala da Samedan. Questa gruppa è sa cunvegnida la primavaira 2011 ad in model organisatoric. L'infrastructura e la gestiun da la plazza aviatica duain vegnir separadas. L'infrastructura duai en il futur esser en proprietad dal maun public (circul d'Engiadin'ota). Quest model garantescha ch'ils dretgs da cundecisiun da la regiun en dumondas da la gestiun vegnan rinforzads e che la regiun po influenzar pli fitg il svilup giavischà da la plazza aviatica.

La nova basa legala e contractuala vegn suttamessa al pievel
En vista a la debatta vegninta en il cussegl cirquital ed en vista a la votaziun dal pievel en l'Engiadin'ota è vegnida elavurada ils ultims mais la basa legala e contractuala ch'è necessaria per organisar da nov la plazza aviatica. Ultra da quai èn vegnids fatgs scleriments pli detagliads davart l'impurtanza da la plazza aviatica per l'economia da la regiun sco er davart ses svilup persistent. Cun quest project duain vegnir pussibilitadas – ultra da la fundaziun d'ina societad d'infrastructura da dretg public – las investiziuns ch'èn urgentamain necessarias per in manaschi aviatic segir, persistent, stabil a lunga vista e confurm als basegns. Al gestiunari da la plazza aviatica ed a las interpresas domiciliadas sin ses areal duai la structura organisatorica previsa porscher il medem mument dapli segirezza en connex cun l'utilisaziun sco er en connex cun la planisaziun.

La plazza aviatica regiunala sco motor central per l'economia da l'Engiadin'ota
Ad in'occurrenza da forum èn las basas elavuradas vegnidas preschentadas ultimamain a represchentants dal turissem, da l'economia, da la politica e da l'ambient. Sin invitaziun da la gruppa directiva da la plazza aviatica da Samedan han var 60 participantas e participants pudì far lur dumondas davart il project e formular lur propostas interessantas. Il resun sin ils sbozs da la gruppa directiva davart il futur da la plazza aviatica regiunala è da princip stà positiv – la finamira saja in cler gea da las votantas e dals votants per la plazza aviatica regiunala l'atun. En vista a l'approvaziun necessaria dal cussegl grond sa giavischa er cusseglier guvernativ Cavigelli in cler segn da las votantas e dals votants da l'Engiadin'ota. El ha suttastritgà l'impurtanza da la plazza aviatica da Samedan per la regiun e per tut il chantun. La plazza aviatica regiunala saja in motor central per l'economia ed ina patruna impurtanta per la regiun da l'Engiadin'ota. Sco apportadra per l'hotellaria adempleschia ella ina funcziun impurtanta a favur dals servetschs turistics centrals. Il medem mument servia la plazza aviatica da Samedan a differentas interpresas d'helicopter sco basa per sgols da salvament e da transport ed augmentia uschia decisivamain la segirezza dal provediment da la regiun.

La gruppa directiva vegn a tractar ils puncts dal forum ch'èn anc averts avant che cumplettar e deliberar ils documents il cumenzament da matg per mauns dal circul d'Engiadin'ota e da la regenza. L'urari per la debatta en il circul da l'Engiadin'ota e per la votaziun dal pievel vegn alura fixà dal circul da l'Engiadin'ota. In'emprima infurmaziun publica duai – sche pussaivel – avair lieu il zercladur.


Infurmaziuns:
- cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01
- Thomas Nievergelt, president communal da Samedan, 081 851 07 10


Gremi: departament da construcziun, traffic e selvicultura
Funtauna: rg departament da construcziun, traffic e selvicultura