La regenza grischuna ha concludì d'examinar la qualitad a las scolas medias dal Grischun. Plinavant ha ella assegnà las contribuziuns da la dieschma d'alcohol e da las taxas da patenta d'alcohol. Ultra da quai è ella s'occupada da differentas fatschentas da las vischnancas.

Las scolas medias ston furnir ina cumprova da qualitad
La qualitad da la scolaziun a las scolas medias vegn examinada. Tenor il conclus da la regenza duain tut las scolas medias en il chantun Grischun avair absolvì fin la fin da l'onn 2016 ina procedura d'evaluaziun che mussa la realisaziun da las disposiziuns davart la qualitad da la scolaziun, cuntegnidas en la revisiun parziala da la lescha davart las scolas medias. La procedura d'evaluaziun duai vegnir realisada d'ina instituziun externa. In concept correspundent da la scola chantunala grischuna serva a las ulteriuras scolas sco model pussaivel. La scola chantunala a Cuira lavura per incumbensa da l'uffizi per la furmaziun media-superiura ed en vista ad in'evaluaziun externa che vegn realisada l'onn 2013 gia dapi l'onn da scola 2008/2009 vi d'in project per il svilup da la qualitad. Sco che las experientschas fatgas en il project mussan, dovri circa quatter onns per preparar e per realisar l'evaluaziun externa.

Assegnà las contribuziuns da la dieschma d'alcohol e da las taxas da patenta d'alcohol
Tenor la lescha federala davart l'alcohol va il retgav net da l'administraziun federala d'alcohol per 90 pertschient a la confederaziun e per 10 pertschient als chantuns. Ils meds finanzials da l'uschenumnada dieschma d'alcohol ston ils chantuns duvrar tenor l'intent per cumbatter l'alcoholissem, l'abus da drogas, l'abus da narcotics e l'abus da medicaments. L'onn 2012 vegnan impundids per quai en il Grischun var 627'500 francs da la dieschma d'alcohol.
Plinavant survegnan stgars 30 organisaziuns, instituziuns, uniuns, federaziuns e fundaziuns d'utilitad publica ina contribuziun or dal retgav da las taxas da patenta d'alcohol dal chantun. Totalmain vegnan pajads 500'400 francs. Tenor la lescha d'ustaria vegn il retgav net dal chantun or da la taglia dal commerzi en detagl cun bavrondas destilladas duvrà ad in terz per intents d'utilitad publica ed a dus terzs per la promoziun dal turissem.

Fixà l'utilisaziun da la collecta da la rogaziun federala 2012
Il di da la rogaziun federala vegn fatga en tut las baselgias dal chantun ina collecta per intents d'utilitad publica. Tenor il conclus da la regenza duai il retgav or da la collecta da la rogaziun federala 2012 vegnir attribuida mintgamai per in terz a la lia cunter il cancer dal Grischun, a l'associaziun dals confamigliars da persunas cun schizofrenia e cun disturbis psichics (VASK) ed a l'uniun Kidsevent.

Dal cumbat cunter la lavada da daners na dastga resultar nagin barat automatisà
En sia posiziun a la confederaziun s'exprima la regenza grischuna tar la midada da la lescha davart la lavada da daners suspectus. Tras la revisiun da la lescha duai il post d'annunzia da cas da lavada da daners suspectus survegnir la pussaivladad da metter a disposiziun ad autoritads partenarias da l'exteriur infurmaziuns concretas davart las finanzas sco numers da contos da banca, infurmaziuns davart transacziuns da daners sco er saldos da contos. Tenor la regenza grischuna sto vegnir fatg attenziun ch'i na vegnia betg introducì sin questa via il barat d'infurmaziuns automatisà. Infurmaziuns davart las finanzas dastgian vegnir barattadas mo en cas singuls e mo per cumbatter la lavada da daners.


Da vischnancas e da regiuns

• Val Müstair: La revisiun parziala da la constituziun communala da la vischnanca da Val Müstair, concludida en la votaziun a l'urna dals 11 da mars 2012, vegn approvada. En connex cun il recurs da surveglianza, inoltrà da la "Gruppa visiun rumantsch grischun en scola, Cumün da Val Müstair" cunter la vischnanca da Val Müstair constatescha la regenza che l'artitgel davart la lingua uffiziala e lingua da scola da la constituziun communala, revedì dal suveran, na cuntrafa betg al dretg surordinà. Tenor la situaziun giuridica vertenta èn las vischnancas sulettas cumpetentas da fixar la varianta rumantscha decisiva (rumantsch grischun u idiom) en las scolas publicas. Dal rest renviescha la regenza al fatg ch'il rumantsch, il tudestg ed il talian èn tenor la constituziun chantunala linguas chantunalas ed uffizialas equivalentas dal Grischun. En quest connex vegni laschà avert, tge rumantsch che vegn preferì sco lingua chantunala u uffiziala. Rumantsch grischun è, sco er ils differents idioms, cuntegnì en la noziun generala "rumantsch" e duai vegnir tgirà vinavant ensemen cun ils idioms e gidar uschia a mantegnair la diversitad linguistica. 
• Val Müstair: A la vischnanca da Val Müstair vegn garantida ina contribuziun chantunala da construcziun pauschala dad 81'600 francs per engrondir la scolina a Valchava. 
• Lantsch: La dumonda da la vischnanca da Lantsch per approvar il contract da grevezza funsila fatg cun la confederaziun svizra per il mantegniment e la gestiun d'in stabiliment naziunal da biatlon vegn approvada. Il stabiliment da biatlon planisà duai permetter da realisar concurrenzas da biatlon naziunalas ed internaziunalas sco er activitads da scolaziun e da trenament da la federaziun svizra da skis (Swiss-Ski). Il stabiliment duai ultra da quai esser avert per federaziuns, per uniuns e per la populaziun. Per garantir la destinaziun fixa a favur da la publicitad per ina durada da 10 onns è la vischnanca s'obligada – en connex cun il pajament d'ina contribuziun d'investiziun tras la confederaziun – d'inscriver en il register funsil ina grevezza funsila cun limitaziun temporara a favur da la confederaziun svizra. La grevezza funsila oblighescha il titular dal dretg da construcziun da manar e da mantegnair il stabiliment e d'al metter a disposiziun ad uniuns da sport. 
• Vuorz: A la vischnanca da Vuorz vegn garantida ina contribuziun da 113'625 francs als custs per renovar il stabiliment dal provediment d'aua da Crap Martin fin a Sumvitg (via d'Andiast), e quai cun resalva che la confederaziun sa participeschia als custs. 
• Tavau: La revisiun da la lescha da taglia da la vischnanca da Tavau dals 11 da mars 2012 vegn approvada. 
• Schluein: La revisiun totala da la planisaziun locala da la vischnanca da Schluein dals 7 d'october 2011 vegn approvada. La revisiun cuntegna ina nova lescha da construcziun sco er in repassament da tut ils plans d'utilisaziun. Plinavant ha la vischnanca relaschà ina lescha concernent l'incassament da taxas directivas per diriger la construcziun d'abitaziuns secundaras e per promover emprimas abitaziuns sco er utilisaziuns da manaschis. En il conclus d'approvaziun vegn la vischnanca incumbensada d'attribuir la palì planiva Panadeglias sco er l'aual Seglias a chaschun da la proxima revisiun da la planisaziun locala ad ina zona per la protecziun da la natira. 
• Cazas: Cun resalva d'ina contribuziun federala vegn garantida a l'otgavla etappa per engrondir la rait da vias champestras da Preaz ina contribuziun chantunala da maximalmain 150'000 francs 
• Stussavgia-Thalkirch: Cun resalva da la contribuziun federala vegn garantida als custs per renovar la via da colliaziun chantunala da Stussavgia, traject Thalkirch – Turrahus, per l'onn 2012 ina contribuziun chantunala da 297'000 francs. 
• Scuol/Tarasp: La via da Nairs (anteriura via da Tarasp) vegn abgiuditgada per il 1. da zercladur 2012 sco via chantunala da colliaziun e cedida a las vischnancas da Scuol e da Tarasp sco proprietad e per il mantegniment.

Contribuziuns chantunalas a differentas instituziuns

• Circul cultural Arosa: A trais occurrenzas musicalas dal circul cultural Arosa che han lieu la stad 2012 vegn garantida ina garanzia da deficit da totalmain 70'000 francs. 
• Festival da jazz UNCOOL: Al festival da jazz UNCOOL 2012 en il Puschlav (dals 18 fin ils 24 da zercladur) vegn prestada ina garanzia da deficit da maximalmain 60'000 francs.

Projects da vias
La regenza ha approvà 7'031'000 francs per lavurs da construcziun sin ils suandants trajects:
– via sursilvana da la vart dretga dal Rain: lavurs d'impressari, dustanza en la chavorgia da Carrera
– via sursilvana: lavurs d'impressari, Trin Mulin – Felsbach
– via sursilvana: lavurs da cuvrida, Schluein – Rueun
– via dal Güglia/da Malögia: engineering, indrizs electromecanics, sviament da Silvaplauna
– via taliana: lavurs d'impressari e da cuvrida, Sur (Valragn) – Medel (Valragn)
– via d'Engiadina: lavurs d'impressari e da cuvrida, Ardez – Scuol


Gremi: regenza
Funtauna: rg chanzlia chantunala dal Grischun