Il departament d'educaziun, cultura e protecziun da l'ambient ha nominà Giovanni Francesco Menghini sco nov tgirader da monuments dal chantun Grischun. L'atun 2012 vegn el a cumenzar cun sia lavur en la tgira da monuments dal Grischun tar l'uffizi da cultura.

Giovanni Francesco Menghini, che ha 51 onns e ch'è burgais da Puschlav, ha studegià istorgia d'art ed istorgia da l'architectura a l'universitad da Berna. Fascinà da las prelecziuns da prof. Luc Mojon davart la tgira da monuments, vesa el gia baud sia via professiunala en il sectur dal mantegniment da bains culturals. En moda equivalenta fa el ses studis e lavura da maniera pratica en l'intermediaziun d'art al museum d'art a Berna sco er en in praticum pli lung tar in restauratur da picturas muralas. Las experientschas praticas al han manà l'onn 1990 a la tgira da monuments pratica da la citad da Turitg. Ultra da sia activitad sco cussegliader da construcziun è el s'approfundà principalmain en ils temas da la fisica da construcziun e da la tecnologia da material vi d'edifizis istorics. L'onn 1996 ha Menghini midà a la tgira da monuments dal chantun Turitg. Là s'engascha el dapi lura per l'adattaziun bain ponderada dals edifizis als basegns che sa midan. Sco cuniniziant dal curs "artisanadi e tgira da monuments" ha el empruvà da dar in cunterimpuls a la problematica da la digren da las tradiziuns artisanalas. Oz è el vicemanader da la partiziun per la cussegliaziun da construcziun ed è oravant tut responsabel per projects gronds.

Giovanni Francesco Menghini vegn a cumenzar cun sia lavur sco tgirader da monuments dal chantun Grischun l'atun 2012.


Infurmaziuns:
Barbara Gabrielli, manadra da l'uffizi da cultura, tel. 081 257 48 04, e-mail: barbara.gabrielli@afk.gr.ch  


Fotografia agiuntada:

Giovanni Francesco Menghini, nov tgirader da monuments dal chantun Grischun


Gremi: departament d'educaziun, cultura e protecziun da l'ambient
Funtauna: rg uffizi da cultura