A chaschun da sia ultima sesida ha la regenza grischuna tractà differentas fatschentas da las vischnancas. Tranter auter ha ella approvà ulteriuras leschas communalas per diriger la construcziun d'abitaziuns secundaras en il Grischun. Igl è vegnì renvià a la limitaziun pervia da l'iniziativa naziunala cunter las abitaziuns secundaras.

Reglà la gestiun dal center da geodatas dal Grischun en ina cunvegna da prestaziun
En il rom d'ina cunvegna da prestaziun ha il chantun Grischun surdat la gestiun dal center da geodatas dal Grischun a la GeoGR SA. Da la societad anonima fan part per mintgamai in terz l'uniun d'inschigneras geometras e d'inschigners geometers dal Grischun (IGGR), il circul grischun da planisadras e da planisaders (CGP) ed il chantun Grischun sez. L'intent da la societad è l'installaziun e la gestiun d'in post d'intermediaziun da geodatas. Latiers tutgi da manar in portal d'internet, d'installar ina banca da metadatas e da render utilisablas las geodatas ch'èn avant maun.
La GeoGR SA è activa dapi tschintg onns ed ha investì durant quest temp – cun il sustegn dals uffizis chantunals – bler know-how en l'installaziun da l'infrastructura. Ozendi vegnan las geodatas rendidas accessiblas a tut las persunas interessadas sur in center da geodatas en l'internet. Questa purschida vegn duvrada regularmain (www.geogr.ch).

Il rempar da lavinas en la Valle di Lei vegn renovà
Al project "Rempar da lavinas en la Valle di Lei" ch'è vegnì inoltrà da l'uffizi da guaud e privels da la natira per incumbensa da las Ovras electricas dal Rain posteriur SA vegn garantida ina contribuziun chantunala da maximalmain 855'000 francs.
En il rom da las lavurs da projectaziun per renovar cumplettamain ils indrizs da las Ovras electricas dal Rain posteriur SA è er il rempar da lavinas temporar existent dals onns 1950 vegnì examinà. En quest connex èsi vegnì constatà ch'el è donnegià fermamain e che sia efficacitad è limitada. Las lavurs vi da l'ovra electrica ston però vegnir cuntinuadas l'enviern. Per il persunal dal plazzal exista pia durant l'enviern in deficit da protecziun considerabel. Perquai han las Ovras electricas dal Rain posteriur SA dumandà l'uffizi chantunal da guaud e privels da la natira d'elavurar in project da reparaziun forestal per il rempar da lavinas temporar. Quest project è ussa vegnì approvà da la regenza.


Da vischnancas e da regiuns

• Tavau: La revisiun parziala da la planisaziun locala ch'è vegnida concludida da la vischnanca da Tavau ils 13 da zercladur 2010 e che cumpiglia in supplement tar la lescha da construcziun, vegn approvada cun midadas. Il supplement tar la lescha da construcziun cumpiglia disposiziuns per reglamentar e per regular la construcziun d'abitaziuns secundaras cun agid d'ina contingentaziun e d'ina taxa directiva. Sin conclus da la regenza vegn il contingent annual per construir abitaziuns secundaras en la vischnanca da Tavau fixà a maximalmain 4'000 meters quadrat. Questa valur reducida vala a partir da mez da l'onn 2013. La vischnanca aveva previs en ses project ina valur da 6'500 meters quadrat per onn.
• Laax: La revisiun totala da la planisaziun locala, concludida da la vischnanca da Laax ils 4 da november 2011, vegn approvada cun resalvas. La revisiun totala cuntegna ina nova lescha da construcziun sco er adattaziuns e repassaments da tut ils plans d'utilisaziun da la vischnanca. Ultra da quai cuntegna la revisiun totala ina lescha davart restrenscher e diriger la construcziun d'abitaziuns secundaras e per promover emprimas abitaziuns e l'utilisaziun administrada.
• Arosa: La lescha davart la contingentaziun d'abitaziuns secundaras e davart l'incassament d'ina taxa directiva che la vischnanca dad Arosa ha concludì ils 23 d'october 2011 en il rom d'ina revisiun parziala da la planisaziun locala vegn approvada.
• Scuol: La revisiun parziala da la planisaziun locala da la vischnanca da Scuol dals 27 da november 2011, che cumpiglia in plan da zonas 1:1000 "Engrondiment da l'ospital Engiadina bassa", vegn approvada. Il medem mument vegn concedida la permissiun per la runcada permanenta d'areal da guaud per realisar in engrondiment da l'ospital da l'Engiadina bassa.
• Mustér: Al project "Rempars cunter crudada da crappa Ruinas" ch'è vegnì inoltrà da l'uffizi da guaud e privels da la natira per incumbensa da la vischnanca da Mustér vegn garantida ina contribuziun totala da maximalmain 546'000 francs.
• Bregaglia: A la colliaziun per aua persa da la fracziun da Casaccia da la vischnanca da Bregaglia, traject Casaccia fin Pranzaira, vegn concedida – sut tschertas cundiziuns – ina contribuziun da maximalmain 289'002 francs.
• Cauco: Al Comune Parrocchiale Sta. Domenica vegn pajada ina contribuziun da maximalmain 114'000 francs or dal fond per agid d'urgenza da la cassa per donns elementars dal Grischun per il donn vi da la baselgia da Sta. Domenica ch'è vegnì chaschunà d'in bulieu.
• Flearda: La revisiun parziala da la constituziun communala da la vischnanca da Flearda dals 30 da mars 2012 vegn approvada. Cun questa revisiun parziala vegn tranter auter introducì il dretg da votar e d'eleger per persunas estras sin plaun communal.
• Spleia: Als custs supplementars per render accessibla l'Alp Tambo vegn – cun resalva d'ina contribuziun federala – garantida ina contribuziun chantunala da maximalmain 15'206 francs.
• Federaziun da pumpiers dal Partenz central: La revisiun parziala dals statuts dals "Pumpiers dal Partenz central" (nov "Basa da pumpiers dal Partenz central") vegn approvada.

Projects da vias
La regenza ha approvà 965'000 francs per lavurs da construcziun sin il suandant traject:
- via da Brün: lavurs da cuvrida, Zalfeis – Chrüz


Gremi: regenza
Funtauna: rg chanzlia chantunala dal Grischun