La regenza grischuna propona al cussegl grond da recumandar al pievel da refusar l'iniziativa chantunala dal pievel "Fermas vischnancas – in ferm chantun", ed ella propona er da desister d'ina cuntraproposta. L'iniziativa cuntrafa a las decisiuns strategicas concludidas en il rom da la refurma da vischnancas. Areguard la refurma dal territori vegni tegnì quint dals interess da l'iniziativa en il project ch'è vegnì suttamess en il fratemp al cussegl grond.

Ils 10 da matg 2011 è l'iniziativa chantunala dal pievel "Fermas vischnancas – in ferm chantun" vegnida inoltrada cun 4'084 suttascripziuns valaivlas a la chanzlia chantunala dal Grischun. L'iniziativa en furma d'ina proposta generala pretenda "ch'il chantun survegn ina structura adattada per il futur cun ina repartiziun raschunaivla da las incumbensas. Per quest intent dovri ina refurma territoriala cumplessiva che resguarda ils suandants princips:

• Il chantun è dividì en trais stgalims: il chantun, in plaun intermediar e las vischnancas. Las incumbensas dal maun public vegnan da princip attribuidas a quests trais stgalims. 
• Il dumber da 50 vischnancas na duai betg vegnir surpassà per bler. 
• La refurma territoriala duai s'orientar, nua che quai è pussaivel e raschunaivel, a las structuras existentas. Las particularitads topograficas, linguisticas e culturalas ston vegnir resguardadas. 
• Il pli tard in onn suenter ch'il pievel grischun ha approvà l'iniziativa suttametta la regenza in messadi correspundent al cussegl grond."

Promover, betg prescriver fusiuns da vischnancas
Las finamiras da l'iniziativa dal pievel e las finamiras da la politica chantunala n'èn betg fitg differentas: lur intent cuminaivel è quel da simplifitgar cleramain las structuras territorialas existentas en il chantun e da las restrenscher a trais plauns (chantun, plaun intermediar e vischnancas). En la sessiun da favrer 2011 ha il cussegl grond dal Grischun acceptà ina nova orientaziun da las structuras. Dapi lura vegn quella realisada sin plaun communal cun agid d'ina refurma da vischnancas e sin plaun regiunal cun agid d'ina refurma dal territori.

Areguard la refurma da vischnancas han la regenza ed il cussegl grond dentant in'autra idea che l'iniziativa: Fusiuns da vischnancas na duain betg vegnir concludidas da surengiu (princip da "top down"), mabain crescher en moda natirala da sutensi, resguardond il dretg d'autodeterminaziun da las vischnancas (princip da "bottom up"). En questa moda duai il dumber da vischnancas vegnir reducì – sco concludì dal cussegl grond – fin l'onn 2020 a 50 fin 100, a lunga vista a main che 50 vischnancas. Ils numerus projects da fusiun currents en il chantun conferman ch'il princip da "bottom up" è la dretga via.

La refurma dal territori tegna quint dals interess
Areguard ina refurma dal plaun statal intermediar poi vegnir constatà che la refurma dal territori introducida realisescha gia l'iniziativa en quest sectur. En sia missiva al cussegl grond propona la regenza – en il rom da las prescripziuns dal cussegl grond e resguardond tant ils aspects d'in adempliment optimal da las incumbensas sco er ponderaziuns politicas – da stgaffir 11 regiuns che duain s'orientar essenzialmain vi da la divisiun dals districts actuals. Il cussegl grond vegn a tractar la refurma dal territori en la sessiun da zercladur 2012, uschia ch'il pievel grischun po decider anc quest onn davart ina revisiun parziala correspundenta da la constituziun chantunala. Premess che la refurma dal territori vegn approvada, è l'iniziativa pia per part gia antiquada.

En vista a las decisiuns cleras, concludidas dal cussegl grond, desista la regenza d'ina cuntraproposta a l'iniziativa. Ella fa vinavant tut il pussaivel per reducir consequentamain obstachels e per crear impuls a favur da fusiuns da vischnancas. Betg sco ultim ha ella adattà l'instrumentari da promoziun da fusiuns en quel senn che fusiuns pli grondas (cun dapli vischnancas e cun dapli abitantas ed abitants) pon profitar d'ina promoziun finanziala pli gronda che fusiuns pli pitschnas. La regenza è persvadida che la via tschernida cun la refurma da vischnancas e dal territori è la via che maina al success.

Planisada per la sessiun da december
Il cussegl grond vegn a tractar l'iniziativa dal pievel "Fermas vischnancas – in ferm chantun" en la sessiun da december 2012, suenter la votaziun dal pievel davart la refurma dal territori che ha probablamain lieu il settember 2012. Pervia da la disposiziun legala, tenor la quala la regenza sto suttametter al cussegl grond iniziativas reussidas entaifer in onn dapi l'inoltraziun, ha la regenza gia deliberà la missiva cun il conclus dals 8 da matg 2012.


Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01


Gremi: regenza
Funtauna: rg chanzlia chantunala dal Grischun