Cun il "Prix Velo Infrastructura" undrescha la Pro velo Svizra per la quarta giada projects d'infrastructura decisivs per ciclistas e ciclists. Inoltrads èn vegnids 20 projects da tut la Svizra. L'uffizi da construcziun bassa survegn in premi da renconuschientscha per la via da velos Fideris – Dalvazza ch'è vegnida construida l'onn passà.

Questa saira ha lieu la surdada dal premi a Soloturn, nua ch'ina represchentanza da l'uffizi da construcziun bassa e dal Partenz pon prender encunter il premi da renconuschientscha per la nova via da velos Fideris – Dalvazza. Las fasas da planisaziun e da construcziun che han chaschunà blera lavur dastgan uschia – suenter l'inauguraziun l'onn 2011 – vegnir terminadas cun in ulteriur punct culminant. Il premi principal vegn surdà a la citad da Basilea per ina punt d'atschal e da betun da 55 meters per pedunas e peduns sco er per velos che fa la colliaziun cun in grond center da cumpra. In ulteriur premi da renconuschientscha survegn la citad da Bienna per ses sistem da duvrar cuminaivlamain velos en tut la citad.

Explorar il Partenz cun il velo davent dal traffic
Il trassé signalisà da la via da velos 21 en il Partenz, che manava tranter Dalvazza e Jenaz sur Strahlegg, n'era pervia da sia pendenza betg fitg attractiv per la gronda part da las ciclistas e dals ciclists, uschia ch'ellas ed els han savens tschernì la via naziunala giu en il fund da la val cun sias stortas stretgas e nunsurvesaivlas. Quai muntava per tut las participantas ed ils participants da traffic ina ristga considerabla, perquai che la via dal Partenz è ina da las vias las pli frequentadas dal Grischun. Grazia al nov trassé da 3,6 kilometers cun sias differentas construcziuns artifizialas pon ins ussa ir praticamain tras tut il Partenz davent dal traffic per lung da la cuntrada fitg bella da la Landquart. Ils blers resuns positivs da las ciclistas e dals ciclists ed er il premi da renconuschientscha da quest onn da la Pro velo Svizra mussan ch'igl è gartegià a l'uffizi da construcziun bassa, als inschigners incumbensads ed a las interpresas involvidas da realisar in'ovra che persvada dal tuttafatg.

In emprim studi per separar il traffic betg motorisà dal traffic motorisà è vegnì inizià da la corporaziun regiunala Pro Partenz. L'uffizi da construcziun bassa dal Grischun ha alura laschà elavurar il project da construcziun definitiv ed ha er garantì la finanziaziun. Als custs da var 4,5 milliuns francs ha la confederaziun contribuì en moda engraziaivla 3 milliuns francs.


Infurmaziuns:
Peter Stirnimann, responsabel per las medias da l'uffizi da construcziun bassa dal Grischun, 081 257 37 11 / 079 291 72 75


Legenda:
La via da velos senza cruschadas tranter la via dal Partenz, la Landquart ed il trassé da la Viafier retica


Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun