La cumissiun predeliberanta dal cussegl grond è sa fatschentada cun la missiva da la regenza davart l'engrondiment architectonic dal museum d'art dal Grischun. Ella recumonda al cussegl grond d'acceptar il project.

En la sessiun da zercladur 2012 vegn il cussegl grond a decider tranter auter davart il credit d'impegn per l'engrondiment architectonic dal museum d'art dal Grischun dad 8,5 milliuns francs. Sut la batgetta dal deputà Hans Geisseler ed en preschientscha dal cusseglier guvernativ Mario Cavigelli e d'ulteriurs represchentants da l'administraziun chantunala ha la cumissiun predeliberanta dal cussegl grond tractà la missiva correspundenta da la regenza.

Basegn cumprovà
A chaschun da la sesida che ha gì lieu en il uschenumnà "Sulserbau" è la cumissiun pudì sa persvader da la necessitad d'engrondir il museum d'art dal Grischun. Gia l'onn 1976 èsi vegnì constatà en la concepziun chantunala da museums ch'il basegn da spazi dal museum d'art dal Grischun fiss atgnamain 3800 meters quadrat, ma ch'i stattan a disposiziun mo 1900 meters quadrat. L'engrondiment architectonic che la regenza propona permettess da stgaffir ulteriurs 2700 meters quadrat surfatscha d'exposiziun. Quai cuvriss cumplainamain il basegn actual da 4600 meters quadrat.

Credit d'impegn dad 8,5 milliuns francs
La realisaziun da l'engrondiment architectonic dal museum d'art dal Grischun ha tenor la missiva ina limita maximala dals custs da 28,5 milliuns francs. Grazia ad ina donaziun generusa da 20 milliuns francs sto il chantun Grischun surpigliar anc 8,5 milliuns francs ch'èn perquai er l'object da la missiva qua avant maun. Suenter ina discussiun detagliada sco er suenter ina inspecziun dals projects ch'èn entrads en il rom da la concurrenza è la cumissiun predeliberanta dal cussegl grond vegnida unanimamain a la conclusiun da recumandar al cussegl grond da conceder il credit d'impegn. Uschia vegni garantì ch'il museum d'art dal Grischun possia valair – grazia ad ina infrastructura moderna ed adequata – er en il futur sco center da cumpetenza per l'art figurativ en il Grischun e dal Grischun.

I resta anc da menziunar che la missiva da la regenza na cuntegna nagin project d'execuziun concret, mabain mo in studi da realisabladad. Tge project che vegn la finala realisà cun ils 28,5 milliuns francs che stattan a disposiziun è chaussa da la concurrenza da projects gia menziunada ed actualmain er chaussa d'ina procedura giudiziala. Quai n'ha dentant nagina influenza sin questa fatschenta e sin la concessiun dal credit d'impegn.


Infurmaziuns:
president da la cumissiun Hans Geisseler, tel. 079 798 26 69


Gremi: cumissiun predeliberanta per l'engrondiment architectonic dal museum d'art dal Grischun a Cuira
Funtauna: rg cumissiun predeliberanta per l'engrondiment architectonic dal museum d'art dal Grischun a Cuira