Cun la revisiun parziala da la lescha da taglia vegnan fatgas numerusas adattaziuns al dretg federal. Ultra da quai duai vegnir creada la basa giuridica per introducir il traffic da datas sin via electronica tranter il pajataglia e las autoritads da taglia. In'ulteriura finamira da la revisiun è quella da mantegnair l'attractivitad dal Grischun sco lieu economic.

Cun ina politica consequenta ha il chantun Grischun meglierà considerablamain las cundiziuns da basa fiscalas dal Grischun sco lieu economic e manà il chantun en ina buna posiziun en cumparegliaziun interchantunala, e quai senza avair intensivà la concurrenza fiscala tranter ils chantuns. Per pudair garantir er en il futur questas premissas a favur dal Grischun sco lieu vital d'interpresas, duai vegnir abolida – cun la missiva ch'è vegnida deliberada da la regenza tar la revisiun parziala da la lescha da taglia – la differenza da 10 puncts procentuals ch'è permessa maximalmain tranter ils pes da taglia da las persunas natiralas e da las persunas giuridicas. Il cussegl grond survegn uschia la pussaivladad da reagir en cas da basegn svelt ed en moda effizienta sin las relaziuns che sa midan.

Ils gudogns da lottarias fin a 1000 francs èn libers da taglia
Cun la revisiun parziala vegnan fatgas differentas adattaziuns al dretg federal ed i vegn resguardada la giurisdicziun dal tribunal federal la pli nova. Sco che quai è il cas gia dapi daditg en il chantun Grischun, è il sold dals pumpiers da milissa ussa liber da taglia er tenor il dretg federal. Il dretg federal prescriva als chantuns da limitar l'import dal sold liber da taglia. Sco tar la confederaziun duai questa limita vegnir fixada er per il chantun Grischun sin 5000 francs. Ulteriuras adattaziuns al dretg federal pertutgan particularmain la taxaziun da las participaziuns dals collavuraturs, la taxaziun dals gudogns da lottarias, che vegnan ad esser en il futur libers da taglia fin ad in import da 1000 francs, sco er la taxaziun tenor las expensas. La taxaziun tenor las expensas è tenor l'avis da la regenza da gronda impurtanza per il chantun Grischun e sto vegnir mantegnida en mintga cas.

Areguard in'unificaziun da las taglias sin l'ierta chantunala e communala vegni spetgà il svilup sin plaun federal.

Traffic da datas sin via electronica
Gia dapi ditg po la decleraziun da taglia vegnir emplenida ora al computer a chasa. Var 75 pertschient da las decleraziuns da taglia vegnan fatgas oz sin via electronica. En in proxim pass duai er vegnir permess d'inoltrar la decleraziun da taglia sin via electronica sco er da consegnar il quint e la decisiun da taxaziun sin via electronica. Cun questa revisiun parziala duai vegnir stgaffida la basa giuridica necessaria per quai.

Il cussegl grond vegn a tractar la fatschenta en la sessiun d'avust 2012.


Infurmaziuns:
- presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01
- Toni Hess, manader dal servetsch giuridic tar l'administraziun da taglia, tel. 081 257 33 26


Gremi: regenza
Funtauna: rg chanzlia chantunala dal Grischun