La regenza ha laschà elavurar in rapport davart la politica d'electricitad dal chantun Grischun e deliberà quel per mauns dal cussegl grond. Quest rapport mussa che la politica vertenta en il sectur da l'electricitad è sa cumprovada da princip. Sin basa da quai èn vegnidas actualisadas e formuladas da nov las finamiras da la politica d'energia che tegnan quint dals conturns ch'èn sa midads.

En il rapport davart la politica d'electricitad dal chantun Grischun vegnan mussads las midadas ch'igl ha dà sco er ils potenzials e las pussaivladads d'agir en il sectur da l'electricitad. Sin basa da quai èn vegnidas actualisadas e formuladas da nov las finamiras da la politica d'energia. Quest rapport mussa però er che la politica vertenta en il sectur da l'electricitad è sa cumprovada da princip.

La finamira dal rapport è quella da furnir al cussegl grond ina vasta basa da discussiun per definir la politica d'electricitad futura. La preschentaziun duai però er gidar a furmar en moda pli vasta la conscienza concernent quest sectur ch'è impurtant per l'economia publica dal Grischun e furnir ina basa per rinforzar il Grischun en il sectur da l'electricitad.

La forza idraulica sco punct central da la politica d'electricitad dal Grischun
La forza idraulica che ha – tant or dal puntg da vista quatitativ sco er or dal puntg da vista da l'economia publica – ina impurtanza enorma per la producziun d'electricitad en il Grischun vegn tractada pli detagliadamain en il rapport. Las finamiras da la regenza prevesan da rinforzar anc pli fitg questa impurtanza. Uschia duai la producziun d'electricitad da las ovras idraulicas grondas vegnir augmentada per 860 GWh per onn ed il chantun duai – cur ch'el dat concessiuns e coordinescha quai cun las vischnancas – far valair sche pussaivel ses dretg da participaziun.

Las participaziuns dal chantun a la Repower SA ed a la Grischelectra SA duain – tenor l'opiniun da la regenza – vegnir mantegnidas er en il futur. Ultra da quai duai il chantun però er restar avert per novs partenadis e per novs instruments.

Contribuziun a la vieuta energetica federala
Sper la forza idraulica duai er vegnir augmentada la producziun d'electricitad cun las novas energias regenerablas e cun ovras idraulicas pitschnas (< 10 MW) per 600 GWh per onn. Ultra da quai survegnan mesiras d'effizienza en il sectur da l'electricitad ina impurtanza pli gronda en il futur per ch'il consum d'electricitad possia vegnir stabilisà a lunga vista en il Grischun. Cun finamiras ambiziusas en il sectur da l'effizienza e cun sias finamiras per engrondir la forza idraulica e per las energias regenerablas novas contribuescha il Grischun ina part essenziala a la vieuta energetica ch'è previsa da la confederaziun per l'onn 2050.

In provediment d'electricitad segir cun ina quantitad suffizienta d'electricitad en la qualitad necessaria resta in fatg central per ils basegns da la societad e da l'economia. En il sectur da la rait da transport e da distribuziun duai il dumber dals gestiunaris vegnir reducì considerablamain.

Soluziuns fatgas sin mesira per il return dals implants
En connex cun il return dals implants a la concedanta duain vegnir tschertgadas – resguardond mintgamai las relaziuns concretas dal cas singul – soluziuns optimalas e fatgas sin mesira. En quest connex duain las vischnancas ed il chantun far valair en moda coordinada lur dretg d'exequir il dretg da return dals implants per augmentar la valurisaziun che deriva da la forza idraulica. Ils partenadis cun las societads d'ovras electricas èn sa cumprovads e duain perquai vegnir mantegnids. La finala duai il profil da scadenza da las ovras electricas che returnan a las concedantas vegnir gulivà cun favurisar novs concessiunaments anticipads.

Il cussegl grond vegn a tractar il rapport davart la politica d'electricitad dal chantun Grischun en la sessiun d'avust 2012.


Agiuntas:
- Finamiras da la politica d'energia
- Rapport davart la politica d'electricitad dal chantun Grischun


Infurmaziuns:
- cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01
- Erich Büsser, manader da l'uffizi d'energia e da traffic, tel. 081 257 36 21


Gremi: regenza
Funtauna: rg chanzlia chantunala dal Grischun