La planisaziun grischuna dals ospitals vegn fixada da nov sin il stgalim da la lescha, e quai tenor las prescripziuns federalas che s'orienteschan a la prestaziun: La regenza grischuna suttametta al cussegl grond ina legislaziun executiva correspundenta.

Per il 1. da schaner 2013 duai il chantun Grischun pudair ademplir las novas disposiziuns federalas concernent ina planisaziun dals ospitals che s'orientescha a la prestaziun e concernent in provediment medical da la populaziun che correspunda als basegns. Suenter che la consultaziun è terminada, suttametta la regenza grischuna al cussegl grond ina revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira (lescha per promover la tgira da persunas malsaunas). Il cussegl grond vegn a tractar la fatschenta en la sessiun d'avust 2012.

Rentabilitad e qualitad sco criteris centrals
Il project prevesa in nov chapitel davart la planisaziun dals ospitals e davart la glista dals ospitals en la lescha per promover la tgira da persunas malsaunas. La planisaziun dals ospitals è l'instrument strategic da la regenza, cun il qual ella eruescha e determinescha periodicamain tant il basegn da prestaziuns sco er la purschida necessaria per il provediment medical da la populaziun. Sin basa da la planisaziun dals ospitals relascha la regenza ina glista dals ospitals che cuntegna ils furniturs da prestaziuns, pia ils ospitals e las clinicas, sco er lur incarica da prestaziun.

Tenor il dretg federal ston vegnir resguardadas en spezial la rentabilitad e la qualitad da las prestaziuns furnidas per giuditgar e per tscherner la purschida che duai vegnir garantida sin la glista dals ospitals. La planisaziun e la glista dals ospitals dal chantun – che sa referivan fin ussa al dumber da letgs – vegnan remplazzadas per quest intent tras ina planisaziun e tras ina glista che s'orienteschan a la prestaziun. Per promover lur cumpetitivitad pon – tenor la nova lescha per promover la tgira da persunas malsaunas – dentant er vegnir surdadas als ospitals grischuns incaricas da prestaziun che surpassan il basegn. Plinavant pon ils ospitals en il chantun vegnir obligads da furnir tschertas prestaziuns, sche quai è necessari per il provediment da la sanadad. La lescha prevesa sancziuns, en cas che las disposiziuns na vegnan betg observadas.

Sper ils criteris da la rentabilitad e da la qualitad fa la lescha ulteriuras pretensiuns envers ils ospitals. Quellas èn la cundiziun per survegnir ina incarica da prestaziun. Uschia po la surdada d'incaricas da prestaziun per exempel vegnir fatga dependenta da dumbers minimals da cas, sche lur influenzas sin la qualitad dals resultats èn vegnidas renconuschidas scientificamain.

Il provediment da basa decentral resta mantegnì
Las purschidas decentralas existentas dal provediment medical da basa en il chantun vegnan ad esser necessarias er en l'avegnir. Quai mo gia per ch'il provediment en cas d'urgenza possia vegnir garantì a temp. Prestaziuns raras u cumplexas, che pretendan ina infrastructura fitg chara ubain enconuschientschas ed abilitads spezialisadas, vegnan dentant concentradas tras la nova legislaziun. Il resultat duai la finala esser ina planisaziun ed ina glista dals ospitals che tegnan quint da las pazientas e dals pazients, che mettan a disposiziun a la populaziun dal chantun ina purschida adequata e che pussibiliteschan ina concurrenza reglada tranter ils purschiders.


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun