La regenza grischuna ha incumbensà la gruppa Dock SA a Son Gagl d'installar ina firma sociala per persunas ch'èn dischoccupadas durant in temp pli lung e che na chattan nagina plazza sin l'emprim martgà da lavur. La firma dal Grischun vegn a cumenzar cun sia lavur l'atun 2012. Ella vegn ad avair sia sedia a la St. Margrethenstrasse a Cuira. Questa purschida cumplettescha la purschida da promoziun existenta per persunas che han paucas schanzas sin il martgà da lavur.

L'atun 2010 ha ina gruppa da project analisà las purschidas existentas per persunas dischoccupadas da lunga durada en il Grischun. Quellas èn savens dependentas da prestaziuns da l'assicuranza cunter la dischoccupaziun, da l'assicuranza d'invaliditad e/u da l'agid social. Da l'analisa è resultà ch'i mancan purschidas d'occupaziun e purschidas che garanteschan ina structura dal di sin il martgà da lavur cunzunt per persunas ch'èn dependentas da l'agid social. La planisaziun s'orientescha ad ina purschida da 100 plazzas en ina firma sociala. L'uffizi per industria, mastergn e lavur e l'institut d'assicuranza sociala dal chantun Grischun (resp. l'uffizi da la AI) inditgeschan lur basegn cun mintgamai diesch plazzas annualas per occupar, per sclerir la professiun e per qualifitgar lur clientella. Il pli grond basegn resulta tar la clientella da l'agid social (80 plazzas annualas) che na chatta betg ina plazza sin l'emprim martgà da lavur, malgrà pliras emprovas d'intermediaziun, e ch'è privada dal dretg da schurnada.

La gruppa Dock SA
La gruppa Dock SA è ina firma sociala manada sco ina interpresa en il sectur da l'integraziun en il mund da lavur per persunas dischoccupadas da lunga durada e per persunas ch'èn privadas dal dretg da schurnada en Svizra. La gruppa ha ina experientscha da 15 onns. Ella operescha sco interpresa libra da taglia ed è ina filiala da la fundaziun per lavur a Son Gagl. Las singulas firmas, nua che vegn producida la valurisaziun, vegnan manadas sco filialas sut il tetg da la gruppa Dock SA. Questas filialas èn situadas a Son Gagl (cun in manaschi a Gossau ed in a Buchs), ad Arbon, a Winterthur, a Wallisellen, a Lucerna, a Basilea-Citad, a Dietikon ed a partir da l'atun er a Cuira. Actualmain porscha la gruppa Dock SA passa 1000 plazzas da lavur illimitadas. Da princip po mintga persuna che retira agid social e che vul finanziar sezza ina part da sia vita lavurar en ina filiala.

Cunquai che la gruppa Dock SA sco firma sociala na dastga da princip betg concurrenzar las interpresas sin l'emprim martgà da lavur, acquirescha ella lavurs industrialas che na pon uschiglio betg vegnir liquidadas en Svizra en ina moda che cuvra ils custs. Cun ses agid cloma sia clientella lavurs ch'èn gia vegnidas externalisadas en pajais cun salaris bass enavos en Svizra u desista da cumprar ina maschina. Las singulas firmas lavuran tenor ils princips e las directivas da l'economia da manaschi, uschia che la valurisaziun ed il niz dals meds investids pon vegnir garantids il meglier pussaivel. Ellas lavuran per manaschis industrials e per firmas da recicladi, per ils quals ellas fan lavurs simplas a maun en seria. La clientella vegn sustegnida principalmain en l'elavuraziun posteriura da products, en la montascha, en la separaziun da material, en l'emballadi ed en la controlla da qualitad.

Sco firma sociala manada sco ina interpresa na lavura la gruppa Dock SA betg cun la finamira da rendita. Ina gronda part da sia svieuta realisescha ella cun agid da las incumbensas da la clientella. Il salari da las lavurantas e dals lavurants anteriuramain dischoccupads da lunga durada vegn finanzià dal post assegnant.

Cunvegna davart la collavuraziun
La regenza ha approvà l'installaziun e la gestiun d'ina firma sociala tras la gruppa Dock SA. Ella ha garantì per quai a la Dock SA ina contribuziun da 650 000 francs per lavurs da concept, per l'infrastructura sco er per cuvrir ils custs da locaziun e da salari en la fasa iniziala. La firma dal Grischun vegn a cumenzar cun sia lavur l'atun 2012.


Infurmaziuns:
- cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01
- Daniela Merz, mainagestiun da la gruppa Dock SA, tel. 071 272 20 20, daniela.merz@dock-gruppe.ch  
- Andrea Mauro Ferroni, schef da l'uffizi dal servetsch social chantunal dal Grischun, tel. 081 257 26 54, info@soa.gr.ch


Gremi: regenza
Funtauna: rg chanzlia chantunala dal Grischun