A l'emprima sesida suenter las vacanzas da stad è la regenza grischuna s'occupada tranter auter da revisiuns da planisaziuns localas da vischnancas. Plinavant ha ella fixà la data da la votaziun da referendum davart la lescha davart las taxas turisticas.

La votaziun davart la LTT ha lieu ils 25 da november 2012
Il referendum inoltrà ils 23 da fanadur 2012 cunter il conclus dal cussegl grond davart il relasch da la lescha davart las taxas turisticas (LTT) è reussì cun 3000 suttascripziuns valaivlas. La regenza ha prendì enconuschientscha da quai. La votaziun dal pievel davart quest project ha lieu ils 25 da november 2012.

Approvà l'ovra electrica Tasnan en Engiadina bassa
La regenza ha approvà il project da concessiun e da construcziun "Ovra electrica Tasnan" cun midadas e cun cundiziuns. En spezial è vegnida augmentada la quantitad d'aua restanta prescritta.
L'ovra projectada per utilisar la forza idraulica dal Tasnan en Engiadina bassa cumpiglia ina simpla ovra d'aua currenta a pressiun auta. Previsas èn ina prestaziun installada da 6,5 megawatts sco er ina producziun d'electricitad da circa 19,3 uras da gigawatt per onn. Ils custs d'investiziun importan circa 25 milliuns francs. Las radunanzas communalas d'Ardez e da Ftan avevan concedì ils 25 d'avust 2009 a l'Ovra electrica Tasnan SA en fundaziun ils dretgs da las auas per utilisar la forza idraulica dal Tasnan.

Stgars 1,5 milliuns francs per staziuns da mesiraziun e da surveglianza en las muntognas
Per mesirar la naiv ed il vent sco er per survegliar grips vegnan impundids en il Grischun totalmain 1,46 milliuns francs ils onns 2012 fin 2015. La regenza ha approvà ils custs per il mantegniment e per la reparaziun da staziuns dal sistem interchantunal da mesiraziun e d'infurmaziun IMIS sco er per il manaschi dals sistems da preavertiment Cuolm da Vi sur Sedrun, Vicosoprano, Favugn, Brinzauls e Schais a Sta. Maria V.M. Dals 1,46 milliuns francs surpiglian la confederaziun ina quota da 35 pertschient ed il chantun ina quota da 45 pertschient tenor la cunvegna da program "Ovras da protecziun en il guaud".
Il sistem interchantunal da mesiraziun e d'infurmaziun IMIS è vegnì sviluppà dapi l'onn 1996 en collavuraziun cun la confederaziun, ils chantuns, las vischnancas ed autras associaziuns d'interess e cumpiglia staziuns per mesirar la naiv ed il vent che vegnan manadas e survegliadas dal WSL institut per la perscrutaziun da la naiv e da las lavinas a Tavau (SLF). Las datas servan sco basa per elavurar ils bulletins da lavinas naziunals e regiunals. Ultra da quai vegnan ellas duvradas per avertiments locals da lavinas.


Da vischnancas e da regiuns

• Churwalden: Il plan da zonas e plan general da furmaziun sco er il plan general d'avertura 1:1000 "Revisiun parziala Grossboden – center da sport da naiv" dals 27 d'october 2011 na vegnan betg approvads e returnads a la vischnanca per als repassar.
• Cunter en il Partenz: La revisiun parziala da la planisaziun locala, concludida da la vischnanca da Cunter en il Partenz ils 25 da november 2011, vegn approvada cun resalva. Tras la revisiun vegn tranter auter mess a disposiziun terren da construcziun per domiciliar famiglias en la vischinanza dal center dal vitg. Plinavant vegn garantida la disponibladad da reservas existentas da terren da construcziun. Il mantegniment dals implants da sport d'enviern vegn garantì tras la determinaziun da zonas per il sport d'enviern. 
• Saas: La revisiun parziala da la planisaziun locala, concludida da la vischnanca da Saas ils 17 da favrer 2012, vegn approvada. Quella cumpiglia tranter auter in plan da zonas e plan general da furmaziun 1:1000 "Trun". 
• Vaz: La revisiun parziala da la planisaziun locala, concludida da la vischnanca da Vaz ils 28 d'avust 2011, vegn approvada. Quella cumpiglia in plan da zonas e plan general da furmaziun 1:1000 "Revisiun parziala parcellas 2494, 2519 e 2520". 
• Casti-Vargistagn: La revisiun parziala da la planisaziun locala, concludida da la vischnanca da Casti-Vargistagn ils 16 da favrer 2012, vegn approvada. Quella cumpiglia la realisaziun communala dal plan directiv regiunal legalmain valaivel "Cuntradas da cultura cun edifizis marcants per la cuntrada (EMC) Val Schons: Andeer, Casti-Vargistagn, Lon, Pignieu". 
• Zuoz: La revisiun parziala da la planisaziun locala, concludida da la vischnanca da Zuoz ils 25 d'avrigl 2012, vegn approvada. Quella cumpiglia principalmain la midada da la parcella nr. 3032 da 1938 m² da la zona per edifizis e per stabiliments publics (ZESP) a la zona Lyceum Alpinum (ZLA). 
• Laax: La revisiun parziala da la constituziun communala, concludida da la vischnanca da Laax ils 22 da zercladur 2012, vegn approvada. Tras quella survegn la suprastanza communala la cumpetenza da far contracts da dretg da construcziun en zonas da construcziun per persunas indigenas. 
• Zizers: La revisiun parziala da la constituziun communala, concludida da la vischnanca da Zizers ils 17 da zercladur 2012, vegn approvada. Tras quella vegnan las cumpetenzas electoralas da la radunanza communala transferidas a la votaziun a l'urna. La vischnanca da Zizers vegn incumbensada da la regenza d'adattar entaifer in onn ils artitgels constituziunals davart ils dretgs politics e davart l'organisaziun communala che la regenza aveva crititgà gia pli baud. 
• Zizers: Il project da dustanza cunter la bova dal vitg a Zizers vegn approvà. Il chantun sa participescha tut en tut cun maximalmain 65 000 francs al project. 
• Suraua: L'uffizi da construcziun bassa dal Grischun vegn incumbensà da laschar elavurar in project per reparar ils rempars da l'aual donnegiads en la Val Mulin, vischnanca da Suraua. 
• Grüsch, Schiers, Seewis: La revisiun parziala dals statuts dals pumpiers dal Partenz davant vegn approvada. 
• Churwalden: A la vischnanca da Churwalden vegn garantida per l'onn 2012 ina contribuziun chantunala da 71 680 francs per l'etappa da basa dal project per il svilup regiunal (PSR) "Churwalden". Per pudair pajar la contribuziun chantunala vegn premessa ina contribuziun da la confederaziun.

Contribuziuns chantunalas a differentas instituziuns

• Societad da manaschi da la Manufactura Grischun SA: A la societad da manaschi da la Manufactura Grischun SA vegn garantida per l'onn 2012 ina contribuziun da 100 000 francs per l'etappa da basa dal project per il svilup regiunal (PSR) "Meglieraziun da las structuras en il Grischun central". Cun resalva da la participaziun da la confederaziun importa la contribuziun chantunala totala maximala previsiblamain 176 000 francs.

Projects da vias
La regenza ha approvà 7 435 000 francs per lavurs da construcziun sin ils suandants trajects:
- via naziunala A28, Partenz: lavurs d'impressari, sviament da Küblis, emprima exchavaziun Prada
- via tudestga H3: lavurs d'impressari e da cuvrida, spartavias Mastrils – cunfin chantunal
- via da Schuders: lavurs d'impressari e da cuvrida, Ottenacker – Pusserein
- via da Stugl: lavurs da cuvrida, Latsch – Stugl


Gremi: regenza
Funtauna: rg chanzlia chantunala dal Grischun