La regenza grischuna suttametta al cussegl grond ina missiva per la fusiun da las vischnancas da Stussavgia, da Tenna, da Valendau e da Versomi a la nova vischnanca da Val Stussavgia. Sch'il cussegl grond dat ses consentiment, po la fusiun vegnir realisada per il 1. da schaner 2013.

Las quatter vischnancas da Stussavgia, da Tenna, da Valendau e da Versomi han concludì da furmar en l'avegnir ina vischnanca politica cun il num Val Stussavgia. Ils 25 da november 2011 èn las votantas ed ils votants da las vischnancas s'exprimids a favur d'ina fusiun. Suenter ha la regenza approvà la cunvegna correspundenta. Davart la fusiun da vischnancas vegn il cussegl grond a decider definitivamain en la sessiun d'october 2012. La regenza ha deliberà la missiva per ina fusiun da las quatter vischnancas a la nova vischnanca da Val Stussavgia. La fusiun da vischnancas vegn subvenziunada cun ina contribuziun chantunala da promoziun da 5,9 milliuns francs.

Stussavgia, Tenna, Valendau e Versomi collavuran gia oz intensivamain e cun success en differents secturs, per part cun agid d'organisaziuns surordinadas. Er sin il champ cultural e social existan dapi ditg stretgs lioms. La fusiun permetta da schliar differentas furmas da collavuraziun intercommunala. Uschia èsi pussaivel da far ina rectificaziun essenziala da las structuras en ils secturs da la furmaziun, dals pumpiers e da la selvicultura. La vischnanca da Val Stussavgia vegn ad appartegnair per entant a duas differentas regiuns d'ospital.

La nova vischnanca da Val Stussavgia surpiglia la vopna dal circul da Stussavgia. Las vischnancas da Valendau e da Versomi che faschevan fin ussa part dal circul da la Foppa vegnan integradas en il circul da Stussavgia. Cun 15 142 hectaras posseda la nova vischnanca in territori considerabel. Ella è pia quasi tuttina gronda sco la nova vischnanca dad Arosa, che vegn a resultar da la fusiun dad otg vischnancas dal Scanvetg. Il center d'administraziun vegn ad esser a Stussavgia.


Infurmaziuns:
- presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01
- Simon Theus, viceschef da l'uffizi da vischnancas, manader da la partiziun "projects", tel. 081 257 23 87


Gremi: regenza
Funtauna: rg chanzlia chantunala dal Grischun