La regenza ha prendì enconuschientscha d'in rapport davart la segirezza en ils tunnels stradals dal Grischun. Plinavant ha ella deliberà contribuziuns tranter auter per la construcziun da l'arena da biatlon Planoiras.

Examinà la segirezza dals tunnels da las vias chantunalas
L'uffizi da construcziun bassa ha laschà far in project per examinar sistematicamain ils indrizs da segirezza da tut ils tunnels da las vias chantunalas e per fixar ils standards. Las pretensiuns da las normas e da las directivas svizras sco er da la directiva da la UE concernent la segirezza en tunnels prendan memia pauc resguard da las particularitads dals tunnels stradals dal Grischun. Blers dals 48 tunnels da la rait da las vias chantunalas èn relativamain curts ed han pitschnas frequenzas da traffic. Correspundentamain pitschna è la probabilitad d'in accident grev. Sin basa da questas cundiziuns specificas èn vegnids fixads per blers tunnels equipaments da standard reducids che tegnan quint da las ristgas pli pitschnas.
La regenza ha prendì enconuschientscha dal rapport ed ha incumbensà l'uffizi da construcziun bassa da realisar la cumplettaziun pass per pass, sche pussaivel en il rom da sanaziuns architectonicas ch'èn sin il program.

Prestaziuns da promoziun per construir l'arena da biatlon Planoiras
Il chantun sustegna la construcziun da l'arena da biatlon Planoiras. La regenza ha deliberà ina contribuziun chantunala dad 1 milliun francs en il rom dal concept per implants da sport d'impurtanza naziunala (CISIN). En il rom da la nova politica regiunala (NPR) vegn plinavant concedì a la vischnanca da Lantsch in credit federal dad 850 000 francs, restituibel entaifer 10 onns. Cumplettond il credit federal sa participescha il chantun ultra da quai a la finanziaziun cun ina contribuziun unica da 143 089 francs (prestaziun equivalenta tar il credit federal NPR).
Las prestaziuns da promoziun èn suttamessas a la cundiziun d'ina finanziaziun totala reglada. Er ston esser ademplidas las premissas da la planisaziun dal territori per construir l'arena da biatlon Planoiras. Resalvada resta l'approvaziun dal credit tras il cussegl grond.
L'arena da biatlon Planoiras duai star a disposiziun tant al sport da massa sco er al sport d'elita. I vegn fatg quint cun custs d'investiziun da 6,441 milliuns francs. Il project duai esser realisà fin la fin da l'onn 2016.

Prolungà il project per la plattafurma turistica electronica grischuna
Per cuntinuar cun la realisaziun dal project da la plattafurma turistica electronica grischuna (ePlattform GR) vegn prolungà il mandat per la Graubünden eTourism ScRL, che ha la direcziun dal project per in ulteriur onn fin la fin da l'onn 2013. En quest connex vegnan ils custs maximals gia garantids augmentads da 600 000 ad 805 000 francs (da nov per ils onns 2009 fin 2013).
La ePlattform GR è ina mesira accumpagnanta da la refurma dal turissem grischun che porta il titel "Structuras cumpetitivas e repartiziun da las incumbensas en il turissem grischun". Il cussegl grond aveva prolungà il december 2011 la durada dal credit d'impegn per la refurma dal turissem fin la fin da l'onn 2013. Uschia stat dapli temp a disposiziun per realisar singulas mesiras. Cun la "ePlattform GR" duain vegnir colliadas las purschidas regiunalas da turissem en ina rait electronica e commerzialisadas communablamain.

Nova cunvegna da program per revitalisar las auas
La regenza grischuna ha approvà ina cunvegna da program per revitalisar las auas per ils onns 2012 fin 2015 tranter l'uffizi federal d'ambient ed il chantun Grischun. Cun l'instrument da la cunvegna da program vegnan regladas las incumbensas communablas tranter la confederaziun ed ils chantuns. Ils chantuns s'obligheschan da metter a disposiziun tschertas prestaziuns. Percunter conceda la confederaziun contribuziuns globalas fixadas en contracts.


Da vischnancas e da regiuns

• Arosa: La cunvegna davart la fusiun da las vischnancas dad Arosa, Calfreisen, Castiel, Langwies, Lüen, Molinis, Peist e St. Peter-Pagig per il 1. da schaner 2013 a la nova vischnanca dad Arosa, concludida da questas vischnancas ils 17 da zercladur 2012, vegn approvada. Ils recurs cunter questa fusiun ch'èn vegnids inoltrads tar la regenza vegnan refusads. Cuntrari a l'opiniun da las recurrentas e dals recurrents na datti or da l'optica dal dretg public ni in'obligaziun ni ina necessitad da far votaziuns separadas davart la constituziun communala en las vischnancas actualas. La fusiun da questas vischnancas sto anc vegnir approvada dal cussegl grond. 
• Lantsch: La revisiun parziala da la planisaziun locala da la vischnanca da Lantsch dals 30 d'avust 2011 vegn approvada. La revisiun cuntegna tranter auter la determinaziun d'ina zona d'abitar per persunas indigenas en il territori "Pala". 
• Salouf: La revisiun parziala da la planisaziun locala, concludida da la vischnanca da Salouf ils 29 d'avust 2011, che cumpiglia in plan da zonas 1:2000 "Pulens" ed in plan general d'avertura 1:2000 "Pulens", vegn approvada cun resalvas. La midada d'ina zona da parcadi en ina zona da chasas da vacanzas, cuntegnida en il plan da zonas 1:2000 "Pulens", na vegn betg approvada.

 
Contribuziuns chantunalas a differentas instituziuns

• Cracking Energy Machines SA, Bregaglia: A la Cracking Energy Machines SA vegn garantida ina contribuziun chantunala da maximalmain 500 000 francs a las investiziuns en las capacitads da producziun per sviluppar e per producir maschinas da reciclagi, premess che la finanziaziun totala saja reglada. Sin basa da la lescha per promover il svilup economic en il chantun Grischun vegn ultra da quai garantì in credit chantunal da maximalmain 1 milliun francs. Il project cumpiglia l'acquist da terren da construcziun da la vischnanca da Bregaglia, la construcziun d'ina halla industriala sco er l'equipament cun ils indrizs necessaris per sviluppar e per construir maschinas da reciclagi. Tut en tut èn previssas investiziuns da var 8 milliuns francs.

 
Projects da vias
La regenza ha approvà 1 580 000 francs per lavurs da construcziun sin ils suandants trajects:
- via da Stierva: lavurs d'impressari e da cuvrida, nova construcziun da la punt Val Mulegn
- via da Trans: lavurs d'impressari, emprima exchavaziun dal tunnel Plattas


Gremi: regenza
Funtauna: rg chanzlia chantunala dal Grischun