La purschida turistica en il chantun Grischun duai vegnir rinforzada vinavant: cun in program d'impuls che permetta a las acturas ed als acturs turistics da meglierar cuntinuadamain lur qualitad. Quai tranter auter cun agid da glistas da controlla specificas e d'ovras da consultaziun. Il program fa part da las refurmas da las structuras da l'uffizi per economia e turissem (UET) ch'èn vegnidas iniziadas l'onn 2006. In sustegn finanzial vegn dal fond d'innovaziun dal secretariat da stadi per l'economia (SECO).

Il program da qualitad dal Grischun na vul betg crear in nov label ed er betg inscenar ina rangaziun da la qualitad. Plitost vul il program d'impuls prender per las cornas il problem da la mancanza da qualitad. Las deblezzas ed ils deficits èn bain enconuschents: innovaziuns ed investiziuns mancan ed ins insista sin musters vegls ed antiquads empè da sa posiziunar da nov. Il program da qualitad dal Grischun è in program d'impuls da 2 onns che duai gidar las acturas ed ils acturs turistics cun meds cumprovads e pragmatics da controllar, d'optimar e da render cumpetitiva la qualitad da las aventuras e da lur servetschs.

Nov portal da qualitad online
L'emprima realisaziun vesaivla è il portal da qualitad online sut www.qualitaet-gr.ch. En il senn da l'agid per gidar sasez, ma er per crear orientaziuns e transparenza stat ina retscha d'agids utils a disposiziun a las persunas interessadas: instruments da cumparegliaziun sco in calculatur da benchmarks u ina controlla da l'attractivitad dals products purschids, alura ovras da consultaziun e mussavias davart temas sco l'inscenaziun d'aventuras u la quantitad da l'ambient e la finala – en furma d'ina resumaziun survesaivla – tut las infurmaziuns davart ils labels da qualitad e davart las classificaziuns actualas en il turissem inclusiv tut ils links respectivs.

Turs da signal areguard la qualitad duain mussar la via
In element essenzial dal program è la creaziun da turs da signal areguard la purschida ed areguard la qualitad. Sco exempels da "best practice" duain questas turs da signal purtar effects d'imitaziun en il turissem grischun. Perquai han actualmain lieu en tut las destinaziuns e regiuns turisticas discurs cun las persunas ch'èn responsablas per il turissem. Plinavant han gì lieu il fanadur passà diesch inspecziuns da lieus. Il focus è vegnì mess sin la chadaina d'aventuras dal giast, tras quai ch'ins ha examinà l'andament optimal da la chadaina d'aventuras e discutà ils puncts debels al lieu. Las meglieraziuns resultantas duain esser pli tard exempels resp. projects da turs da signal per autras destinaziuns turisticas.

Controllas secretas als puncts da colliaziun
Il proxim enviern drizza il program da qualitad dal Grischun ses focus sin la realisaziun da controllas secretas ("mystery checks") en tschertas destinaziuns turisticas. En il center na stattan betg controllas da qualitad da manaschis singuls, mabain controllas dals puncts da colliaziun tranter ils purtaders da las prestaziuns d'ina destinaziun sco er dals puncts da colliaziun a purschidas che cumpiglian pliras destinaziuns. Per ch'il giast haja ina percepziun positiva da la qualitad e per ch'el recumondia vinavant ina purschida, èsi decisiv che quests puncts da colliaziun funcziunian areguard l'infurmaziun, areguard la reservaziun ed areguard il management da reclamaziuns.


Infurmaziuns:
- Michael Caflisch, manader dal svilup turistic, tel. 081 257 23 73, michael.caflisch@awt.gr.ch
- Yvonne Brigger-Vogel, manadra dal project, tel. 079 457 99 00, brigger@qualitaet-gr.ch  


Gremi: uffizi per economia e turissem dal Grischun
Funtauna: rg uffizi per economia e turissem dal Grischun