La regenza grischuna ha approvà contribuziuns en l'import da passa 18 milliuns francs per la cultivaziun dal guaud. Ultra da quai ha ella permess projects per proteger cunter privels da la natira.

Il chantun investescha passa 18 milliuns francs en la selvicultura
La regenza ha approvà in project collectiv "Selvicultura 2012". Per mantegnair la funcziun da protecziun dal guaud, per promover la biodiversitad, la tgira dal guaud giuven sco er ils tagls da laina en territoris mal accessibels prevesa il project mesiras en l'import da var 24,6 milliuns francs. La finanziaziun vegn fatga tras meds finanzials da la confederaziun, dal chantun e da las proprietarias e dals proprietaris da guaud. Il chantun sa participescha al project collectiv cun ina summa da maximalmain 18,384 milliuns francs. Il pajament da las singulas contribuziuns chantunalas a las proprietarias ed als proprietaris da guaud vegn fatg en il rom dals credits ch'èn vegnids permess dal cussegl grond. Il project collectiv cumpiglia en tut 3045 hectaras guaud cun ina producziun da laina da var 320 000 meters cubic.

Renovà la cooperaziun per il servetsch da salvament da la Val Mesauc
Per proveder la Val Mesauc cun in servetsch da sanitad en il cas d'in eveniment grond cuntinuescha la collavuraziun tranter il chantuns Grischun e Tessin. La regenza grischuna ha approvà ina nova cunvegna davart l'integraziun en il dispositiv dal chantun Tessin da la regiun d'ospital da la Val Mesauc-Calanca en cas d'eveniments da donn pli gronds. Il chantun Grischun n'ha betg avunda agens servetschs sanitars en la regiun d'ospital da la Val Mesauc-Calanca per dumagnar eveniments da donn pli gronds cun numerusas persunas blessadas. En cas d'in eveniment stuessan las forzas d'acziun ed il material vegnir transportads dal Grischun dal nord en la Val Mesauc. Quai chaschunass in retard considerabel. Per organisar il servetsch da salvament en cas d'eveniments gronds vegn il chantun Tessin indemnisà annualmain cun 40 000 francs.

La revisiun parziala da la lescha federala davart radio e televisiun vegn sustegnida
En sia posiziun a la confederaziun s'exprima la regenza grischuna davart la revisiun parziala da la lescha da radio e televisiun (LRTV). La regenza beneventa da midar, sco proponì en la revisiun parziala, dal sistem actual cun ina taxa da retschavidra u da retschavider al sistem cun ina taxa independenta da l'apparat. Ella beneventa er che en il futur duaja l'incassament da la taxa da chasada e d'interpresa star sut la cumpetenza d'ina firma independenta empè da vegnir surdà al post d'incassament Billag SA. La lavur birocratica che vegniva liquidada fin ussa tras la Billag SA e che serviva a l'incassament da las taxas da recepziun dastgass diminuir tras quai per bainquant tenor l'avis da la regenza. Medemamain ha la regenza approvà d'abolir la restricziun dal dretg da derasaziun per ils emetturs locals e regiunals concessiunads da radio e da televisiun.

Da vischnancas e da regiuns

• Lumnezia: La cunvegna davart la fusiun da las vischnancas da Cumbel, Degen, Lumbrein, Morissen, Suraua, Vella, Vignogn e Vrin a la nova vischnanca da Lumnezia per il 1. da schaner 2013 ch'è vegnida concludida ils 25 da matg 2012 vegn approvada. La fusiun da questas vischnancas sto anc vegnir approvada dal cussegl grond.
• Bever: En il futur duai il territori d'abitadi da la vischnanca da Bever vegnir protegì meglier cunter lavinas. Il project "Cumplettaziun dals rempars da lavinas Crasta Mora" che l'uffizi da guaud e privels da la natira ha inoltrà per incumbensa da la vischnanca da Bever vegn approvà. En il territori da distatga "Crasta Mora" vegnan construids novs rempars da lavinas cun ina lunghezza totala da var 752 meters. Plinavant vegn emplantada ina surfatscha da guaud da stgars 1400 meters quadrat. Ils custs da quest project vegnan calculads cun 2 475 000 francs. I vegn garantida ina contribuziun chantunala da maximalmain 1 806 750 francs. Il project vegn realisà en tschintg etappas da construcziun e duai vegnir terminà l'onn 2016.
• Lostallo: Il project "Auzar il rempar Lostallo" che l'uffizi da guaud e privels da la natira ha inoltrà per incumbensa da la vischnanca da Lostallo vegn approvà. Il rempar cunter bovas existent vegn auzà sin ina lunghezza da 150 meters. Als custs vegn garantida ina contribuziun da maximalmain 450 000 francs. Il territori d'abitadi da la vischnanca da Lostallo cunfinescha da sia vart al vest cun ils bratschs stips dal Piz de Groven. Sin questas costas taissas e sfendagliusas exista perquai in privel da bovas considerabel. Gia l'onn 1978 è pia vegnì construì in rempar cunter bovas per proteger il vitg.
• Savognin: La protecziun dal territori d'abitadi "Sot Spondas" a Savognin cunter bovas ed auas grondas vegn meglierada. Il project "Rempars da la spunda e da l'aual Sot Spondas" che l'uffizi da guaud e privels da la natira ha inoltrà per incumbensa da la vischnanca è vegnì approvà da la regenza. Als custs vegn garantida ina contribuziun da maximalmain 30 400 francs. Il chanal d'affluenza existent per deviar l'aua er en cas da precipitaziuns fermas vegn engrondì ed en il territori vegn construì in corridor d'inundaziun.
• Valragn: La revisiun parziala da la planisaziun locala, concludida da la vischnanca da Valragn ils 9 da december 2011, vegn approvada. La revisiun parziala cuntegna ina enzonaziun en il territori "Grossmatta", e quai en il sectur dal restaurant ch'è oz ord funcziun e che sa chatta al portal dal nord dal tunnel dal San Bernardin per lung da la via naziunala A13. Ina surfatscha da 2631 meters quadrat vegn enzonada en la zona da restaurant d'autostrada ch'è vegnida creada da nov. Questa zona permetta da construir in nov restaurant d'autostrada.
• Lantsch: La revisiun parziala da la planisaziun locala, concludida da la vischnanca da Lantsch ils 28 da mars 2012, vegn approvada. La revisiun parziala furma la basa da la planisaziun d'utilisaziun per construir l'arena da biatlon da Planeiras. A medem temp cun il conclus d'approvaziun vegn communitgada la permissiun da runcar.
• Luzein: La revisiun parziala da la constituziun da la vischnanca da Luzein ch'è vegnida concludida ils 25 da matg 2012, vegn approvada. Tenor questa revisiun n'han las radunanzas communalas betg pli lieu en roda en las fracziuns da Buchen, Luzein e Pany, mabain per regla mo pli a Pany.
• Pasqual: La revisiun parziala da la constituziun da la vischnanca da Pasqual ch'è vegnida concludida ils 8 da december 2011 vegn approvada. Il motiv da la revisiun èn stads l'engaschament d'in manader da scola e la reducziun respectiva dal dumber da cusseglieras e da cussegliers da scola da tschintg a trais.

Projects da vias
La regenza ha approvà 800 000 francs per lavurs da construcziun sin il suandant traject:
-via da Selvaplana: lavurs da cuvrida Viano – Ginetto


Gremi: regenza
Funtauna: rg chanzlia chantunala dal Grischun