La cumissiun per sanadad e fatgs socials ha predeliberà la missiva da la regenza al cussegl grond tar la revisiun da la lescha davart l'organisaziun da la psichiatria e recumonda al cussegl grond – cun resalva d'intginas midadas – d'acceptar il project.

La cumissiun per sanadad e fatgs socials (CSF) ha predeliberà la missiva da la regenza al cussegl grond tar la revisiun da la lescha davart l'organisaziun da la psichiatria. La sesida ha durà in di e mez ed è vegnida presidiada da la deputada e presidenta da la cumissiun Gabriela Tomaschett-Berther. A la sesida han prendì part er il cusseglier guvernativ Christian Rathgeb, ina represchentanza dal departament da giustia, segirezza e sanadad sco er il secretari da finanzas.

La missiva vul cuntanscher ch'ils servetschs psichiatrics dal Grischun (SPGR) possian survegnir pli fitg la qualitad d'interprendiders. Perquai ston las cundiziuns generalas legalas dals SPGR vegnir adattadas. Ils puncts ils pli impurtants èn: surdar ils edifizis e stabiliments ch'èn necessaris per il manaschi en il dretg da construcziun als SPGR cun excepziun dal bain puril Waldhaus, munir ils SPGR cun in chapital da dotaziun da maximalmain 10 milliuns francs e dar la pussaivladad als SPGR da furmar reservas. La cumissiun è unanimamain da l'avis ch'il sboz da la lescha permettia da cuntanscher questas finamiras. Ella ha pia acceptà la dumonda d'entrada unanimamain.

En la tractativa detagliada ha la cumissiun alura fatg intginas propostas da midadas. Tranter auter vul ella garantir ch'il bain puril Waldhaus mettia a disposiziun vinavant purschidas terapeuticas sco er plazzas da lavur e da structuras dal di. Ultra da quai fa ina minoritad da la cumissiun ina proposta areguard la posiziun da la psichiatria d'uffants e da giuvenils en il Grischun, ina proposta d'annullar la pussaivladad ch'ils SPGR survegnian contribuziuns dal chantun en sia qualitad sco instituziun purtadra dals SPGR ed ina proposta ch'il preventiv dals SPGR na duaja betg vegnir approvà tras la regenza mabain tras il cussegl d'administraziun dals SPGR. Ultra da quai èn anc vegnidas fatgas intginas propostas da natira formala.

La cumissiun per sanadad e fatgs socials propona al cussegl grond d'acceptar la revisiun da la lescha davart l'organisaziun da la psichiatria. Il parlament vegn a tractar questa fatschenta en la sessiun d'october 2012. 


Infurmaziuns:
presidenta da la cumissiun Gabriela Tomaschett-Berther, tel. 081 920 22 22


Gremi: cumissiun per sanadad e fatgs socials
Funtauna: rg cumissiun per sanadad e fatgs socials