La cumissiun predeliberanta dal cussegl grond s'exprima unanimamain per la fusiun da las vischnancas da Stussavgia, da Tenna, da Valendau e da Versomi.

En sia missiva dals 3 da fanadur 2012 propona la regenza grischuna al cussegl grond d'approvar la fusiun da las vischnancas da Stussavgia, da Tenna, da Valendau e da Versomi a la nova vischnanca da Val Stussavgia. La fusiun duai vegnir realisada per il 1. da schaner 2013. Sut il presidi da la deputada Tina Gartmann-Albin ha la cumissiun predeliberanta dal cussegl grond predeliberà questa fatschenta per mauns dal cussegl grond che la vegn a tractar en la sessiun d'october 2012. A la sesida èn stadas preschentas er la presidenta da la regenza Barbara Janom Steiner e la represchentanza da las vischnancas pertutgadas.

Ils 25 da november 2011 han las votantas ed ils votants da Stussavgia, da Tenna, da Valendau e da Versomi approvà cleramain cun quasi 87 pertschient la fusiun da lur vischnancas a la nova vischnanca da Val Stussavgia. La cumissiun predeliberanta dal cussegl grond è sa laschada infurmar al lieu da represchentantas e da represchentants da las vischnancas e da las autoritads davart il project da fusiun. Suenter ina debatta detagliada ha ella decidì unanimamain da proponer al cussegl grond d'approvar la fusiun e da metter en vigur il conclus per il 1. da schaner 2013. La cumissiun ha pudì sa persvader ch'i sa tracta d'ina fusiun utila, da la quala resorta ina vischnanca da vallada nova e ferma per il chantun Grischun. Cunquai che las duas vischnancas da Versomi e da Valendau appartegnan actualmain al circul da la Foppa e las vischnancas da Stussavgia e da Tenna al circul da Stussavgia, perda il circul da la Foppa las duas vischnancas da Valendau e da Versomi. Ensemen cun Stussavgia e Tenna vegnan quellas numnadamain alura a furmar sco vischnanca da Val Stussavgia il circul da Stussavgia.

Cun questa fusiun tracta il cussegl grond la terza fusiun da vallada en il Grischun (suenter la Val Müstair e la Bregaglia). 


Infurmaziuns:
presidenta da la cumissiun Tina Gartmann-Albin, tel. 079 611 15 31


Gremi: cumissiun predeliberanta per la fusiun a la vischnanca da Val Stussavgia
Funtauna: rg cumissiun predeliberanta per la fusiun a la vischnanca da Val Stussavgia