Cun l'introducziun da la viafier urbana 2013 en il chantun Son Gagl vegnan organisadas da nov bleras colliaziuns da viafier. Il chantun Grischun profita da questa occasiun per adattar correspundentamain er las colliaziuns en la Val dal Rain grischuna a la dumonda creschenta.

A partir dal december 2013 vegn la staziun da Sargans engrondida ad ina staziun centrala (viafier/bus) cun colliaziuns a las uras cumplainas ed a las mesas uras. Las destinaziuns survegnan uschia mintga 30 minutas ina colliaziun dal traffic public che sa cruscha tar la staziun da Sargans cun las ulteriuras colliaziuns d'attatg. En coordinaziun cun il chantun Grischun vegn er integrà il traject Cuira – Sargans en quest concept.

En quest connex vegn il tren regiunal Cuira – Sargans a daventar ina part integrala da la viafier urbana da Son Gagl 2013. Quest tren che circulescha ussa mintga ura vegn alura a circular correspundentamain mintga 30 minutas durant las uras las pli dumandadas. Questa meglieraziun da la purschida porta a las pendularias ed als pendularis interchantunals tranter Son Gagl/Liechtenstein ed il Grischun dapli e pli sveltas colliaziuns.

Il medem mument survegn Maiavilla uschia a Sargans ina buna colliaziun al InterCity nonstop per Turitg, a l'express da la Val dal Rain pli svelt per Son Gagl, a las viafiers urbanas en direcziun dal Lai Rivaun resp. da la Val dal Rain ed al Railjet per Salzburg – Vienna. Uschia vegn il viadi Maiavilla – Turitg reducì per fin a 6 minutas.

Grazia ad investiziuns da 150 milliuns francs per il traffic d'auta sveltezza tranter Son Gagl e Sargans e grazia a material rullant nov daventa l'express da la Val dal Rain il medem mument bler pli svelt e vegn prolungà fin a Wil (SG). Uschia sa reducescha il temp da viadi da Cuira a Son Gagl per 11 minutas e da San Murezzan a Son Gagl schizunt per 22 minutas.

Cun quest pass d'engrondiment a partir dal december 2013 ha il chantun Grischun l'intenziun da laschar circular er il tren regiunal Cuira – Landquart – Maiavilla – Ragaz Bogn – Sargans en il tact da mes'ura. Ils proxims onns èn planisadas ulteriuras condensaziuns dal tact tar l'apport ed en il Grischun. Uschia vegn l'attractivitad dal traffic public augmentada anc per bler ils proxims onns. 


Infurmaziuns:
Thierry Müller, uffizi d'energia e da traffic, tel. 081 257 36 04 


Gremi: departament da construcziun, traffic e selvicultura
Funtauna: rg departament da construcziun, traffic e selvicultura