La lescha chantunala da pestga duai vegnir cumplettada cun in pèr novaziuns actualas sco er adattada a la lescha federala davart la protecziun dals animals. La regenza grischuna ha autorisà il departament da construcziun, traffic e selvicultura dad avrir la consultaziun tar la revisiun parziala da la lescha da pestga.

La legislaziun chantunala da pestga vertenta è sa cumprovada da princip. Cun la revisiun parziala qua avant maun duain però vegnir realisadas pliras novaziuns necessarias ed actualas en il sectur da la pestga. Ultra da quai vegn il dretg chantunal da pestga adattà a la legislaziun federala surordinada davart la protecziun dals animals. Da nov regla il dretg federal il tractament da peschs e da giombers en ina moda che als correspunda. Perquai pon singulas disposiziuns chantunalas vegnir abolidas. La procedura da consultaziun dura fin ils 25 da schaner 2013.

Il sboz cuntegna tranter auter las suandantas novaziuns:

• La limita da vegliadetgna per retrair la patenta da pestga per mez pretsch vegn augmentada a 18 onns. Uschia pon er giuvenils da 16 e da 17 onns acquistar la patenta da pestga per la tariffa pli favuraivla. Fin ussa valeva quai mo per pestgadras e pestgaders da 14 e da 15 onns.
• In titular da la patenta maioren dastga survegliar fin a dus giuvenils tar la pestga, sch'el è en possess da l'attest davart las enconuschientschas da la materia (dretg da pestgar sut surveglianza). L'attest è ina conferma che la scolaziun da basa necessaria è vegnida fatga e vegn premess per retrair ina patenta d'in onn (da nov d'ina stagiun) u d'in mais.
• Pestgond dastga il pestgader entrar guatond en las auas, il scumond general da guatar vegn abolì en il chantun Grischun. La regenza po però restrenscher localmain e temporarmain il dretg d'entrar guatond en il letg dal flum per pestgar.
• Da nov pon vegnir determinadas auas d'exercizi che servan exclusivamain a la scolaziun ed a la furmaziun supplementara da pestgaders giuvens e novs.
• Il chantun na sustegna betg mo mesiras per meglierar las cundiziuns da viver dals peschs e dals giombers, mabain da nov er per promover la pestga.
• Per l'indemnisaziun d'intervenziuns tecnicas en las auas è – ultra da la reducziun da la productivitad da las auas da peschs – decisiva da nov er la sminuziun dal spazi da viver dals animals d'aua.

Betg midadas na vegnan las taxas per la patenta da pestga. Il pli tard il cumenzament da l'onn 2014 – sche la revisiun parziala da la lescha da pestga entra probablamain en vigur – duain las taxas però vegnir augmentadas en la dimensiun da la chareschia ch'è s'accumulada dapi l'onn 2002. 


Infurmaziun:
Dals documents da consultaziun poi vegnir prendì invista en l'internet sut www.gr.ch (link direct). 


Infurmaziuns:
cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01 


Gremi: regenza
Funtauna: rg chanzlia chantunala dal Grischun