Ina barriera dischagreabla e malempernaivla per la populaziun da Malans fa plazza ad in sutpassadi modern da la via chantunala. Cun separar la via ed ils binaris po vegnir eliminada la ristga restanta ch'i dettia accidents tranter ils vehichels sin via e quels sin ils binaris, ed il traffic po vegnir armonisà en general. Vi da quest project da 7,5 milliuns francs èn sa participads il chantun, la Viafier retica (VR) e la vischnanca da Malans. L'inauguraziun communabla ha lieu oz en il rom d'ina festa en preschientscha da la populaziun dal vitg. 

In sutpassadi cun il caracter da win-win per la vischnanca da Malans...
L'avertura dal nov sutpassadi da la via è in term impurtant en l'istorgia da Malans. Finalmain èn passads ils temps da spetga per part lungs e malempernaivels davant la barriera serrada, e – sco effect secundar bainvegnì – pon en l'avegnir vegnir excludidas situaziuns privlusas en il sectur dals binaris. En il futur cuntanschan er vehichels d'urgenza sco l'ambulanza ed ils pumpiers il vitg da Malans senza retard, e la stabilitad da l'urari dals curs dals autos da posta vegn meglierada cleramain. In grond plaschair ha pia la presidenta communala Anita Thürer-Rohrer: "Oz festegiain nus il resultat d'ina collavuraziun effizienta tranter ils trais partenaris chantun, Viafier retica e vischnanca!" Il plaschair ha anc auters motivs: Quasi sco effect secundar bainvegnì ha la vischnanca da Malans realisà – ensemen cun il nov sutpassadi – er anc dus ulteriurs projects, numnadamain la via d'avertura al territori d'abitadi "Stampfacker" sco er la sanaziun dal "Mühlbach". Ultra da quai ha la radunanza communala gia permess da construir in sutpassadi per pedunas e peduns sco er per velos al lieu da la barriera existenta. 

...e per la Viafier retica
Er il president dal cussegl d'administraziun da la Viafier retica Stefan Engler vesa in potenzial da privel sin las vias cun barrieras. Cunzunt a Malans cruschava ina via fermamain frequentada binaris cun vaira bler traffic. Il tact da mesa ura ch'è previs per il Partenz avess senza dubi anc engrevgià questa situaziun. Ils temps da barriera serrada fissan sa prolungads anc ina giada e pia er ils temps da spetga malempernaivels. Engler: "Ina segirezza absoluta cunter incaps cun vehichels sin via e cun tals sin ils binaris garantescha mo la separaziun dals dus sistems da traffic. En quest senn beneventain nus la realisaziun communabla dal sutpassadi da la via". Engler accentuescha dentant er, ch'i saja stà pussaivel da schliar optimalmain la situaziun da traffic a Malans mo grazia a la collavuraziun colleghiala tranter la vischnanca, il chantun e la Viafier retica. Sut quest puntg da vista haja il project realisà in caracter exemplaric, di Engler. 

Investì passa 7 milliuns en moda duraivla
Suenter l'approvaziun dal project tras il chantun e suenter la procedura d'exposiziun è vegnida fatga l'emprima badigliada ils 17 d'october 2011. Suenter in temp da construcziun da bunamain in onn po il sutpassadi vegnir inaugurà – sco previs – oz, ils 27 d'october 2012, en preschientscha da bleras abitantas e da blers abitants. Ils custs da 7,5 milliuns francs per il nov sutpassadi vegnan surpigliads en moda colleghiala da la Viafier retica, dal chantun e da la vischnanca da Malans. La nova "Stampfackerstrasse" sco er la sanaziun dal "Mühlbach" vegnan finanziadas da la vischnanca, il sutpassadi per velos sco er per pedunas e peduns al lieu da la barriera existenta vegn finanzià da la vischnanca e da la Viafier retica. Cun quest project poi vegnir cumenzà probablamain l'onn 2013. 
 

Infurmaziuns:
- vischnanca da Malans: Anita Thürer-Rohrer, presidenta communala, tel. 081 300 00 28
- uffizi da construcziun bassa dal Grischun: Reto Knuchel, schef dal mantegniment da vias, tel. 081 257 37 35 u 079 629 81 14
- Viafier retica: Peider Härtli, manader da la communicaziun da l'interpresa, tel. 081 288 63 66 u 079 405 98 07 


Gremi: uffizi da construcziun bassa dal Grischun
Quelle: rg uffizi da construcziun bassa dal Grischun