Oz è la regenza grischuna sa scuntrada cun represchentantas e represchentants dal Padrinadi per vischnancas da muntogna. L'inscunter ha exprimì la stima e l'engraziament dal chantun ed è en spezial er stà in barat d'infurmaziuns.

L'onn da guerra 1940 han ils medis conjugals Olga e Paul Cattani e trais auters iniziants fundà in'uniun che sa numna oz Padrinadi svizzer per vischnancas da muntogna. Ils conjugals Cattani avevan persunalmain stretgas relaziuns cun il chantun Grischun. Fin al di dad oz exista ina stretga collavuraziun. Passa 100 vischnancas, corporaziuns ed associaziuns grischunas han survegnì ils ultims onns e decennis prestaziuns da sustegn voluminusas ed han uschia pudì realisar numerusas ovras d'infrastructura necessarias, senza ch'ils custs restants hajan chaschunà grevezzas exorbitantas. Tras l'intermediaziun dal Padrinadi èn er naschidas intginas dunsainas da padrinadis fixs tranter vischnancas muntagnardas grischunas e vischnancas da la Bassa. Cun il temp è sa sviluppada ina spessa rait da relaziuns tranter la muntogna e la Bassa. "La rait da relaziuns è indispensabla per la chapientscha vicendaivla entaifer nossa cuminanza federala", è persvadida la presidenta da la regenza Barbara Janom Steiner. 

Passa 50 milliuns francs en 10 onns
Ils ultims 10 onns ha il Padrinadi svizzer per vischnancas da muntogna pajà passa 50 milliuns francs a vischnancas, a corporaziuns ed ad associaziuns en il chantun Grischun. Sco segn da stima e d'engraziament ha la regenza grischuna envidà il comité presidial dal Padrinadi e la manadra da fatschenta ad in inscunter a Cuira. Quest inscunter cuminaivel n'ha betg mo exprimì la stima, mabain è en spezial er stà in barat d'infurmaziuns vicendaivel. La regenza ha infurmà davart ils svilups en il rom da la refurma da vischnancas e dal territori, da la gulivaziun da finanzas sco er dal rendaquint (model armonisà da contabilitad per preventivs publics 2 [MAC2]). En num da numerusas vischnancas sustegnidas ha la presidenta da la regenza Barbara Janom Steiner engrazià per la solidaritad ch'è adina puspè vegnida demussada. Hans Hofmann, il president dal Padrinadi per vischnancas da muntogna, ha guardà enavos cun satisfacziun sin ina collavuraziun zunt fritgaivla cun il chantun Grischun.

Il comité presidial dal Padrinadi svizzer per vischnancas da muntogna sa cumpona dal president Hans Hofmann, anteriur cusseglier dals chantuns, dal vicepresident dr. Martin Haas, da dr. Riccardo Jagmetti, professer ed anteriur cusseglier dals chantuns, sco er da Rolf Binder, anteriur cumandant da corp. Manadra da fatschenta è Barbla Graf ch'è oriunda da l'Engiadina bassa. A l'inscunter è er sa participà il commember da la suprastanza ed anteriur cusseglier federal dr. Hans-Rudolf Merz.


Fotografia agiuntada:
inscunter.jpg

Davos da sanestra: Riccardo Jagmetti, Martin Haas, Rolf Binder, Christian Rathgeb, Martin Jäger, Mario Cavigelli e Claudio Riesen.
Davant da sanestra: Barbla Graf, Hans-Rudolf Merz, Barbara Janom Steiner (presidenta da la regenza), Hans Hofmann (president dal Padrinadi) e Hansjörg Trachsel.


Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01


Gremi: regenza
Funtauna: rg chanzlia chantunala dal Grischun