La regenza grischuna suttametta al cussegl grond ina cuntraproposta a l'iniziativa dal pievel "Gea ad electricitad netta senza forza electrica da charvun" e vul medemamain sortir da la forza electrica da charvun. Per la regenza stat la renunzia immediata a la forza electrica da charvun, sco quai ch'i vegn pretendì da l'iniziativa, dentant en cuntradicziun cun la politica d'energia da la confederaziun e dal chantun. Perquai duai quest pass vegnir fatg en etappas.

Ils 19 d'october 2011 è l'iniziativa chantunala dal pievel "Gea ad electricitad netta senza forza electrica da charvun" vegnida inoltrada cun 4366 suttascripziuns valaivlas a la chanzlia chantunala dal Grischun. L'iniziativa en furma d'ina proposta generala pretenda ch'i vegnia integrà en la constituziun dal chantun Grischun in cler confess cunter ovras electricas a charvun. En spezial duai il chantun procurar en il rom da sias pussaivladads giuridicas e politicas che interpresas cun ina participaziun dal chantun na fetschian naginas investiziuns en ovras electricas a charvun.

Ord vista da la regenza persequitescha l'iniziativa dal pievel duas finamiras dal tuttafatg differentas en il sectur da la producziun d'electricitad ord charvun. Per l'ina sa drizza ella en general ed a lunga vista cunter la forza dal charvun sco purtader d'energia e pretenda per l'avegnir in cumportament correspundent da tut las interpresas cun ina participaziun dal chantun (scumond da tecnologia). Per l'autra vul l'iniziativa impedir il project da l'ovra electrica a charvun Saline Joniche (regiun Calabria, Italia) ch'è planisà da l'interpresa grischuna d'energia Repower. Questas duas intenziuns da l'iniziativa valitescha la regenza differentamain. 

Sortir en moda ordinada da l'energia electrica da charvun
La regenza grischuna vul che la part d'energia fossila vi dal consum d'electricitad vegnia reducida en accordanza cun la strategia d'energia 2050 da la confederaziun. La dependenza vicendaivla internaziunala sin il martgà d'electricitad e la restructuraziun naziunala dal provediment d'energia pretendan dentant ch'ins procedia a lunga vista e fetschia pass intermediars. La confederaziun parta dal fatg che parts da l'electricitad stoppian vegnir cumpensadas – en il rom da la renunzia a la forza atomara – a partir da l'onn 2025 tras ina generaziun d'ovras electricas da gas ch'emettan CO2. Per motivs dal provediment è l'Italia – che cuvra oz var 70 pertschient da ses basegn d'electricitad tras purtaders d'energia ch'emettan CO2 (gas, charvun e petroli) – medemamain sfurzada da permetter almain ina nova generaziun supplementara d'ovras electricas termicas.

La gronda part dals daners che la Repower investescha per la construcziun d'ovras electricas va gia oz a favur d'energias regenerablas. Il project da l'ovra electrica a charvun Saline Joniche duai percunter segirar il provediment da basa da l'interpresa d'energia en Italia. Sche la Repower sortiss immediatamain dal project, cuntrafaschess quai a las realitads politicas ed economicas sin il champ d'energia en Svizra ed a l'exteriur. Il project gida er a segirar en moda fidada il provediment d'electricitad.

L'iniziativa periclitescha plinavant l'activitad commerziala da la Repower, cunquai ch'ina part considerabla dal retgav deriva dal commerzi e da la vendita en il pajais vischin Italia sco er sin auters martgads da l'exteriur. Cuntrari a la concurrenza vegnissan adossadas a la Repower restricziuns regulatoricas che s'effectuassan a curta vista. Quest indebliment da l'interpresa d'energia cun sia gronda impurtanza per l'economia publica dal chantun Grischun duai vegnir evità. La Repower presta ina contribuziun relevanta a la concepziun da l'economia futura dal Grischun. 

Segirezza giuridica per la Repower
Tras la cuntraproposta da la regenza duai la Repower survegnir la pussaivladad da cuntinuar cun l'elavuraziun dal project Saline Joniche, ch'è gia en ina fasa da planisaziun avanzada, ed eventualmain er da realisar quest project. Tenor la persvasiun da la regenza na duain las investiziuns ch'èn vegnidas fatgas fin oz en il project betg vegnir impedidas retroactivamain. En il rom da quest project è la Repower sa fidada da las cundiziuns da basa politicas e giuridicas che valan en Svizra ed en Italia. Il princip da la segirezza giuridica e da la protecziun da la confidenza duai perquai vegnir resguardà cun la cuntraproposta da la regenza.

Sco interpresa cun ina participaziun dal chantun duai la Repower dentant stuair desister stringentamain en l'avegnir da far novas investiziuns en projects d'ovras electricas a charvun. La cuntraproposta da la regenza a l'iniziativa dal pievel "Gea ad electricitad netta senza forza electrica da charvun" sa cloma perquai: "Tras ina disposiziun en la constituziun chantunala procura il chantun che interpresas cun ina participaziun dal chantun na fetschian naginas novas investiziuns en ovras electricas a charvun." 

L'iniziativa e la cuntraproposta vegnan suttamessas al pievel
La regenza refusa l'iniziativa dal pievel "Gea ad electricitad netta senza forza electrica da charvun" e recumonda al cussegl grond da proponer a las votantas ed als votants d'acceptar la cuntraproposta. Il cussegl grond vegn a tractar l'iniziativa sco er la cuntraproposta da la regenza en la sessiun da favrer 2013. La votaziun dal pievel, ch'è necessaria per in'eventuala revisiun da la constituziun chantunala, ha lieu il settember 2013. 
 

Infurmaziuns:
cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01
  

Gremi: regenza
Funtauna: rg chanzlia chantunala dal Grischun