La cumissiun per ambient, traffic ed energia prenda enconuschientscha dal rapport da la regenza concernent la planisaziun da novas colliaziuns da traffic per mauns da la sessiun da december dal cussegl grond.

A chaschun da sia emprima sesida sut il nov president, deputà Markus Clavadetscher, ed en preschientscha dal cusseglier guvernativ Mario Cavigelli sco er da represchentantas e represchentants da l'administraziun chantunala ha la cumissiun per ambient, traffic ed energia predeliberà il rapport davart la planisaziun da novas colliaziuns da traffic per mauns da la sessiun da december 2012 dal cussegl grond.

Suenter ina discussiun detagliada ed approfundada è la cumissiun s'exprimida per sustegnair il rapport da la regenza. Las finamiras dal rapport èn: resumar en ina survista ils differents projects da traffic ch'èn vegnids examinads en il rom dal project "Planisaziun da novas colliaziuns da traffic", evaluar ils resultats dals studis d'opportunitad e far in giudicament cumparativ dals projects che duain vegnir persequitads vinavant. La cumissiun ha laschà preschentar la regenza en detagl ils 10 projects ed ha alura fatg in'appreziaziun generala.

La cumissiun ha smirveglià in zic ch'il rapport ha resguardà mo projects da viafier. A la cumissiun manca en general ina vista cumplessiva surordinada dals svilups en il sectur dal traffic (via e viafier). Da vart da la cumissiun è er vegnì crititgà ch'il rapport saja focussà exclusivamain sin variantas maximalas. Ina discussiun ha er chaschunà il giudicament da la regenza dals singuls projects e sia classificaziun en projects A, B e C. En quest connex han singuls commembers da la cumissiun exprimì lur preoccupaziun che projects da la categoria B hajan l'effect ch'er infrastructuras dal traffic ch'existan gia, na vegnian betg pli mantegnidas en moda adequata. Suenter che la regenza ha pudì eliminar quests dubis ha la cumissiun concludì unanimamain da proponer al cussegl grond d'entrar en il rapport e da prender enconuschientscha da quel. 
 

Infurmaziuns:
Markus Clavadetscher, president da la cumissiun per ambient, traffic ed energia, tel. 079 254 31 00


Gremi: cumissiun per ambient, traffic ed energia
Funtauna: rg cumissiun per ambient, traffic ed energia