La regenza grischuna ha elegì Mathias Fässler sco nov manader da l'uffizi chantunal per l'execuziun giudiziala. Mathias Fässler, che ha 51 onns e ch'è stà durant blers onns secretari dal departament da giustia, segirezza e sanadad, entra en uffizi mez da l'onn 2013.

La successiun a la testa da l'uffizi per l'execuziun giudiziala è reglada: Tenor il conclus da la regenza daventa Mathias Fässler successur da Walter Schlegel, ch'è da sia vart vegnì elegì quest onn sco cumandant da la polizia chantunala dal Grischun. Fässler è dapi l'onn 1995 secretari dal departament da giustia, segirezza e sanadad. Avant è il giurist ed advocat stà manader dal servetsch giuridic da quest departament. L'um da 51 onns ha enconuschientschas fundadas da l'execuziun da chastis e da mesiras. Quai tant areguard la legislaziun sco er areguard l'organisaziun. Uschia ha Fässler manà la gruppa da lavur ch'è stada responsabla per realisar la nova part generala dal cudesch penal svizzer sin plaun chantunal. En il rom da la reorganisaziun da l'administraziun è el plinavant stà responsabel per il project concernent la fusiun dals differents secturs da l'execuziun da chastis e da mesiras. Da questa fusiun è resortì l'actual uffizi per l'execuziun giudiziala.

Mathias Fässler cumenza cun ses nov uffizi, uschespert che sia successiun tar il secretariat dal departament è reglada. Fin lura vegn l'uffizi per l'execuziun giudiziala manà vinavant en moda interimistica d'Andrea Zinsli. 
 

Fotografia agiuntada: 


Mathias Fässler, il nov manader da l'uffizi per l'execuziun giudiziala 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun