La cumissiun dal cussegl grond per politica da stadi e strategia beneventa in spustament da la votaziun dal pievel davart l'iniziativa dal pievel "Fermas vischnancas – in ferm chantun" sin l'atun 2013.

Sut il presidi dal deputà Bruno W. Claus ed en preschientscha da la presidenta da la regenza Barbara Janom Steiner resp. dal cusseglier guvernativ Martin Jäger sco er d'ina represchentanza da l'administraziun chantunala ha la cumissiun per politica da stadi e strategia predeliberà differentas fatschentas per mauns da la sessiun da december 2012 dal cussegl grond. Uschia recumonda la cumissiun unanimamain al cussegl grond da prender enconuschientscha e da sustegnair las finamiras annualas e las mesiras che la regenza propona en ses program annual 2013.

En connex cun l'iniziativa dal pievel "Fermas vischnancas – in ferm chantun" è la cumissiun, ensemen cun la regenza e cun il comité d'iniziativa, vegnida unanimamain a la conclusiun da proponer al cussegl grond, sin basa da l'art. 15 da la constituziun chantunala, da spustar per 6 mais la votaziun dal pievel ch'era planisada per ils 3 da mars 2013. En vista al dumber da projects da votaziun dals 3 da mars 2013 na fissi ord vista da la cumissiun ni raschunaivel ni opportun da suttametter a las votantas ed als votants a medem temp er la dumonda impurtanta da las structuras statalas en il chantun Grischun.

Unanimamain ha la cumissiun acceptà la proposta da la regenza en la missiva dal preventiv 2013, numnadamain d'adattar l'art. 38 da la lescha da finanzas dal chantun Grischun. 
 

Infurmaziuns:
president da la cumissiun Bruno W. Claus, tel. 079 333 92 92


Gremi: cumissiun per politica da stadi e strategia
Funtauna: rg cumissiun per politica da stadi e strategia