En ina missiva al cussegl grond fa la regenza ina proposta per la garanzia e per la reorganisaziun da la plazza aviatica regiunala a Samedan. Igl è previs da cumpigliar pli fitg il maun public. Cun l'intent da mantegnair a lunga vista quest stabiliment da traffic impurtant duain d'ina vart las immobiglias chantunalas da la plazza aviatica vegnir transferidas ad ina interpresa d'infrastructura independenta da dretg public dal circul d'Engiadin'ota sin basa d'in dretg da construcziun. Da l'autra vart duain la confederaziun ed il chantun pajar ils proxims onns prestaziuns da promoziun da totalmain 4 milliuns francs.

La plazza aviatica regiunala a Samedan sa chatta amez ina destinaziun turistica che na tutga betg mo tar las pli grondas en Svizra, mabain che ha er ina da las valurisaziuns las pli fermas da la Svizra. Sco ina da las paucas destinaziuns en il territori alpin ha l'Engiadin'ota uschia in'atgna plazza aviatica, quai ch'è in grond avantatg economic en la concurrenza internaziunala. Cunzunt l'hotellaria da tschintg stailas e las prestaziuns turisticas centralas da l'Engiadin'ota che stattan en connex cun tala profiteschan da la colliaziun directa cun il traffic aviatic.
Cunquai che las pretensiuns envers l'infrastructura da basa èn s'augmentadas fermamain e perquai che la capacitad da rendita da questa plazza aviatica alpina è restrenschida oravant tut per motivs stagiunals, na po la gestiunaria actuala da la plazza aviatica, l'Engadin Airport SA, betg realisar ils meds finanzials necessaris per modernisar questa anteriura plazza aviatica militara, er betg suenter che las taxas d'atterrament èn vegnidas auzadas. En enconuschientscha da questas difficultads infrastructuralas è vegnida nominada la stad 2010 – sin iniziativa da la vischnanca da staziunament Samedan – ina gruppa directiva cun represchentantas e represchentants dal circul d'Engiadin'ota, da las vischnancas da l'Engiadin'ota, da l'organisaziun turistica Engiadina San Murezzan, da l'Engadin Airport SA e dal chantun Grischun sco er cun expertas ed experts da l'aviatica. Questa gruppa directiva ha gì l'incumbensa da sa fatschentar cun l'avegnir da la plazza aviatica. A la gruppa èsi reussì da sa cunvegnir ad in nov model organisatoric che prevesa – en renconuschientscha da l'infrastructura da la plazza aviatica sco part da la rait da traffic public – d'ina vart in engaschi pli grond da vart dal maun public e da l'autra vart a medem temp dapli influenza per il maun public. 

La plazza aviatica regiunala sco nova incumbensa dal circul d'Engiadin'ota
Tras ina nova concepziun da las relaziuns giuridicas duain ils stabiliments d'infrastructura vegnir separads organisatoricamain e giuridicamain da la gestiunaria da la plazza aviatica. La structura da mira prevesa ina interpresa d'infrastructura independenta da dretg public dal circul d'Engiadin'ota (INFRA) sco er ina societad da gestiun privata. L'infrastructura e la proprietad funsila duain pia restar cumplainamain en la proprietad dal maun public resp. vegnir transferidas al maun public e duain correspundentamain er vegnir finanziadas dal maun public. Unicamain il traffic aviatic duai vegnir garanti vinavant d'ina societad da gestiun sin basa d'ina cunvegna da prestaziun sco er en il rom da la concessiun da gestiun valaivla. Tenor la nova concepziun vegn la INFRA ad incumbensar l'Engadin Airport SA, sco gestiunaria vertenta da la plazza aviatica regiunala, da manar questa plazza aviatica en il rom d'ina cunvegna da prestaziun. Per utilisar ils stabiliments da la plazza aviatica ha l'Engadin Airport SA da pajar a la INFRA annualmain ina fittanza fixa en la dimensiun da 760 000 francs sco er ina fittanza da success dependenta da la svieuta.
A chaschun da la votaziun a l'urna dals 23 da settember 2012 ha la populaziun da l'Engiadin'ota acceptà cun gronda maioritad ina revisiun parziala da la constituziun cirquitala, nua che la promoziun e la gestiun da la plazza aviatica regiunala èn vegnidas fixadas sco incumbensas cirquitalas. Er la legislaziun executiva ed ils statuts da la INFRA èn vegnids approvads. Plinavant han las votantas ed ils votants da l'Engiadin'ota concedì in credit da 0,5 milliuns francs sco chapital da dotaziun per la INFRA. 

In masterplan per sviluppar la plazza aviatica a lunga vista
Resguardond la finamira che l'Engiadin'ota disponia d'ina colliaziun segira e duraivla cun il traffic aviatic, ch'è stabila a lunga vista e che correspunda als basegns, han persunas spezialisadas da l'eroport da Turitg elavurà in masterplan per la plazza aviatica regiunala a Samedan. En in emprim pass duain vegnir ademplidas ils proxims 5 onns las prescripziuns regulatoricas, per ch'i saja pussaivel da cuntinuar cun la gestiun da la plazza aviatica sin il nivel infrastructural actual. Latiers tutgan l'introducziun d'in sistem d'atterament instrumental, la dischlocaziun dals manaschis d'helicopter, l'installaziun da plazzas per volver a las fins da la pista, il schlargiament da las colliaziuns cun la pista e la construcziun d'ina saiv da segirezza. Sulettamain per quest emprim pass da svilup, che sto vegnir realisà per gronda part sin basa da las prescripziuns legalas vertentas, èn vegnids eruids ils custs. Quels importan circa 8 milliuns francs. A questas investiziuns vul il chantun conceder ils proxims 5 onns prestaziuns da promoziun da 4 milliuns francs. Da quests daners vegnan pajads 2 milliuns francs en furma d'in emprest federal rembursabel.

Davart la missiva da la regenza e davart l'ulteriur proceder vegn il cussegl grond a debattar en la sessiun da favrer 2013. Igl è previs che la INFRA cumenzia cun sia activitad operativa il cumenzament da l'onn 2014. 


Infurmaziuns:
cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01 


Gremi: regenza
Funtauna: rg chanzlia chantunala dal Grischun