En il rom da ses program da restructuraziun ha l'Alpiq decidì da vender differentas participaziuns d'interpresas. En quest connex ha ella er offrì sia participaziun da 24,6 % da las aczias da la Repower als dus auters acziunaris principals, vul dir al chantun Grischun ed a l'Axpo. Suenter in'examinaziun minuziusa èn il chantun Grischun e l'Axpo sa decidids da surpigliar mintgamai la mesadad dal pachet d'aczias offrì. Ensemen han il chantun Grischun e l'Axpo, che furman er vinavant ina gruppa d'acziunaris, 92 % da las aczias da la Repower. Cun ils cumpraders èn ins sa cunvegnì da taschair davart il pretsch da vendita. Igl è planisà d'exequir la transacziun durant l'emprim quartal da l'onn 2013, premess che las permissiuns uffizialas necessarias sajan avant maun.

Il chantun Grischun e l'Axpo na vulan betg laschar duraivlamain las aczias cumpradas en lur portafegls, mabain transferir la gronda part da quellas a curta fin a media vista ad in nov partenari strategic (acziunari substitutiv). Per augmentar la creaziun da valur a favur da la communitad grischuna duai ina part da las aczias ch'il chantun ha cumprà, vegnir derschida – en in proxim pass – en in batschigl, al qual duain vegnir participadas las vischnancas. Uschia vegnan gia observadas concretamain las aspectativas ch'il cussegl grond ha formulà en la sessiun d'avust 2012 en il rom da la debatta dal rapport davart la politica d'electricitad dal chantun Grischun.

En connex cun questa transacziun decleran il chantun e l'Axpo expressivamain che la Repower resta er vinavant ina interpresa d'energia grischuna autonoma da l'economia privata e ch'ella vegn manada tenor princips da l'economia da manaschi. 
 

Infurmaziuns:
Dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01


Gremi: regenza
Funtauna: rg chanzlia chantunala dal Grischun