Per l'emprima giada ha la regenza dal chantun Grischun fixà las finamiras strategicas per la Viafier retica SA ch'ella vul – sco proprietaria principala – cuntanscher fin l'onn 2016. Igl è l'emprima strategia da proprietari che la regenza ha relaschà per ina instituziun u interpresa, a la quala è participà il chantun.

Cun ina quota da 51,3 % è il chantun Grischun l'acziunari principal da la Viafier retica. La protecziun dals agens interess è ina incumbensa da la regenza. Sias prescripziuns, ch'ella ha formulà en ina strategia da proprietari, valan da princip fin l'onn 2016. Il cussegl d'administraziun da la Viafier retica sto drizzar sia strategia d'interpresa tenor questas prescripziuns. El è responsabel che las finamiras fixadas vegnian cuntanschidas. La regenza controllescha annualmain, sche las finamiras èn vegnidas cuntanschidas. La strategia da proprietari è vegnida elavurada en collavuraziun cun la Viafier retica. Ella resguarda las libertads d'interpresa da la Viafier retica e duai stgaffir premissas optimalas per che l'activitad commerziala da la Viafier retica haja success.
Las finamiras generalas defineschan las aspectativas che la Viafier retica furneschia soluziuns attractivas per il transport da persunas e da rauba, ch'ella mettia a disposiziun l'infrastructura necessaria e ch'ella administreschia sias immobiglias en moda professiunala. Quai è collià cun l'incarica da rinforzar en general la posiziun dal traffic public e da prestar ina contribuziun decisiva a favur dal transferiment dal traffic.

Puncts centrals strategics per ils secturs da fatschenta
Areguard il traffic da persunas spetga la regenza che la Viafier retica garanteschia – sco furnitura da prestaziuns – la mobilitad en tut las regiuns cun ina purschida moderna che correspunda als basegns. Per quest intent duai vegnir creada ina purschida orientada al martgà, e la quota dal martgà dal traffic public regiunal e dal traffic da temp liber duai vegnir augmentada. En vista a sia impurtanza turistica è la Viafier retica dumandada da porscher products da temp liber che correspundan al martgà e da manar ses trens d'auta qualitad, sco il Glacier express ed il Bernina express. Uschia duai la Viafier retica furnir er en l'avegnir ina contribuziun impurtanta per augmentar l'attractivitad dal turissem grischun ed per crear valur en l'economia publica grischuna.
Areguard il traffic da rauba spetga la regenza che la Viafier retica offreschia prestaziuns che cuvran ils custs, resguardond l'indemnisaziun dal maun public, e furneschia uschia ina contribuziun per transferir il traffic da rauba da la via sin la viafier.
Areguard l'infrastructura èn vegnidas fixadas las finamiras che la Viafier retica impundia ils meds finanzials en moda effizienta e tegnia il stadi da sia rait e da ses implants a lunga vista sin in livel segir ed adequat, tant areguard la tecnica sco er areguard il manaschi.
La Viafier retica duai administrar activamain sias immobiglias e sviluppar vinavant cun cleras intenziuns ils areals da viafier, per gidar uschia a meglierar il resultat da l'interpresa. La regenza spetga che la Viafier retica concepeschia sias staziuns en moda attractiva e sviluppia vinavant quellas – tut tenor la dumonda – a centers da servetschs che resguardan ils basegns da la clientella.

Prescripziuns finanzialas e persunalas
La regenza ha er fixà finamiras finanzialas per la Viafier retica, sco per exempel il grad da la cuvrida dals custs u il cash flow suenter la finanziaziun tras il maun public. Questas prescripziuns finanzialas vegnan cumplettadas cun ils instruments gia enconuschents, vul dir cun la cunvegna da prestaziun per l'infrastructura e cun l'empustaziun da secturs da traffic cun dretg d'indemnisaziun. Quests instruments vegnan concludids mintgamai separadamain da la confederaziun e dal chantun ensemen cun la Viafier retica per ina perioda correspundenta.
La strategia da proprietari cuntegna er prescripziuns areguard il persunal. Envers sias collavuraturas e ses collavuraturs sto la Viafier retica sa cuntegnair er en l'avegnir sco patruna sociala che agescha cun responsabladad. Plinavant sto ella porscher sco en il passà plazzas da scolaziun ed emprendissadis moderns. 


Infurmaziuns:
cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01 


Gremi: regenza
Funtauna: rg chanzlia chantunala dal Grischun