Las fisioterapeutas ed ils fisioterapeuts dal chantun Grischun pon metter a quint dapli per lur prestaziuns. La regenza grischuna ha adattà la valur dals puncts da taxa a la chareschia dals onns passads. 

Fixà la valur dals puncts da taxa per las prestaziuns da fisioterapia
La regenza grischuna ha fixà d'uffizi la valur chantunala dals puncts da taxa per prestaziuns da fisioterapia en praticas libras. Igl è stà necessari da fixar la tariffa per metter a quint las prestaziuns da las fisioterapeutas e dals fisioterapeuts, perquai che las tractativas tranter ils partenaris da tariffa han fatg naufragi. La valur dals puncts da taxa per las prestaziuns da fisioterapia en las praticas libras dal chantun Grischun vegn fixada retroactivamain per il 1. da fanadur 2011 a 0,97 francs. Uschia vegn augmentada la tariffa da 0,86 francs che vala dapi il schaner 1998 per 11 raps. Quai correspunda a la chareschia ch'è resultada fin il zercladur 2011 (midada da l'index naziunal dals pretschs da consum). 
 
Dretgs da cogestiun en la furmaziun professiunala sin fundament da las incaricas da prestaziun
Las scolas professiunalas spezialisadas e las ulteriuras instituziuns da la furmaziun fundamentala professiunala en il chantun Grischun vegnan – cun excepziun dal center da furmaziun per la sanadad ed ils fatgs socials (CSS) e dal center da furmaziun e cussegliaziun agricula Plantahof (CFCA) – manadas da vischnancas ubain d'instituziuns responsablas privatas. Tenor la legislaziun po il dretg da cogestiun dal chantun en connex cun las instituziuns da la furmaziun professiunala vegnir exequì en il rom da las incaricas da prestaziun. En il decurs dals ultims 2 onns ha la regenza perquai desistì successivamain da delegar represchentanzas chantunalas en differentas instituziuns da la furmaziun professiunala. Quest process ha ella ussa terminà cun sa retrair er dal cussegl da fundaziun da la chasa d'emprendistas e d'emprendists da Cuira sco er dals gremis strategics da la scola professiunala dal Puschlav e dal Polo Puschlav.
 

Da vischnancas e da regiuns

• Arvigo: Il project d'exposiziun per la sanaziun totala da la via da la Val Calanca entaifer il vitg dad Arvigo vegn approvà. Parallelamain a la via chantunala vegn realisà in passape. Als custs dal passape vegn concedida ina contribuziun da maximalmain circa 80 561 francs.
• Schiers e Fideris: Las revisiuns parzialas da las constituziuns da la vischnanca da Schiers dals 23 da november 2012 sco er da la vischnanca da Fideris dals 29 da november 2012 vegnan approvadas. Il motiv da revisiun è stà cunzunt la fundaziun dal consorzi da scola Fideris-Furna-Jenaz-Schiers per il cumenzament da l'onn da scola 2013/14. 

Contribuziuns chantunalas a differentas instituziuns

• Organisaziun da las Svizras e dals Svizzers a l'exteriur: Per realisar il 91avel congress da las Svizras e dals Svizzers a l'exteriur dals 16 fin ils 18 d'avust 2013 a Tavau vegn concedida a l'organisaziun da las Svizras e dals Svizzers a l'exteriur (OSE) ina contribuziun da 50 000 francs or dal fond da la lottaria naziunala. Al congress vegnan spetgadas circa 400 participantas e participants da tut il mund. En il center da l'occurrenza stat la radunanza plenara che ha lieu en il center da congress da Tavau e che ha il tema "La Svizra vs. la globalisaziun?". A chaschun da la radunanza plenara dals 17 d'avust 2013 vegn il president da la regenza Hansjörg Trachsel a purtar in salid da la regenza grischuna.

 
Projects da vias
La regenza ha approvà 4 405 000 francs per lavurs da construcziun sin ils suandants trajects:
- via d'Engiadina: lavurs d'impressari, correcziun da la via Lavin – Giarsun
- via da la Muntogna da Schons: lavurs d'impressari e lavurs da cuvrida, reparaziun da la punt Bargias 
 

Gremi: regenza
Funtauna: rg chanzlia chantunala dal Grischun