Sco emprim project legislativ en il rom da la refurma dal territori dal chantun Grischun duai vegnir adattada la lescha davart il notariat. La regenza grischuna ha avert la consultaziun en chaussa. Ultra da quai è la regenza sa fatschentada cun differentas fatschentas da vischnancas e da regiuns. 

La regenza grischuna lantscha la consultaziun tar la revisiun parziala da la lescha davart il notariat
Pervia da la refurma dal territori e pervia da l'aboliziun dals circuls sco purtaders d'incumbensas publicas sto la lescha davart il notariat vegnir revedida. En quest connex vegnan regladas da nov oravant tut las incumbensas da las notaras cirquitalas e dals notars cirquitals. Il sboz prevesa che las incumbensas da las anteriuras notaras cirquitalas e dals anteriurs notars cirquitals vegnian ademplidas – tut tenor il basegn d'in tschert champ d'incumbensas – d'uschenumnadas notaras uffizialas e d'uschenumnads notars uffizials. Quellas e quels vegnan elegids da la regenza sin dumonda da la regiun correspundenta.
La regenza grischuna ha tramess en consultaziun in sboz da lescha correspundent. La consultaziun dura fin ils 15 d'avrigl 2013. Las ponderaziuns da la regenza èn resumadas en il rapport da consultaziun. Ils documents da consultaziun pon vegnir chargiads giu da la pagina d'internet dal departament da giustia, segirezza e sanadad (www.djsg.gr.ch) u empustads tar il departament.
Questa revisiun parziala da la lescha davart il notariat è l'emprim program legislativ che vegn tramess en consultaziun en il rom da la refurma dal territori. Ulteriurs projects legislativs e pia er ulteriuras consultaziuns vegnan a suandar. 

Elavurà las disposiziuns per promover la tgira d'uffants cumplementara a la famiglia
La regenza ha revedì totalmain las disposiziuns executivas tar la lescha davart la promoziun da la tgira d'uffants cumplementara a la famiglia en il chantun Grischun e transfurmà ellas en ina nova ordinaziun. Ils custs normads ch'èn decisivs per calcular las prestaziuns da promoziun vegnan fixadas praticamain en l'ordinaziun; fixond ils custs normads s'orientescha la regenza vi dals custs dals purschiders renconuschids dals onns precedents.
Exclus dal champ d'applicaziun da l'ordinaziun èn purschidas en il rom da las ulteriuras structuras dal di sco er l'assistenza durant las uras da bloc tenor la nova legislaziun da scola. A partir da la nova legislaziun da scola il 1. d'avust 2013 ha il purtader da scola (vischnanca) da fixar er il basegn per las ulteriuras structuras dal di. Perquai vegn ad esser avant maun in basegn per ina tgira d'uffants cumplementara a la famiglia mo, sch'i na vegn betg mess a disposiziun ina purschida correspundenta en il rom da las ulteriuras structuras dal di. 

Reglà transitoricamain il temp d'instrucziun per emna en scolina
La nova legislaziun da scola dal chantun Grischun dat a la regenza la cumpetenza da relaschar in plan d'instrucziun per tut ils stgalims da la scola populara, da nov er per la scolina. Fin ch'il plan d'instrucziun interchantunal (Plan d'instrucziun 21) è avant maun per ils chantuns tudestgs e plurilings, cun il qual vegn reglà a medem temp er il temp d'instrucziun per emna, ha la regenza fixà per il stgalim da la scolina ina dotaziun minimala da 20 uras, en las qualas ston er esser cuntegnidas las uras da recepziun a l'ur. Tenor la lescha che vala a partir dal 1. d'avust 2013 cumpiglian las uras da bloc en scolina l'avantmezdi almain trais uras consecutivas. 

Puspè contingent da 290 abitaziuns da vacanzas per il Grischun
Per l'onn 2013 ha il cussegl federal consegnà al chantun Grischun danovamain 290 contingents da permissiun per l'acquist d'abitaziuns da vacanzas tras persunas a l'exteriur. Ultra da quai dastgan las 266 unitads dal contingent che n'èn betg vegnidas duvradas l'onn precedent vegnir transferidas sin l'onn current. Suenter la repartiziun da tut ils contingents da l'onn precedent vegnan ils contingents chantunals da permissiun 2013 repartids sco suonda: 240 contingents per objects en surbajegiadas cumplettas e 50 contingents per l'acquist d'objects singuls. 


Da vischnancas e da regiuns

• Lantsch: La revisiun parziala da la planisaziun locala da la vischnanca da Lantsch dals 28 da mars 2012 vegn approvada. L'approvaziun da la planisaziun d'utilisaziun a Tschividains è vegnida dada explicitamain senza mintga pregiudizi per ulteriuras planisaziuns per pudair midar l'utilisaziun da stallas per in auter intent. Cun in monitoring vegni ultra da quai garantì ch'ils 17 edifizis da l'abitadi d'aclas "Tschividains" ch'èn vegnids mess da nov sut protecziun correspundian er a lunga vista al stadi permess e che las mesiras da reparaziun e da concepziun cunvegnidas vegnian realisadas.
• Tavau: Il plan directiv cumplessiv regiunal da la vischnanca da Tavau dals 19 d'avrigl 2012 vegn approvà. Tscherts chapitals dal plan directiv chantunal vegnan adattads. En il sectur dal turissem cuntegna il plan directiv cumplessiv duas colliaziuns da territoris da skis (Jakobshorn-Rinerhorn e Schatzalp-Parsenn), trais reducziuns d'engrondiments da territoris da skis (Pischa, Jakobshorn e Rinerhorn), l'augment da l'impurtanza da d'in engrondiment d'in territori da skis (Jakobshorn) ed ina nova pendiculara d'apport (Wolfgang-Meierhofertäli).
• Tumein: Il project da cumplettaziun da la vischnanca da Tumein per metter cuvrir la via da velos Tumein – Favugn cun asfalt sin ina lunghezza da var 2,5 kilometers vegn approvà. Als custs dal project vegn concedida ina contribuziun chantunala maximala da 171 000 francs.
• Malans: Per la via chantunala a Malans (en il vitg), traject dal spartavias a la Sägereistrasse fin a la fin da la via chantunala, vegn la lunghezza maximala da vehichels limitada a 12 meters.
• Fideris, Furna, Jenaz e Schiers: Ils statuts dal consorzi da scola Fideris – Furna – Jenaz – Schiers vegnan approvads.

 
Contribuziuns chantunalas a differentas instituziuns

• Federaziun da tetg Grischun laina: Per ils onns 2013 fin 2016 ha la regenza approvà ina nova cunvegna da prestaziun cun la federaziun da tetg Grischun laina. A la federaziun da tetg vegn garantida ina contribuziun da maximalmain 295 000 francs per onn. Las incumbensas fixadas cumpiglian tranter auter: extensiun e professiunalisaziun da la plattafurma digitala da Grischun laina, promoziun da las innovaziuns sur in transfer da savida e da tecnologia sco er rinforz da la prontezza da cooperaziun en la branscha.
• Firma Holcim SA: A la firma Holcim SA a Vaz sut vegn concedida ina contribuziun d'investiziun da maximalmain 129 100 francs per renovar ses binaris da colliaziun privats a Zizers/Vaz sut.
• Klibühni, Das Theater: A la Klibühni a Cuira vegn concedida ina garanzia da deficit da maximalmain 200 000 francs per il program d'occurrenzas da l'onn 2013. 

Projects da vias
La regenza ha approvà 2,9 milliuns francs per lavurs da construcziun sin ils suandants trajects:
- via sursilvana: lavurs d'impressari, correcziun da la via, Punt Russein
- via dal Güglia: lavurs da cuvrida, correcziun da la via, Gross Kehr 
 

Gremi: regenza
Funtauna: rg chanzlia chantunala dal Grischun