La primavaira cumenza la construcziun dal tunnel da sviament da Silvaplauna. La regenza grischuna ha surdà l'incarica per quai. Ultra da quai prenda la regenza posiziun davart la cuntraproposta indirecta dal cussegl federal tar la "iniziativa davart ils stipendis". 

La cuntraproposta indirecta tar la "iniziativa davart ils stipendis" sto anc vegnir meglierada
La regenza grischuna beneventa da princip la proposta indirecta ch'è vegnida elavurada da la confederaziun tar la "iniziativa davart ils stipendis", inoltrada da la federaziun svizra da studentas e students (FSS). Pertutgant la consultaziun davart ina revisiun totala da la lescha davart las contribuziuns a la scolaziun è la regenza satisfatga ch'il cussegl federal sa basa sin il concordat da stipendis dals chantuns cun adattar sia legislaziun. Il concordat fixescha standards minimals per in'armonisaziun formala naziunala dals fatgs da stipendis. El vegn probablamain ad entrar en vigur la primavaira 2013, suenter che 10 chantuns èn sa participads. Las disposiziuns formalas dal concordat da stipendis dals chantuns duain vegnir recepidas da nov en la lescha davart las contribuziuns a la scolaziun per quant ch'ellas concernan il sectur da furmaziun terziar (scolas autas e furmaziun professiunala superiura). La regenza s'exprima a favur da surlaschar vinavant als chantuns la cumpetenza regulativa en il dretg da stipendis.
Tenor il sboz da consultaziun duain las subvenziuns da la confederaziun per ils stipendis vegnir calculdas da nov a maun da las prestaziuns che vegnan furnidas dals chantuns (empè da sco fin ussa a maun dal dumber da la populaziun). Per il chantun Grischun chaschuna quai entradas pli autas da circa 730 000 francs, q.v.d. en tut entradas da ca. 1,33 milliuns francs. Tenor l'avis da la regenza sto la confederaziun s'engaschar anc pli fitg per promover la scolaziun. En il cas ideal fissan ils custs da la confederaziun en il sectur terziar tuttina auts sco quels dals chantuns. Cun ina contribuziun d'actualmain circa 25 milliuns francs per onn cuvra la confederaziun en media 14 pertschient dals custs che resultan per ils chantuns en il sectur da furmaziun terziar. 

Il med d'instrucziun da rumantsch grischun per il segund stgalim superiur è vegnì permess
A partir da l'onn da scola 2014/15 vegn a star a disposiziun il med d'instrucziun da lingua en rumantsch grischun per il segund stgalim superiur. La regenza ha approvà l'elavuraziun dal med d'instrucziun da lingua "Qua e là" per il segund stgalim superiur. Ils custs dal project importan maximalmain 420 000 francs. Il med d'instrucziun da lingua consista d'in cudesch da lectura e da lavur, da quatter carnets da lavur, da quatter commentaris per las persunas d'instrucziun, dad in fin dus discs cumpacts sco er da materialias supplementaras sin basa da l'internet. Actualmain è anc en lavur il med d'instrucziun "Vi e nà" per l'emprim stgalim superiur che vegn duvrà a partir dal proxim onn da scola 2013/14 per l'instrucziun en las vischnancas che han introducì rumantsch grischun sco vischnancas da piunier. 
 

Da vischnancas e da regiuns

• Jenins: La revisiun parziala da la constituziun communala da la vischnanca da Jenins dals 11 da december 2012 vegn approvada. In artitgel concernent las elecziuns da las autoritads communalas è vegnì revedì.
• Segl: La revisiun parziala da la planisaziun locala da la vischnanca da Segl dals 21 da zercladur 2012 vegn approvada. La revisiun parziala cuntegna essenzialmain l'amplificaziun da la zona da mastergn cun vigur legala en il territori "Föglias". Circa 14 200 meters quadrat terren vegnan transferids da la zona d'agricultura a la zona da mastergn. Uschia po il basegn calculà da terren da construcziun supplementar vegnir cuvrì.

Projects da vias
L'incarica per construir in nov tunnel a Silvaplauna è vegnida surdada
La regenza grischuna ha surdà l'incarica per construir in nov tunnel da sviament a Silvaplauna. L'agiudicaziun per l'incarica en l'import da 33,6 milliuns francs ha survegnì la CSC interpresa da construcziun SA da Lugano. Il tunnel d'ina lunghezza da 750 meters che ha ina pendenza longitudinala dad 8,5 pertschient è il coc dal sviament da Silvaplauna d'ina lunghezza da 1470 meters. Il tunnel vegn exchavà cun ina tendenza diminuinta ed en la tecnica d'avanzar minond. En quest connex resultan 76 000 meters cubic grip e 20 000 meters cubic material luc. Ultra da las installaziuns usitadas per la segirezza tecnica vegnan realisadas en il tunnel tschintg sortidas da fugia en ina distanza da mintgamai 125 meters. Las lavurs d'impressari cumenzan questa primavaira.
Il project dal sviament da Silvaplauna è vegnì approvà l'onn 2005 da la regenza. L'emprima palada uffiziala ha gì lieu il zercladur 2010. L'emprim è vegnì realisà il provediment d'aua ch'è necessari per il plazzal e per il manaschi posteriur dal tunnel. A medem temp è vegnida amplifitgada la via dal Güglia davent dal futur portal dal tunnel Pignia en direcziun dal culm dal pass sin ina lunghezza da ca. 250 meters. Per il project da sviament vegni fatg quint cun custs totals da 70 milliuns francs. L'avertura dal sviament è planisada per l'onn 2016.

Ultra da quai ha la regenza approvà 2,93 milliuns francs per lavurs da construcziun sin ils suandants trajects:
- via dal Bernina: lavurs d'impressari e da cuvrida, correcziun da la via, Lai da Puschlav 
 

Gremi: regenza
Funtauna: rg chanzlia chantunala dal Grischun