A Realta duai vegnir construì in nov stabiliment serrà per l'execuziun giudiziala. Sa basond sin in rapport strategic ha la regenza grischuna lantschà ina concurrenza architectonica per in edifizi nov.
La concurrenza da planisaziun per il nov stabiliment per l'execuziun giudiziala Realta è vegnida incumbensada
La regenza sustegna la construcziun d'in nov stabiliment serrà per l'execuziun giudiziala da 150 plazzas da praschuniers a Realta en la vischnanca da Cazas. Ella ha incumbensà l'uffizi chantunal da construcziun auta d'organisar ina concurrenza da planisaziun per il nov stabiliment. Davart l'edifizi nov vegn il cussegl grond probablamain a decider definitivamain l'onn 2014.
In rapport strategic davart l'execuziun giudiziala en il Grischun, dal qual la regenza ha prendì enconuschientscha, mussa cleramain il basegn interchantunal d'in stabiliment serrà da questa dimensiun per l'execuziun giudiziala. Al concordat dals chantuns da la Svizra orientala davart l'execuziun da chastis e da mesiras mancan oz var 140 plazzas en l'execuziun giudiziala serrada. Uschia han ils concordats dals chantuns ils pli ferm populads Turitg e Son Gagl gia dà al chantun Grischun lur consentiments d'occupaziun nunliants en la dimensiun da circa 100 plazzas per 10 onns a partir da l'avertura dal stabiliment planisà a Realta. Er la confederaziun beneventa il project. Als custs da circa 107 milliuns francs vegniss la confederaziun a sa participar cun circa 33 milliuns francs. L'investiziun netta dal chantun importass pia circa 74 milliuns francs. Las dunsenas per ils praschuniers dal concordat dals chantuns da la Svizra orientala vegnissan a finanziar il manaschi ed a pussibilitar er la finanziaziun restanta da l'investiziun a favur da la construcziun. Plinavant vegni quintà che Realta generass almain 80 plazzas da lavur novas. Sin fundament da la connexiun cun la clinica psichiatrica Beverin sco er cun il stabiliment avert per l'execuziun giudiziala Realta è il lieu fitg avantagius.
Grazia a l'edifizi nov a Cazas po vegnir liquidà il stabiliment vertent dal Sennhof che vegn manà sco instituziun serrada a Cuira. Il stabiliment demussa oz differentas insuffizienzas da manaschi e differentas mancanzas da segirezza, che pudessan vegnir schliadas al lieu vertent mo faschond gronds custs finanzials e mo en moda nuncuntentaivla. Ulteriurs basegns da spazi pudessan vegnir realisads al lieu actual – per mancanza d'ulteriuras pussaivladads d'engrondiment – mo en ina dimensiun fitg modesta e cun suprapostrar utilisaziuns. Per l'utilisaziun futura dal Sennhof ha la regenza incumbensà l'uffizi da construcziun auta da far in studi. Cun ina concurrenza d'ideas e/u d'investiders duain vegnir preschentads il potenzial economic, eventualas utilisaziuns alternativas sco er la realisabladad. Questa planisaziun vegn fatga parallelamain a la concurrenza architectonica per in nov edifizi, per che la missiva da construcziun al cussegl grond possia cuntegnair ina clera decleraziun areguard l'ulteriura utilisaziun dal Sennhof.
La regenza conferma l'impurtanza dal process da durabilitad, d'innovaziun e d'ierta (DII) per ils gieus olimpics 2022
La regenza dal chantun Grischun sustegna ina candidatura per ils gieus olimpics d'enviern 2022 tenor il concept ch'è vegnì elavurà da l'uniun per ils gieus olimpics d'enviern en il Grischun 2022. Il process DII sco part elementara da quest concept metta a disposiziun a la candidatura dal Grischun 2022 in instrument per realisar la visiun pretensiusa ed a medem temp in exempel extraordinari envers autras candidaturas.
La regenza ha approvà l'impurtanza dal process DII gia en sia missiva al cussegl grond. La charta DII ch'è ussa avant maun determinescha la libertad d'agir per organisar ils gieus. La regenza sustegna la charta DII, versiun 10.1, e las finamiras d'effects ch'èn vegnidas formuladas en quella. En connex cun la candidatura per ils gieus olimpics d'enviern ston questas finamiras vegnir concretisadas e vegnir fixadas en moda lianta per las partenarias ed ils partenaris che fan part dal project. Deducir, definir e quantifitgar las finamiras concretas che derivan da las finamiras d'effects è in process pretensius che vegn cuntinuà en il rom d'ina candidatura per ils gieus olimpics d'enviern dal Grischun 2022.
Fixà la represchentanza en il "Forum per l'italiano in Svizzera"
Il cusseglier guvernativ Martin Jäger vegn ad esser il commember dal chantun Grischun en il "Comitato direttivo" (gremi directiv) dal "Forum per l'italiano in Svizzera". Il forum per la protecziun e per il rinforzament dal talian sco lingua naziunala è vegnì fundà ils 30 da november 2012 sin impuls dal chantun Tessin. Ultra dals chantuns Grischun e Tessin fan differentas instituziuns da furmaziun e differentas organisaziuns culturalas part da l'uniun naziunala. Suenter avair occupà il "Comitato direttivo" vegn il "Forum per l'italiano in Svizzera" ad esser activ sin plaun operativ.
Da vischnancas e da regiuns
- Fläsch: La revisiun parziala da la planisaziun locala da la vischnanca da Fläsch dals 14 da settember 2012 vegn approvada. Cun la revisiun parziala vegn dada la premissa per construir in nov implant da chalur a distanza en il territori "Patschär". La zona per edifizis e per stabiliments publics vegn amplifitgada. Ensemen cun il conclus d'approvaziun vegn communitgada la permissiun da runcar. Ina finamira da lunga durada è er da proveder il center dal vitg da Fläsch cun chalur a distanza.
- Flem: Il project per construir in rempar da l'aual Vitgè en la vischnanca da Flem vegn approvà. Cun il project vegn reducida sin ina dimensiun acceptabla la periclitaziun d'aua gronda che l'aual munta per il vitg. Sco mesira principala vegn construì in batschigl cun in volumen da circa 4000 meters cubic che duai retegnair la gera e che serva a medem temp sco implant da stgargiada d'aua gronda. La contribuziun chantunala importa maximalmain 221 600 francs.
Gremi: regenza
Funtauna: rg chanzlia chantunala dal Grischun