La cumissiun predeliberanta dal cussegl grond refusescha l'iniziativa "Gea ad electricitad netta senza forza electrica da charvun" e sustegna la cuntraproposta da la regenza cun ina cumplettaziun explicativa. La cumissiun recumonda d'integrar en la cuntraproposta ina indicaziun concreta che investiziuns en novas ovras electricas a charvun duain vegnir admessas en il futur mo, sch'il svilup tecnologic dals proxims onns chaschuna ina reducziun essenziala tar l'emissiun da CO2 envers oz.

La cumissiun predeliberanta dal cussegl grond ha discutà en dus dis da sesida la missiva da la regenza tar l'iniziativa chantunala dal pievel "Gea ad electricitad netta senza forza electrica da charvun" sut il presidi da Jon Domenic Parolini ed en preschientscha da cusseglier guvernativ Mario Cavigelli. Separadamain è ella sa laschada infurmar da represchentantas e da represchentants dal comité d'iniziativa sco er dal mainagestiun da la Repower. La fatschenta vegn tractada dal cussegl grond en la sessiun da favrer 2013.

Suenter ina discussiun detagliada e profunda è la gronda part da la cumissiun arrivada a la conclusiun – en accordanza cun la regenza – da recumandar il pievel da refusar l'iniziativa dal pievel "Gea ad electricitad netta senza forza electrica da charvun" e dal suttametter empè da quai ina cuntraproposta per la votaziun. La cuntraproposta tegna quint dal giavisch da l'iniziativa da reducir essenzialmain l'emissiun da CO2 tar la producziun d'electricitad en ovras electricas a charvun e resguarda ultra da quai interess impurtants che l'iniziativa dal pievel negligescha deplorablamain. Per l'ina permetta la cuntraproposta ch'il chantun possia mantegnair en mintga cas sia participaziun vi da la Repower sco interpresa d'electricitad che ha sia sedia en il Grischun, ma ch'è activa sin plaun internaziunal, e sviluppar vinavant quella a lunga vista en l'interess da l'economia publica e da la politica d'energia dal Grischun. L'iniziativa mettess quai en dumonda. Per l'autra tegna la cuntraproposta quint dal fatg che la tecnologia per producir electricitad sin basa da charvun sa chatta en tut l'Europa en in svilup remartgabel.
Dapi ch'il chantun e l'Axpo han acquistà mintgamai la mesadad da las aczias da la Repower ch'èn stadas en possess da l'Alpiq èsi enconuschent ch'il contract d'acziunarias e d'acziunaris che vala per ils acziunaris principals da la Repower pudess avair consequenzas considerablas e seriusamain negativas per la politica d'electricitad, per l'economia d'energia, per l'economia publica e per las finanzas chantunalas dal Grischun, sche l'iniziativa dal pievel vegniss acceptada, perquai ch'il chantun Grischun s'exponiss uschia a la ristga da stuair alienar la participaziun a la Repower ch'el tegna actualmain sco er quella ch'el ha acquistà da nov. Ina tala consequenza resguarda la cumissiun sco nungiavischada.
La cumissiun ha ultra da quai prendì enconuschientscha dal fatg che la Repower vul reducir sia participaziun a la societad dal "Project Saline Joniche" dad actualmain 57,5 pertschient a da nov 20 pertschient a chaschun da la permissiun da construcziun definitiva e ch'ella ha en il futur ina participaziun minoritara. La consequenza da la cuntraproposta è quella che la Repower avess la permissiun da pudair realisar eventualmain il project "Saline Joniche" sco enfin ussa. Da l'autra vart vegni però garantì en la cuntraproposta che la Repower u mintga autra societad, a la quala il chantun è participà, na po en il futur far pli naginas investiziuns en novs projects ed en novas ovras, sch'ella na reducescha betg l'emissiun da CO2 essenzialmain envers il stadi tecnologic actual.

En il rom da las tractativas parevi a la cumissiun d'esser cunvegnent che las represchentantas ed ils represchentants dal chantun e dal comité d'iniziativa entrian anc ina giada en discussiun avant che prender definitivamain la decisiun, ussa che tuttas duas varts han signalisà la prontezza da far quai. Las tractativas intensivas èn displaschaivlamain restadas senza resultats concrets. Perquai è la cumissiun sa radunada ier anc ina giada per prender ina decisiun definitiva. 
 

Infurmaziuns:
dr. Jon Domenic Parolini, president da la cumissiun predeliberanta, tel. 079 280 72 92


Gremi: cumissiun predeliberanta "Gea ad electricitad netta senza forza electrica da charvun"
Funtauna: rg cumissiun predeliberanta "Gea ad electricitad netta senza forza electrica da charvun"